السيد علي موسى يكتب: أصول الخناق

مفيش بيت خالي من الخناق والخلافات، مفيش علاقة هتعدي بدون مطبات، بس إزاي نقدر بعد كل خناقة لا قدر الله نعدي بالسفينة لبر الأمان من غير ما نكتر فيها الثقوب والكسور اللى تساعد على غرقها.
حتى الخناق له أصول عشان نقدر نحافظ على الود والمعروف، ممكن الخناقة تبقي نقطة بداية مش نهاية.. دول عشر شروط خد بيهم وأنت بتتخانق عشان ربنا يكرمك
أولا: الانسحاب
مش عيب أن طرفا من الاتنين لما يلاقي التاني منفعل جدا أو فاهم غلط إنك تبعد أو تتجنب التصعيد من باب حرقان الكرامة أو الرغبة في الانتصار أفكاره بالجدال والشعللة.
ثانيا: الستر
أي خلاف أو خناق لازم يكون مستور مش متذاع على الهوا قدام العيال أو الجيران أو حتى الأهل واللى ما يشتري يتفرج وكتر من الفضايح. مش لازم سيرتنا تبقي على كل لسان، الخناق والصوت العالي مش أداة ولا وسيلة للفخر، لعن الله المجاهرين.
ثالثا: فاعل خير
خلي اللي بينكم يفضل بينكم بلاش تدخلوا العناصر المساعدة على الاشتعال وفاعلي الخير وهي تروح تولول لأمها وأنت تجري على صاحبك فصيح تاخد نصيحته إلا لو حد هيتدخل فعلا وقت الحاجة للم الشمل خاصة لو حد صاحب حكمة وعقل انتوا الاتنين متفقين عليه، أحيانا الرغي بزيادة مع حد تاني زي أم الزوجة أو الزوج ممكن يساء استخدامه في موقف أخرى ونبقي هتكنا ستر البيت.
رابعا: الإيذاء
مهما حصل أوعى حد فيكم يكسر التاني وقت الخناقة بكلمة جارحة أو شتيمة أو معايرة بعيب فيه أو لفارق اجتماعي أو دراسي عشان الحاجات دي حتى بعد الصلح بتفضل سايبة أثر في النفوس وبتحجر القلوب.
خامسا: الاعتذار
لو في حد فيكم حس أنه غلطان ومش على حق، صدقوني مش عيب ولا حرام إنك تراجع نفسك وتقول أنا آسف، حقك عليا، أنا كنت فاهم غلط، بس اختار الوقت المناسب.
المهم بلاش الوقت يطول ومتخليش الطرف التاني نايم وهو زعلان منك وواخد على خاطره.. يا عالم جايز متلحقش تراضيه ويكون فات الآوان، خلوا آخر لحظة في اليوم هي أسعد لحظة.
سادسا: التفهم
مهم أوي إنك من خلال العشرة تحاول تفهم طباع شريك حياتك وقت الغضب عشان تعرف تدير الموضوع في حجمه وما يوصلش لعواقب ممكن توصل للإيذاء البدني، يعني لو عارفة أن جوزك عصبي ومتهور بلاش تفضلي تشعللي فيه وتزودي البنزين على النار.
الراجل وهو متضايق أو مشغول بيحب يدخل الكهف بتاعه ويقفل على نفسه لحد ما يفك مش محتاج من مراته إنها تركب على دماغه بالزن واللح والأسئلة، سيبيه لما يروق.
الست لما بتكون متضايقة بتحب الفضفضة وتحب أنك تنصت ليها باهتمام من غير نقد أو سخرية.. جربوا تفهموا طباع بعض هترتاحوا، بالحوار الدنيا تبقى أسهل.
سابعا: اكتشاف مناطق الحب
الخناق ممكن يبقى وسيلة ذهبية للتعبير عن مشاعر حب مدفونة بس محتاجة فرصة المهم نختار الكلام الطيب والعتاب الرقيق اللى يهدي النفوس ويلين القلوب ويدينا فرصة نستكشف مناطق خاصة لينا في قلوب بعض مكانتش بتظهر في الظروف العادية.
ثامنا: الاحترام
مهم أوي لو اأمور اتصعدت ودا وارد جدًا إنك تحافظ على شكل شريك حياتك خاصة قدام الأهل والأصحاب وأكيد وخصوصا قدام الأولاد بلاش تقطع في بعض ونشوه كل حاجة جميلة. ربنا بيقول.. ولا تنسوا الفضل بينكم.
اتخانقوا وانفصلو بشرف واحترام
تاسعا: خليك سفنجة لو ينفع
مش عيب ولا يقلل منك إنك تبقى السفنجة اللى تمتص صدمات الخناق وأنك تكون الصدادة اللى بتحمي البيت والعلاقة من عصف الغضب والتهور الناتج عن الخناق.
عاشرا: الابتزاز
بلاش عند ومكابرة لمجرد أنك الراجل أو إنك أم العيال وبلاش ناخد الخناق وسيلة لتحقيق غرض أو تصفية حسابات قديمة وتحجيم الطرف الآخر. أو إن حد يستخدم العيال مثلا ورقة ضغط عشان يبتز بيها الطرف التاني مش عشان بتحبك وملهاش غيرك إنك تكسرها وتيجي عليها.. رفقا بالقوارير، خلوا الخناقة في حجمها وحوالين موضوعها.