ضباط الشرطة الشرفاء

للأسف هذه كتبت منذ فترة طويلة وكان وقعها أفضل في السابق، لكن لايوجد ما يمنع من نشرها الآن وإن كان من الواضح أنه فعلاً هناك أتجاه لتنقية جهاز الشرطة من المفسدين:
في حاجه ممكن يكون ناس كتير واخدين بالهم منها أو مش واخدين مش فارقة، المهم إني مخنوق منها شوية، كل ما أفتح التلفزيون على قناة مصرية "قليلاً ما يحدث طبعا" المهم يعني الاقي مذيع أو مذيعة جايبين جوز ظباط شرطة جمال وحلوين كده ومعاهم لواء ولا اتنين على المعاش يعني صغننين في السن، المهم يفضلوا يتكلموا عن تعبهم وإنهم واقفين في الشارع ياعيني طول اليوم وبيشموا يا حبة عيني دخان العربيات، أصل المواطن الغلبان وإنتم سيد العارفين معاه إسطوانة أكسجين على ضهره ومش بيشم دخان زيهم. وقال ايه مرتباتهم صغيرة كأنهم بيدفعوا فلوس في حاجه علشان ياخدوا مرتبات أصلاً، أو كأن كل واحد فينا بيقبض ميت ألف اخر الشهر وهما لا, المهم يعني يحكوا ازاي إنهم بيشتغلوا كتير ومضغوط عليهم يا عيني، وبيتعبوا كأن باقي الشعب قاعد على لامؤأخذه ........ وبياخد فلوس. طيب يا عم التعبان المكافح ماشي أيها الضابط الغلبان اللي مش لاقي ياكل, هوه إنت يا ننوس عينك لما دخلت كلية الشر...... أسف أكاديمية سيدك للأمن كنت داخل ليه؟ مش علشان البدلة وعلشان تعرف تمشي كل حاجة وتبقى سيادتك واسطة؟ مش علشان تبقى سيد الناس زي ما بيقولولك جوه؟
ولا نزل عليك الوحل بالليل وقالك إنت لازم تدخل كلية الشرطة علشان تحمي الناس؟ يعني ده فعلاً سبب دخول الكلية؟ طيب ولما تعبت في الشغل ومديرك أو القائد بتاعك طلع دين أمك أنا مالي؟ يطلع عليا أنا ليه؟ طيب بتتعب وتكفرني معاك رغم إني مليش فيه وغصب عني بستحمل. لما بتاخد مكافئة بشوف منك معاملة عدلة يعني؟ كلها حجج فارغة, طيب لما جيت تدخل كلية الشرطة مش دافعلك كام ألف جنيه لواحد علشان يدخلك؟ بلاش والنبي العبط ده علشان ده كلام أهبل والهدف منه الضحك على الناس الهبلة, لغاية دلوقتي مش قادرين تفهموا إن الناس بدأت تشغل مخها ولسه ببتعاملوا معاهم على إنهم أغبياء وسذج. وبعدين مرة واحدة أصبحتم تعبانين في حياتكم؟ الكلام ده متقالش قبل كده ليه يعني؟ ولا حسيتم مرة واحدة؟ لا وإيه تخرجوا في مظاهرات سلمية دي مسخرة والله, ده أنا ضحكت ضحك على الموضوع ده. تخيلت كل مواطن ماسك قنبلة دخان وشومة والظباط بيجروا ويقولوا "حرية.....حرية" وهوه يجري وأنا أجري وهوه يجري وأنا أجري. حقكم دلوقتي تعملوا مظاهرات؟!!!! وإحنا لما نعمل مظاهرات تضربونا وتقبضوا علينا.؟ لا وإيه يقولك إحنا إخواتكم!!!! يا سلاااااااااااااااااااااام حلوة دي فعلاً إخواتنا منكرش بس يعني إفتكرت دلوقتي؟ على العموم غلبان مش غلبان مش فارقة كذابين ومنافقين ويوم ما يقدروا يعملوا فينا زي الأول حيعملوا. كان نفسي أكتب اكتر بس مديري لو شافني حيعلقني أصلي برضه يا عيني بشتغل تمن ساعات في اليوم متواصل تخيلوا؟
بقلم: حسام عصام الدين