كلمة ونُص

المنظر:(شارع بوسط البلد.. سيد وصديقه مصطفى الثلاثينات من العمر يتسكعان بلا هدف.. تقترب منهما سيارة ميكروباص مرسوم عليها تليفزيون).
مصطفى: دي شكلها عربية تليفزيون؟
سيد يدَوَّر الجري مبتعدا عن المكان
مصطفى "بدهشة": بتجري ليه يا سيد؟!
سيد: عربية الجزيرة.. اجري يا مصطفى.
مصطفى "ضاحكا": ارجع ياله دا تليفزيون مصري.
سيد "عائدًا يلهث": الحمد لله.. كنا هانلبس قضية تخابر.
يغادر عربة التليفزيون رجل بيده لافتة مكتوب عليها "مسابقة سوبر دونْكِي"..
المذيعة: مشاهدينا الكرام أهلا بكم من الشارع المصري، في أولى حلقات مسابقة "سوبر دونكي"، لسعداء الحظ أصحاب الذكاء الناري.
سيد "هامسا لمصطفى": مش دونكي يعني حمار برضه؟
مصطفى: هششش.. ما لناش دعوة.. التليفزيون لو قال دونكي يعني أسد، خلاص يبقى أسد..المذيعة تقترب من سيد: ومع أول متسابق.. نتعرف عليك؟
سيد: اسمي سيد.
المذيعة: لازم اسمك الرباعي لأن لو أسعدك الحظ هاتكسب مليون جنيه.
يسقط سيد مغشيا عليه، ويحاولون إفاقته، وبعد أن يسترد وعيه يبكي بحرقة
المذيعة: سلامتك يا سيد، لكن ليه بتعيَّط بحُرْقَة؟!
سيد "باكيا": نسيت اسمي.. "ما زال يبكي"، رن على أمي يا مصطفى واسألها اسمي الرباعي إيه.
مصطفى ينصت للموبايل: تمام تمام.. سيد محمد أحمد زكي..
المذيعة: إنت خريج إيه يا سيد؟
سيد: خريج كلية آداب والله العظيم، وليا عشر سنين متخرج ومش لاقي شغل.
المذيعة: وكنت قسم إيه؟
سيد: قسم ضُهْر.
المذيعة "باستنكار وغضب": ستوب تصوير.. نعم يا روح أمك!.. أنت هاتهرج؟!.. يعني إيه قسم ضُهْر؟!!
سيد: ليه الغلط يا فندم؟.. قسم ضهر لأن كل المحاضرات بعد صلاة الضُّهْر.
المذيعة: صحصح معايا دول مليون جنيه يا سيد.
يسقط سيد مغشيا عليه للمرة الثانية ثم يفيق
المذيعة "بدهشة": تاني مرة يغمى عليك.. إنت عيان؟
سيد: لأ، أصلي كل ما أسمع المليون ما أحِسِّش بحاجة.
المذيعة: أوك ركِّز بقى.. إنت خريج قسم إيه؟
سيد: تاريخ.. قسم تاريخ.
المذيعة: من حسن حظك.. لأن معظم الأسئلة في التاريخ.
المذيعة: أول سؤال.. من هو العالم المصري صاحب جائزة نوبل؟
سيد "بسرعة": أحمد شوبير.
المذيعة: هانعتبرها صح.. بس هو الدكتور أحمد زويل.
المذيعة: من أول مصري أصيب بإنفلونزا الفراخ؟
سيد: الأستاذ الكبير بشير الديك.
المذيعة: الله على سرعة الرد والبديهة الحاضرة.
المذيعة: تعرف تكمل مقولة رائعة بتجسد الوحدة الوطنية.. "الدين لله".. وإيه باقي الجملة؟
سيد: الدين لله والوطن جريدة يومية مستقلة.
المذيعة: برافو.. فعلا الوطن جريدة يومية مستقلة.
المذيعة: سؤال بمناسبة نصر أكتوبر.. في أي عام كان انتصار مصر في حرب أكتوبر73؟
سيد: 73.
المذيعة: مين العالم صاحب نظرية النسبية؟
سيد: أنِيشْطَه.
المذيعة: بس دي عالمة، ماشي.. طب ما جنسية أينشتاين؟
سيد: ليبي.
المذيعة: تصقيف يا جماعة.. سيد بطل السوبر دونكي.
المذيعة "بيدها حقيبة": دول مليون إلا 400 ألف ضرايب.
سيد "يلتقط أنفاسه بصعوبة شديدة وكأنه يحتضر": شوية مَيَّه.. شوية ميَّه يا جماعة.. مش مهم الربعميت جنيه ضرايب، خدي كمان 200 باكو للبلد.. تحيا مصر تحيا مصر.
المذيعة: مصري أصيل يا سيد.. على العموم هاننتظرك في التليفزيون، هات معاك 600 ألف جنيه عشان تاخد المليون ماسكة بعضها.