موسى قوقى ؟!!

المذيع رمزي الحمزاوي بانفعال شديد: يا خبر أبيض اعتذرت ؟؟؟ دي مصيبة تقيلة قوي !!! طيب أنا هاعمل إيه بكرة بس في الاستوديو والناس والهوا اللي انضرب، مش معقولة... أول برنامج أعمله يقع بالشكل الفظيع ده ! أتصرف إزاي يا ربي ؟!!
المعد موسى قوقي: ولا يهمك يا رمزي بيه... سيبك من النجمة شيماء أبو ضيف اللي ضربت لك الهوا.. دي حتى كانت دمها تقيل جدا على قلبي، أنا هاجيب لك ست ستها.. ولا يهمك يا باشا.. بس نتفق الأول... أيوه اللي أوله شرط آخره نور... أومال..
رمزي الحمزاوي متسائلا: شرط إيه ؟ ونور مين يا موسى ؟! ما إحنا متفقين من الأول إنك هتاخد في الحلقة ألف جنيه وخلاص.. في إيه تاني نتفق عليه ؟!!
موسى بانزعاج واضح: لا... يا باشا.. قوقي.. فوق كل شيء..
رمزي مستغربا: قوقي مين يا ابني ؟!
موسى قوقي موضحا: قوقي يا باشا.. قوقي.. قوقي المالية، فلوسي، يعني.. « my money«
رمزي الحمزاوي وقد أدرك مقصد موسى بعد تفكير عميق: قوقي.. آه... فهمت.. قوقي قصدك بيها «حقوقي».. بس انت حرف الحاء طاير عندك !!، طيب.. يا موسى ما انا فهمّتك أن إحنا متفقين، وانت عارف إن أنا اللي باصرف ع البرنامج ده من جيبي عشان المنتج الضرايب حجزت عليه واتخرب بيته، بس بعد ما كنت أنا خلاص.. سربت الخبر للصحافة والإعلام وما عادش ينفع أتراجع عنه، أو إن البرنامج ما يطلعش؛ لأن اسمي الإعلامي والصحفي اللي بنيته بشقى العمر هايسقط وتتهز مكانتي الكبيرة عند الناس، عشان كده خلي عندك شوية م الأحمر وكمل معايا زي ما اتفقنا وأنا إن شاء الله أول البرنامج ما يطلع للنور وينجح عمري ما هانسى لك الجميل ده وهاتفضل معايا علطول...
موسى قوقي معترضا: يا باشا إن شا الله عن البرنامج ماطلع ولا نجح... وما تبصليش باستغراب كده !! أيوه.. أنا باعتبر الموضوع ده بيزنس، وأهم حاجة فيه أأمن على قوقي؛ مش تقول لي برنامج وكلام فارغ ؟!!
رمزي الحمزاوي وقد صعقته إجابة موسى: أنا ما كنتش عارف إنك إنسان بالوضاعة والحقارة دي يا موسى، وبتستغل الظروف عشان تبني نفسك من دم الآخرين، ماشي وتطلع كام يعني قوقك اللي أنت عايزها عشان ما تهدليش البرنامج يا سي موسى ؟!!
موسى بكل وضاعة: ثلاثة آلاف جنيه في الحلقة..
رمزي الحمزاوي وقد كاد برج من نافوخه أن يطير: انت اتجننت يا موسى ؟؟؟ الضعفين مرة واحدة !!
موسى بعدم اكتراث: قوقي يا باشا.. قوقي..
يضطر رمزي الحمزاوي للموافقة على مطالب موسى قوقي الذي لم يكتف بهذا الأمر بل أصبح يأتي بماكيرات وكوافيرات مجانا موهما إياهن بالمجد والعمل مع النجوم ويحسب أجرتهن مضاعفة على رمزي، وكذلك أصبح يضرب أجرة النجوم في اثنين ويأخذ النصف الآخر له، إلى الحد الذي كاد معه الحمزاوي أن يعلن إفلاسه ليستغل موسى الأمر مرة أخرى ويفرض عليه أن يشترك معه في تقديم البرنامج ويقاسمه المجد المعنوي أيضًا، إلى أن أفلس رمزي الحمزاوي تمامًا بعد أن باع شقته وسيارته وفقد وظيفته أملا في نجاح البرنامج وأن يعوضه ما صرفه في يوم من الأيام، وقد كان موسى قوقي يحتفل في ستوديو أكبر قناة فضائية بأول حلقة له من برنامجه الجديد الذي استوحى فكرته من مشاركته في البرنامج القديم ليفاجأ برمزي المسكين يهجم عليه بعد انتهاء الحلقة الأولى التي كانت مذاعة على الهواء مسددًا له طعنة نجلاء استقرت في قلبه مباشرة وهو يصرخ ضاحكا بهيستيرية بالغة: ها.. ها... ها... أخيرا أخدت قوقي.