نشطاء يسخرون من انتشال رأس رمسيس الثاني ب«لودر».. محمد: لو كان يعرف كان أباد المصريين.. إيهاب: إحنا بلد العجايب.. رضوى: ونش يا مصر.. أبانوب: أنبوبة أمير بقى والزق.. إسلام: زرجن مع الحكومة كسروا راسه

حالة من السخرية والانتقاد وجهها نشطاء "فيس بوك وتويتر" لاستخدام الفريق الأثري "لودر" لاستخراج رأس وجسد رمسيس الثاني، الذي تم اكتشافه اليوم في المطرية.
لودر رمسيس
النشطاء سخروا واصفين اللودر بالمعدات التقنية الحديثة، معلقين أن "رمسيس الثاني لو كان يعلم أن رأسه ستخرج بلودر لأباد المصريين".
تدمير
قال محمد محسن: "رمسيس الثانى لو كان يعرف أن هييجى اليوم ودماغه تتشال في لودر كان أباد المصريين ساعتها"، وأضافت منى عادل الجابري: "إيه حكايتك ياعم رمسيس في كل حته موجود في طيبة ومنف وأبو سمبل والأقصر وكمان المطرية زوجة وقصة في كل شبر فرعون بجد ارحم شويه ياعم".
وعلق إبراهيم عبد الفتاح: "قمة ال... حفار لإخراج الملك رمسيس الثاني من الطين"، ورد إيهاب عاشور: "إحنا بلد العجايب... ده تدمير بكل المقاييس... فين فرق الآثار وفين التنظيم"، وتابع محمد حسين: "هو ده تمثال رمسيس الثاني بس متدغدغ من الركنة شوية".
كده يا مصر
وقالت رضوى محمود: "آه يا مصر تمثال رمسيس الثاني يطلع بونش ولورد مصر انتي لو عمله علينا مؤامرة كونية مش هتبقى كدة ونش يا مصر كده يا مصر"، وأضاف هيما على: "بيقولك تم العثور على تمثال رمسيس الثاني في المطرية الحكومة الذكية جابت لودر علشان تشيله فدمرته خلته قطع".
رمسيس وسيتى
وعلق أحمد شهاب قائلا: "اكتشاف تمثالين ل رمسيس الثانى وسيتى الثانى في المطرية أحدث تقنيات التنقيب عن الآثار.. اللهم لا اعتراض"، ورد أحمد خطاب: "اكتشاف تمثالين ل رمسيس الثانى وسيتى الثانى في المطرية ماذا فعلت بحياتك يارمسيس حتى تشرب من مجاري المطرية 7 آلاف سنة".
وتابع شريف دياب: "لقوا تماثيل في المطرية.. راحوا جابوا لودر يحفر ودي كانت النتيجة دماغ رمسيس الثاني في حتة وجسمه في حتة.. مريبة أوي".
رمسيس زرجن
وقال إسلام أحمد: "تمثال رمسيس الثاني زرجن شوية مع الحكومة قاموا مكسرين رأسه"، وأضاف محمد إسماعيل: "رمسيس مرضيش يعترف مخبي بقية أصحابه فين فكسروا دماغه"، وعلق محمد أيمن: "أنت متخيل لو الفراعنة عايشين دلوقت كانوا حلفوا ما في حد فيهم يضرب مسمار في تمثال له"، ورد وليد عصام: "أقاموا عليه الحد عشان كافر".
وسخر أبانوب نادر: "ههههههههههههههه يا نهار ضحك... أنبوبة أمير بقى والزق راسه".
أم الدنيا
وقال حاتم حميدة: "اكتشفوا تمثالين لرمسيس الثاني في المطرية.. يعملوا إيه بقى جابوا لودر يحفر على التمثال ورشق الحفار ف دماغ رمسيس جابوه حتتين وطلعوا الباقي فتافيت مصر يابشر أم الدنيا".
وعلق جورج إسحاق: "وفي تصريح له من العالم الآخر يقول رمسيس الثاني: هي دي شكرًا اللي بيقولوهالي بعد سبعتلاف سنة حضارة تعبت وشقيت فيها علشانهم.. يطلعوني ببلدوزر من تحت الأرض ويغسلوني بجردل!.. اسفين يا ريس رمسيس".
وأضافت أحجار على رقعة الشطرانج: "يا ريتهم ماكانوا ليقيوا التمثال كان ممكن يكون في أمل إننا نلاقيه في المستقبل في وقت يكون الشعب فيه وعي".