محمد الجبالي يكتب: إحنا آسفين يا حطب.. إحنا آسفين يا عبد العزيز

بعد كل ما قيل بالأمس في مؤتمر رئيس اللجنة الأوليمبية هشام حطب، ووزير الشباب والرياضة خالد عبد العزيز، يجب الاعتذار عما كتبته من انتقادات عنيفة حول مشاركة بعثة مصر في أوليمبياد البرازيل.
كما أنني أطالب الأخ والزميل الفاضل زغلول صيام نائب رئيس تحرير فيتو رئيس القسم الرياضي بالذهاب إلى الشهر العقاري لتوثيق اعتذار مكتوب وتقديمة إلى كل من هشام حطب وعبد العزيز يتأسف فيه عن كل ما كتبه خلال الفترة الماضية من حقائق وفضائح وانتقادات منطقية قبل وبعد مشاركة مصر في هذه الأوليمبياد.
وكما توقعت تماما، خرج علينا رئيس اللجنة الأوليمبية ووزير الشباب والرياضة ليؤكدا أن نتائج مصر مبهرة في المونديال وأن ما تم صرفه من ملايين للإعداد "كلام فاضي" وأن المشاركة لم تشهد مجاملات.
وعلى غير المتوقع وجدنا حطب وعبد العزيز ممسكين بأوراق جاهزة و«متظبطه» تماما للرد على كل الانتقادات وكأن مصر حصلت على المركز الأول في عدد الميداليات في هذه الدورة.
وأعتقد أن ما حدث في المؤتمر الصحفي أمس هو بمثابة الفضيحة مكتملة الأركان وتستوجب المحاكمة العلنية أو على الأقل أن تتحول مصر إلى زيمبابوي لمدة يوم واحد، حيث إن رئيس هذه البلد اعتقل كل من شارك في الأوليمبياد لمساءلتهم وعددهم 31 لاعبًا مثلوا البلاد في الأوليمبياد، وجاء قرار رئيس زيمبابوي بعد فشل البعثة في تحقيق أي ميدالية في ريو دي جنيرو.
وبما أن المؤتمر الصحفي خرج بهذا الشكل الذي كشف كيف يتعامل أكبر مسئولين عن الرياضة في مصر مع العقول فلابد أن أقدم اعتذاري وأقول:" إحنا آسفين يا حطب.. إحنا آسفين يا عبد العزيز.. إحنا آسفين يا مصر".
** إحنا آسفين علشان مصر حققت 3 ميداليات ليس بينها ذهب وهو بكل تأكيد وفقًا لكلام كبار المسئولين عن الرياضة في مصر التي بها 90 مليون بني آدم إنجاز بكل المقاييس.
** إحنا آسفين علشان إعداد البعثة للأوليمبياد كان بجنيه وربع ومش بالملايين.
** إحنا آسفين علشان محصلش أي مجاملات في السفر وكل اللي سافر كان يستحق السفر.
** إحنا آسفين علشان لجنة تقصى الحقائق من أعضاء البرلمان سافروا على حسابهم وليس على حساب اللجنة الأوليمبية وكمان منزلوش في القرية الأوليمبية بالبرازيل مثل اللاعبين ومع البعثة.
** إحنا آسفين علشان الصحفيين اللي كانوا معتمدين ستة فقط وبالباقي سافر واتبهدل ومكنش مسموح ليه يدخل المبارايات بل كان بيتابع من الفندق اللي كان فيه إفطار بس والنت ب10 دولارات.
** إحنا آسفين علشان تصريحات الوزير ورئيس اللجنة الأوليمبية المصرية كانت بتقول قبل السفر إننا رايحيين نتفسح وخلاص.
** إحنا آسفين علشان لازم نشوف نص الكوب المليان بتاع وزير الشباب والرياضة.
** إحنا آسفين علشان الإعلام الرياضي أصبح أغلبه يعيش تحت رعاية وإشراف الوزير الهمام.
** إحنا آسفين علشان البلد فيه مشكلات كتير ومجتش على مشاركة بعثة مصر في الأوليمبياد.
** إحنا آسفين علشان الفلوس اللي اتصرفت في الأوليمبياد مش من أموال الشعب.
** إحنا آسفين علشان إحنا مؤهلنا مشكوك فيه وموقفنا من التجنيد مشكوك فيه وكل ده ولا حد يقدر يكلمنا
** إحنا آسفين علشان إحنا اللي بنخاف من رئيس نادي ماسك علينا بلاوي سودا
** إحنا آسفين علشان لازم نعرف ونفهم أن كلام الوزير ورئيس اللجنة الأوليمبية قرآن لازم نصدقه وممنوع النقد
** إحنا آسفين علشان الجهات السيادية أصبحت هي اللبانة اللي بنخوف بيها الناس.
إحنا آسفين يا مصر... والله آسفين... إزاي نقول إن بعثة مصر فشلت وعايزن نعرف الفلوس دي اتصرفت فين وإزاي.. إزاي نقول كده أصلا... هو إحنا مش عارفين أن البلد مفيش حد بيتحاسب فيه غير الغلبان... وحسبي الله ونعم الوكيل.