كنباوى وكنباوية.. حلقة رقم (35) ..جون ستيوارت وباسم يوسف ومرسى والطيب

دخل كنباوى على كنباوية المطبخ فور عودته من عمله فوجدها غارقة فى الضحك تحدث نفسها:
كنباوية: ياعينى عليك يا مرسى حتلاقيها منين ولا منين؟ الأول التريقة والنقورة عليك كانت مصرى وبالمصرى يعنى حاجة محلى منتج بلدنا لكن دلوقتى التريقة والنقورة عليك بقت بالإنجليزى والأمريكانى والله اتصيت يامرسى وبقيت دولى والتريقة عليك تخطت حدود مصر وراحت قارة تانية.
كنباوى: ايه يا كنباوية هى حصلت تكلمى نفسك؟ فيه إيه يا وليه؟ مالك؟ ايه جرالك؟
كنباوية: مرسى اتبهدل يا كنباوى المذيع الأمريكانى اللى اسمه جون ستيوارت اللى كان باسم يوسف بيقلده اتريق على محمد مرسى فى البرنامج بتاعه ومسخره وعيب على نطقه للإنجليزى وعلى ألفاظه وعباراته وتشبيهاته وقال: إن دى مش لغة رئيس وتسائل هل فعلا محمد مرسى هو رئيس المصريين ولا دى إشاعة واليوتيوب نشر الحلقة والناس كلها اتفرجت عليها وبقت فضيحة مرسى بجلاجل وبقت جرسه بحناجل وتضامن جون ستيوارت مع باسم يوسف وقال أنا عملتها قبله وماحدش استدعانى للتحقيق وإن اللى بيحصل فى مصر ده مهزلة أن رئيس يخاف من برنامج كوميدى ومذيع كوميدى ويحاول تهديده بالحبس والتحقيق معاه وطلب ضبطه وإحضاره.
كنباوى: ده كده مرسى اتبعتر واتمسح بيه الأرض وبقى فرجة ومسخة مالهوش حق المذيع ده يعمل كده مش كان كفايه على مرسى تريقه باسم يوسف والعيال اللى بتتريق عليه على الفيس بوك وتويتر وتريقه المصريين فى البيوت والشوارع
كنباويه: هو اللى جابه لنفسه حد قاله يوافق يبقى رئيس ده كان كبيره شيخ غفر أو خوجه فى مدرسة بنات أو مدرس الزامى يدى العيال حصص ألعاب وثنى مد ده كان اخره مش يكون رئيس جمهورية ده حتى عيب علينا احنا يا مصريين اننا نقبل الوضع ده ونقبل أن مرسى يكون رئيسنا ده إهانة لينا ولتاريخنا ولسمعة مصر.
كنباوى: عندك حق ده جاب لنا العار بين الدول مش كفايه حكومتة الفاشلة والخراب اللى احنا فيه والطين اللى احنا شايلينه من يوم ما مسك الحكم كمان يتريقوا علينا الأمريكان لا ده كده كتير اوى ومرسى لازم يرحل.
كنباوية: عرفت كنت بكلم نفسى ليه ياكنباوى ليا حق ولا ماليش حق اكلم نفسى؟
كنباوى: لأ كده ليكى حق تكلمى نفسك
كنباويه: أنت عارف ياكنباوى الناس بتقول فى الشارع إن الإخوان ليهم دخل كبير فى موضوع تسمم طلبة المدينة الجامعية بتاعة الأزهر دى.
كنباوى: وايه اللى حيعود عليهم من تسمم طلبه أبرياء مالهمش ذنب فى حاجة؟
كنباوية: حيعود عليهم يشوهوا صورة الطيب ويحاولوا يشيلوه علشان هو واقف ضدهم ورافض لقانون الصكوك حبوا يتخلصوا منه بالطريقة
كنباوى: ياولاد الهرمة هى الحكايه كدة؟
كنباويه: وأكتر من كده دول قادرين وملاعين يقتلوا القتيل ويمشوا فى جنازته ومايقدر عليهم غير ربنا
كنباوى: المفترى والظالم ليه يوم ياكنباوية وبكره يظهر الحق ويبان قومى بقى اكلينى علشان انا جعان ونفسى اتفتحت اكتر لما عرفت أن الأمريكان اتريقوا على مرسى وبقى ملطشة الغرب.
كنباويه : عنيا دقايق والأكل يكون جاهز ياقلبى
كنبياوى : تسلميلى ويسلملى قلبك يا حياتى