بختك اليوم "الأحد" من هريدى نيوز

يا تكون محظوظ يا تكون منحوس.. بختك النهاردة فى هريدى نيوز، ولو طلع مايل إوعى تضرب بوز:
_الحمل:
حلو وجذاب.. بس أهم حاجة ما تبقاش حلو وكداب، دوّر على نصّك التانى وفكّر تشرب معاه عصير مانجه.
_الثور:
زى الشاى ما اتطور وبقى فى يوم من الأيام شاى بحليب، إنت كمان لازم تطور وتبقى "ثور" بفيونكات، يمكن يعجب.
_الجوزاء:
هتدخل شركة فيها فلوس، وهتظبط أداءك جدًّا، بس لسة عيون الحاسدين عليك، الْبِسْلُهم خرزة زرقا، يمكن يتهدّوا.
_السرطان:
لو كل الأبراج زيك ما كانش حد غلب.. رزقك فى رجليك، واعى وعارف مصلحتك، بس لازم تحط النقط على الحروف وما تطلعش على الروف.
_الأسد:
بتحب اتنين سوا المية والفلوس، يا هناك فى حبهم بس صخرة الواقع ممكن تدشدش أى أحلام بتحلمها.
_العذراء:
التردد.. التردد مرض الجنس البشرى، زى ما قالت الست شجرة الدر، اتخلص منه قبل ما القباقيب تخلصك خالص.
_الميزان:
حجة البليد مسح السبورة، وآخر سبورة كانت فى مدرسة المشاغبين أصلًا، ما ترجعش لورا وبص لأدام.
_العقرب:
زى القرع تمد لبرة.. ما تفكرش تستخدم أى صوابع، بيقبضوا على أى حد بيفكر يستخدم صوابعه، إن شاء الله لو بتعد عليهم.
_القوس:
الفلوس اللى جاية مش جاية ليك، وزى ما ظلمت زمان النهاردة هتدفع التمن.. شغل مهرجان يا طاهرة يا أم الحسن والحسين، وحاول تنسى.
_الجدى:
نجم اليوم وكل يوم.. ونجم الجماهير، واللمبة مش هتنور فى المولد إلا لو الرقاصة جات، وانت ما تلعبش دور الطبال.
_الدلو:
طول عمرك دمك خفيف، ما تهذرش غير مع اللى أدك عشان الكبير ما يقلبش ضدك.
_الحوت:
لأجل الورد ينسقى العليق.. وانت بقى هتسقى عليق كتير النهاردة، وكله عشان حبيبك يكون راضى.