بختك اليوم "الثلاثاء" من هريدي نيوز

ياتكون محظوظ ياتكون منحوس مع بختك فى هريدى نيوز :
-الحمل
نهارنا زي العسل ..الفنكوش وصل . حاول تكون هادي النهاردة حتي لو زقك حمار في ترعة
_الثور
ما تفرطش في اغلي ما تملك ..علبة سجايرك ..محفظتك وأهم حاجة حزام البنطلون
_الجوزاء
ادلع يا كايدهم ..هتتبسط من انجازاتك وفيه ناس كتير هتتبسط منك وربنا يكفيك شر العين والحسد والقر من القرارين
_السرطان
يوم صعب اعصر علي نفسك نص كيلو ليمون وعديه زي ما يعدي وبعدين ابقي استحمي بمية نهضة مقطرة
_الأسد
ومن يتهيب صعود الجبال يعش كل يوم في حفر ونكد وقرف , اطلع يا اسد وخليك جريء وعبر عن نفسك
_العذراء
بيقولوا ناويين يلغوا البرج بتاعك السنة الجاية ويخلوه علي سنتين زي الثانوية العامة ومش بعيد يغيروا المناهج ويبقي اسمك برج بديع
_الميزان
الكورة للي بيلعبها هواية والميزان واللي فيه هواة ما تعرفش تبقي هوائي علي طول ولا حتي تركز علي طول هي الحياة كدة .مجنونة زي القوطة
_العقرب
التوتر والقلق بيجيبوا صلع وانت مش ناقص ..والمثل بيقول لا تصاحب الأقرع ولا تأخد منه نصيحة لو نافع نفسه كان حافظ علي رأسه صحيحة
_القوس
شالوا القوس جابوا دلو او عذراء كلها في الآخر بتتساوي وانت عليك الاجتهاد حتي لو طلبوا منك تقفز من فوق البرج ..اسال علي العنوان وروح نط فورا
_الجدي
بص اليومين دول عادي تتمسك وتدخل التخشيبة وعادي تضرب خرطوشتين في نافوخك وعادي تلاقي المخدرات في الشارع بس اللي مش عادي ان النور ما يقطعش عندكم بقاله اسبوع ..خلي بالك هيقطع في لحظة حرجة جدا
_الدلو
يا واد يا تقيل يا مجننهم ..كل الأبراج عينها عليك اتشيك والبس الحتة الزفرة ووريهم الروشنة
_الحوت
هتعمل صفقة كبيرة وهتكسب فلوس كتير ..انت الوحيد في الابراج اللي معاك فلوس ..تجيب 75 قرش سلف ؟!!