بالفيديو.. أحدث قصيدة للشاعر الكبير عبد الرحمن الأبنودي "باب المجلس"

عرض برنامج 25 /30 المذاع على قناة "أون تي في" تسجيل فيديو للشاعر الكبير عبد الرحمن الأبنودي، يقدم فيه أحدث قصائده باب المجلس والتي يقول فيها:
إن كان على التمويل.. بالكُوم
كان إيه ورانا الاّ نكوِّم..
بحر الفساد عَلِّمنا العوم
لو عاجز.. القرش يعوِّم
وفيه مصادر للتمويل..
تُخطرش على بالك يا جميل
يِفْرِق فى حاجة ماضينا الزِّفت؟
إحنا ملوك فنّ التحويل!!
جُهَلا.. لكِن نفهم فى الكُفْت
مطرح ما تمشى الريح.. بنميل
نِلْبِدْ فى ساعْةِ الزعبوبة
نِلْبِدْها من «بَابَه» ل«طُوبه»
حافضينها صَمّ وبالنا طويل
ولينا أساليب موصوفة
مِتْجدّدَه ومش معروفة
ولينا فى الإِختفا والِّلفّ
إحنا المهمّ معانا.. الصنف:
بلاش أنا.. فيه ابن اختى
جوز بنتى والاّ أخو زوجتى
فَلِيه حتعمل هُلِّيلة؟
بلاش أنا.. وخُدِ العيلة
ساعات نجيلك عينى عينَك
وساعات نجيك من خلف الصفّ
وإنت جُهْدَك عارفُه قليل
تِتْعب بسرعة وتفلِّس
وادخُل أنا براحتى المجلس!!
2
نقوم ونسبق كل القوم
إحنا ملوك الصلاَ والصوم
ونجْده جاهْزَه للمحروم
حِتّة لحوم أو حَتىَّ هدوم
غاوين نأكِّل ونلبِّس
وبْنسْتَردّ دا كله فى يوم
أول ما نجلس فى المجلس!!
3
وهبنا ربّك صبر عجيب..
نِلْبِد سنة سنتين ونغيب
وتفتكرنا خلاص حنسيب
وإحنا نايمين نُومْة الديب.
وفْ فترة الزَّهْو الغايب..
إحنا مع الخلق.. حبايب:
نسبق تمَلِّى فى كل صلاة
فى الجامع اللى الناس مالياه.
تلاقينا فى كل جنازه
وكل خُطبَه.. وجوازه
والناس معانا وحاميانا
طول ما هِى عاريه وجعانه
فالحِ انت.. ماشى بتألِّس
بكره تشوفنى فى المجلس!!
4
يالله بقى قوم ثُور تانى
يالله يا راجل قوم انزل
وهيِّج الشارع تانى
خلّى العمارات تتزلزل
وارحل: «لجيكا» و«الحسانى»
والعجلة ترجع م الأول
يعنى لا ثوْرة ولا بوْرة
ولا تحتاجوش مِنّا مناورة.
مادام لا تشرِيع ولا قوانين
ولا قلت مين راح يحكم مين
تبقى الحكاية خيال فى خيال
الدين محالف رأس المال
صراع وحوش مش لعب عيال
انتو بتحكمكوا سذاجة
تُقَعوا بدون ما أعمِل ولا حاجة
أنا اللى متعوِّدها أرُشّ
أموالْ وأموالى بتقُش
ما خيِّبتشى ولا مَرّه
أَدخْل أنا وتطلع بره
واسمع خِنَاقاتكو القايمه
والحِسّ بيطَرْطَش عَندى
حماس شديدْ قوى للقايمه
ووقوف شديد ضدّ الَفْردى
وقال مُصِرّ يأجِّلها
ما عاجِلْها يشبه تأجيلها!!
المشكلة مش بنت الْوقت
ولا الحكاية حكاية وقت
فإيه لزوم رفضك دلوقت
والمشكلة اللى انت عاملها؟
تحتج؟ ميت قاضى بيحبِسْ..
وأنا أتوزِن جوه المجلس!!
5
تسمح لى أقولها بالبلدى..؟
مفروض أنا وانت ضِدِّين
واللى يزعَّلنى يا ولدى
يفرَّحك فرحة واتنين.
لكن باشوفك ماشى معاىْ
زى السَّنَد وقت الحاجة
ماشى تملّى معاى إزاى..؟
تبقى لا ضدى ولا حاجة
ضد الحكومة يا بلدية..؟
أنا ضدها ميه الميه..
مش عاجبك السيسى يا ظريف!؟
والنِّت مليتوه بالتخاريف؟
أنا مشى عاجبنى لأنه شريف!!
ودا يعطلنى شوّيه
فحتبقى ضدّى إزاى ومنين
وانت اللى لوجودى مؤسِّسْ؟
أنا بَعَتَّك تِسْتَشْهِد
وانت باعتنى على المجلس!!
