أبين زين

حضرة رئيس الوزارة كلنا عارفين.. المسئولية كبيرة والبشر حاسين.. بكل حاجة ولكن كلهم صابرين.. وسط الغلاء وأنت عارف كلنا ساكتين.. لكن حننطق بقى لو وصلت التموين.. من زيت وسكر ورز وشاى عليه عايشين.. تبقى الحكاية بقى محتاجة مختصين.. يفسروا لنا السبب لأنهم شايفين.. الناس بتصرخ ومش عارفة تروح على فين.. مع ارتفاع كل أسعار السلع في يومين.. والتصريحات كل حبة تقول يامصريين.. الصبر أحسن وسيلة عشان نسد الدين..
ونعود كما كنا سادة بكل الميادين.. وكل هذا صحيح مطلوب بدون تخوين.. لكن برحمة تحس بحاجة الملايين.. من البشر في الشوارع والبيوت قاعدين.. يقولوا حنجيب منين ناكل يا محترمين.. ونفسنا في يوم تجوعوا تحسوا بالجعانين.. الصبر زاد عن حدوده وكلكم فاهمين.. اللقمة والهدمة هما للجميع ساترين..
وأظن فيه ناس بتكسب عندنا ملايين.. وفى البنوك أرصدة حلوة بقى لها سنين.. وأنا قلت كل اللى عندى بدون زعل عايزين.. نسمع إجابة بها إقناع لكل رزين.. مع خطة واضحة وبرنامج وله قوانين.. ونقول لكم لما نفهم باختصار شاكرين.