نشطاء يقدمون وصفات «إزاي تعيش في مصر» بعد غلاء الأسعار.. رونا: كلوا ورق شجر.. الميجا: اعمل دايت عشان المصاريف مش عشان الدهون.. نبيه: دي معجزة من عند ربنا

شغل تدبير الحياة في مصر، بعد غلاء الأسعار الأخير، عددا كبيرا من نشطاء مواقع التواصل الاجتماعي "فيس بوك وتويتر"، الذين دشنوا بدورهم هاشتاج "إزاي تعيش في مصر"، الذي تصدر تراند مصر على تويتر، وقد قدم النشطاء وصفات لإمكانية التعايش مع ارتفاع الأسعار، في حين نصح آخرون بتفويض الأمر لله.
ورق الشجر
قال عاطف: "مش مشكلة هنعيش ماهو اللي قبلنا عاشوا.. بس زمانا غير زمانهم.. إحنا أيامنا صعبة.. إزاي تعيش في مصر".
وأضاف حسن المايسترو: "لما كانت أي مؤسسة في الدولة بتمر بأزمة كنتوا تطلبوا من الشعب يدعهما.. طيب الشعب بينهار ردوا الجميل.. وادعموه".
وعلق رونا فودة: "إزاي تعيش في مصر.. ورقة وقلم واكتبى ورايا يا ست الكل.. تاخدى جوزك وعيالك وعلى أقرب غابة.. وكلوا ورق الشجر زى ماقال سعدالهلالى.. وألف هنا وشفا".
ورد الدون كاميلوس: "مرحلة صعبة على مصر وهنعديها.. حاول تتقشف شوية كفاياك مصاريف على السجاير والأرف ده.. اركب مواصلات على فكرة الأتوبيس بجنيه و2 جنيه لسه.. خلي العربية للمشاوير البعيدة بس علشان توفر بنزين وزيت وصيانة.. متخرجش كتير مع مراتك أو خطيبتك لأن ده هيكلفك كتير (على فكرة بنات مصر ميعرفوش يعني إيه تقشف).. نوفر شوية في مكالماتنا عندنا برامج كتير بديلة.. حاول تجيب المنتج البديل مش مهم مستورد دلوقتي.. أجل موضوع اللبس ده دلوقتي.. بلاش الشيبسيهات والمولتو والكلام ده.. كل في بيتك أوفر من إنك تاكل بره.. بلاش تفتح فيس بوك علشان هيحبطك جدا جدا.. خليك عملي شوية بلاش تكون عاطفي أو تعيش بنظرية المفروض.. لو قريت سورة سيدنا يوسف هتعرف إزاي تعيش سعيد بأقل الإمكانيات".
كبر دماغك
وقالت أميرة صالح: "إزاي تعيش في مصر.. تكبر دماغك من كل حاجة حواليك".
وأضاف ياسين: "إزاي تعيش في مصر.. زيادة أسعار مستحضرات التجميل 40%.. يعني غم بره البيت.. وسواد جوه البيت.. ويقولك إزاي تعيش".
وعلق ماهر مهران: "الحكومة بتدينى 6 جنيه بدل غلاء معيشة.. وبتسأل إزاى تعيش في مصر!".
وتابع زياد البرنس: "والله ما أنا عارف هعيش إزاي بس كله على الله".
ورد عباس لبن: "إزاي تعيش في مصر زي مابيعيش أي مواطن في أي بلد من بلاد العالم".
تؤخذ الدنيا غلابا
وقال محمد مادي: "إزاي تعيش في مصر.. تؤخذ الدنيا غلابا".
وأضاف أحمد نبيه: "إزاي تعيش في مصر.. دى معجزة من عند ربنا".
وعلق الميجا: "إزاي تعيش في مصر.. تتمشى متركبش مواصلات.. تعمل دايت عشان المصاريف مش عشان الدهون.. تبطل سجاير عشان فلوسها مش صحتك".
روح شغلك مشي
ورد أدولف هنيدي: "تجيب كام ورقة شجر من بتوع سعد الأزهري.. تصحى بدري ساعتين عشان تروح شغلك مشي.. أحلى عيشة.. إزاي تعيش في مصر".
وتابعت جنات الرحمن: "مُقاومتك للحُزن، ومواجهة الحياة بضحك وصخب؟ هي بحد ذاتها بطولة.. إزاي تعيش في مصر".