6
وإحنا اللى فاكريننا على الرَّفّ
ومال شجَرْنا وفرعنا جفّ
قاريين مقالاتكم بالحرف
وشُغْلانِتْنا نُغُضّ الطَّرفْ
ودولابْنا داير عمرُه ما كفّ
قدام عينيك أو خلف الصف
إحنا عناقيد: جِدّ لإبن
ساعات ناكلها مارون جلاسيه
وساعات نبات على وجبة تِيْن
موجَه.. تِعلِّى.. وتوطىِّ
نبان ساعات وساعات بنكُف.
حسب الظروف السياسيْة
هيه كدا الرأسمالية
فى بلاد شَبَه بلدك ديّه
نضحك ساعات وساعات بنئن
وحتى لو مَحْبُوس فى السجن
عارفها بُكْره تعود ليا
هيه كدا الرأسمالية
فى بلاد شَبَه بلدك ديّة
موجَك بيعلاَ وبيوْطى
حتكرَّرُوا نفس الغلطة!!
بصراحة دَوْشِتْكم بالكذب
ولا انتو جبهة ولا انتوش حِزْب
والحمد لله مش فاهمين
لكُنْتُوا خلّصتوا عليّا
وانت يا إبنى برىء واخد
تقابلها بالوش الواحد
أما احنا.. لينا مليون وش
أساتذة فى تدريس الغِش
نرطُن بوطنك وبوطنى
وإسمنا برضه الوطنى
وبالهداوة حنتلَمِّس
طريق حفظناه.. للمجلس!!
7
والاّ المشايخ يا ابن الناس
على كل بيرْ حَاطِّين كبّاس
فلوس ما تعرفش الإفْلاس
متخصّصه فى إفساد الناس
واللى مِعبِّيها تَلاَلِيسْ
تدخل عليه يعمل قدّيس
وخُطْبته مَتْحَف تدليس
كُلُّه وراه ميت ترسانة
أمريكا فاتحة الدكّانه
فى اللعب تلعب ويانا
وتحطِّنا فى أضيق خانه
وأنت الشريف أبو دمّ خفيف
بتصنِّف الكدب.. خيانة.
مش محترف يا بنى وعَفَوى
ناضلْت لكن بالشَّفَوِى
ورغم عشقك للجماهير
وضدّ لعبة «إِخْطف طير»
وتموِّتك دَمعة لفقير..
لا عرفْت ريف ولا شُفْت صعيد
ولا تعرف الاّ اللّى فى مخك
ومستعد تروح فى حديد..
أو حدّ يتخفَّى يُطخَّك
أما جماهيرك يا أمير
لانت عارفهم ولا عرفوك
شافوك بتخطب يومها سابوك
وراحوا لابُو حِسّ ينَجّسْ..
وشالوه لحد باب المجلس!!
8
من غير لا دَقْن ولا قفطان
ولا كفوف ناقصة صوابع..
حيزحفوا تانى الإخوان
صُحبَه لمجلسْكم الرائع
دى خلق عايشه فى الضلمة
ولا احنا عارفين مين هُمًّ..
زلزال ما شبْعا نْش توابع!!
هل فيه قانون يمنع ذلك؟..
ويمنع التانى كذلك؟
(فتحوها لينا سداح فى مداح
وطريقنا للمجلس.. سالك)
وراح يخش الإخوانى
لكن فى بدلة عِلمانى
ويقولوا: (يحيا عَبْ فتَّاح)!!
بيشغَّلوا تانى النسوان
يدورُوا فيها بيت ورا بيت
ويُبخُّوا فى دماغ أم فلان
ويطلَّعوا فينا العفاريت..!!
لَمِّ البطايِقْ.. والحِلْفَان
كيس رُزّ والا قزازة زيت.
واللى بيحلف ع المصحف
إزاى حيسمع كيت أو كيت؟
لا هو بيقرا جرايدكو
ولا طالْش حاجة فى يوم منكو
قبَض.. وفى الشمس اتشمِّس
أهو دا اللى دَخَّلنى المجلس!!
أما إنتو بقى فَ حَاريَّكُوا
حتَّة مظاهرة تفرَّحْكوا
حتْقَعّدُوا الخيبة فى ريحكو
تتخانقوا قبل نهاية الخط
ودا بيتشال ودا يتحط
حافظين يا سيدى أموركم صَمّ
ما إنتّو اللى حَفْظتونا يا عمّ
تخطب بُحرقَةَ وتتحمِّس
وأنا اللى أدخل للمجلس!!
9
إنت سامحنى بتاع شعارات
واحنا بنسرق شِعاراتك
ونعيش عليها بالسنوات
ومنغنغانا.. وحياتك
خبير شعارات جبَّارة
ما مشيتْش أبداً فى الحارة
وإذا نويت مرّة ورايح
بتمشى وكأنك سايح
لا تعرف اللى عاش أو مات
ولا مين قفل على جوعُه وبات
ولا معاهُمْ فى مُناسْبات
وعاوز الشعب يجيلك
يسمع ويفهم أقاويلك
ويِبْقَى كِيلَكْ مِن كِيلُه
مش إنت ترحل وتجيله
تحفظ معانى مواويلُه
فطبيعى جدا يا حبيبى
فقيرك اللى يغُنى له
يزحف يروح على تمويلُه
اللى يأكَّل عَيَايِلُه!!
وإنت بعيد عنُّه يا وِلْداه
مع إنّك إنت اللى قَتيلُه
إنت اللى محبوس فى قضاياه
وفى السجون بتعيش ليلُه
إنت بعيد عنّه يا وِلْداه
غرقان فى وصفُه وتحليلُه!!
ولا المساهمة دى تِساهِم
ولا إنت م الأول فاهم
وفى عِزّ ما ف دَرْسَك تِدْرِسْ
بُصّ.. تلاقينى فى المجلس!!
10
شعبَك مالوش فى النَّظريّة
وخيبة فى الأيدُولوجّية
بتعومُوا إنتو فى بحر خيال
أما إحنا.. ديتّنا مَصَالِحْنا.
أغراب وبيوحدنا المال
ولو غلطنا يصحَّحْنَا!!
أما إنتو بقى ثروتكو كلام
ووقت فاضى خِفّ تعوُم
لا حداك وِلَدْ ولا عندك بِتِّ
عايش فى سجن الإنترنّت
واحنا بدون تعليم عارفين
فى السوق نِغرَّق ونصَوِّم
أما الجنيه عارفين إمتى
نعُوِّم عليه وامتى (نْعوَّمْ)!!
بحر الفلوس علمنا العوم
لو عاجز.. القرش يعوِّم
وإنت مثقف.. ومفلِّس
ودا اللى دخَّلنى المجلس!!
11
أحزاب دينية واقفالكوا
أُمَّال فاكرنا نسيبهالكوا؟
وبطَّل النخورة يا لئيم
الأسئلة أخرتها جحيم.
ياللّى انت مستنى قرارات
اللّجنة فوق الانتخابات!!
واوعى تفتش فى النّية
دى شُغلتى.. سيبها عليّه
بعد النتيجة مش حاجْلس
حافضل واقف طول المجلس
وأى نور يلمع حاطفيه
النَنّ سِكِن الشيْطان فيه
هيه الفنون دى أصل الداء.
والعلم والعامْلين عُلماء.
لا سيما.. لا مسرح.. لا غناء
والرقص.. مهما قُلْتُوا.. وباء
وحنمنعوها كتاب فى كتاب
كل اللى نال منكم إعجاب
ممنوع بقى التعليم لحريم
طبعاً.. وتَدْيين التعليم
حنقرطس المرأة فى قرطاس
فى معركة ضد الأنجاس
أصل البلاء فى الدنيا حريم!!
12
حجر الطاحون لو لفّ يعود
ما قُدَّامُهْش طريق مسدود
واللجنة ماشيه على يمينها
كأننا اللى جايبنها
كأننا إحنا الثورة
وإحنا اللى حَنْشَكِّل بكره
بيوسَّعوا فى الدايره يا خال
نِصْعب على أجدع خَيّال
تُظُنَّوا دى بقى خدمة لمين؟
ردوا عليَّا يا ثوريين!!
فى اللجنة إنت مالكْش وجود
وفى ذهنها إنت مِش موجود
وانبهِّك برضُه يا سيدى
العدل ده تفصيل إيدى
والحق ع الباطل مسنود
ما هو زمان.. فاكْر الإخوان؟
يومها ابتدوا المحْنَة بْلَجْنة
فيها اللى فرشوا بالأوطان
للبيع قصاد باب الجنة
حتى اللى فاكرينه كويس
خانّنا.. وْبَعَتْهُم ع المجلس!!
13
خاتمة
الدولة لو حتصوغ قوانين
تحمى العصافير م الشياطين
يمكن ساعتها نقول: فاهمين
قالّلى: أسأل الريس قولُّله
إيه انتظارنا لِدَه كُلُّه؟
ناسِينا والا عاملْها بقصْد؟
الشوك نَبَتْ فى ورق الورد
والوقت يجرى ومش حاسّين؟
هل إنت فى النِّيه تأجَّل
لِخطِةْ خرابنا المستعْجِل؟
وافرض وحتى أجّلنا
اللّجنة هيّاها اللجنة
حنتعجِن نفس العجنة
ما هو لو يقود الثورة يا بيه
نفس اللّى يومها ثُرنا عليه
نِدّيه قوى ونحن عليه
نفس الحقوق نفس الفرصة
طب يبقى ثُرنا أصلاً ليه؟
نهاية بايخة للقصة!!
ولا حد يقدر يمنعنا
نحس من تانى الغُصّة!!
فيا فُلان قُولها لفلان:
«لو تانى راح نعمل عميان
الليل حيزحف كما تِعْبان
والفجر راح يهرب مِنّا
ولا بنسمعْ له تانى أدان
والمسألة حتضيع بيننا
ونتوه ما بين لجنة ولجنة
على بال ما تِشكى للريّس
حاكون على باب المجلس!!