طلاب الثانوية: بداخل كل منا مرسي بيرجع في كلامه أول ما يبدأ مذاكرة

"أوباااا الامتحانات قربت قوي، لما أقفل النت والموبايل وأقوم أذاكر شويه، اممممممم لما أجيب حاجة أشربها وأنا بذاكر، اممممممم لما أجيب حاجة أكلها وبعدين أذاكر، آآآه أنا تعبت قوي يا دوب أقوم أنام بقى وبكرة أكمل"، كانت هذه أحد تعليقات شباب "فيس بوك" حول اقتراب موعد الامتحانات، وتحول البيوت المصرية إلى معسكرات، يقوم فيها الآباء والأمهات بدور "غرفة العمليات"، والإخوة الكبار بدور"حرس الحدود"، ومع ذلك لا يستطيع الشباب الابتعاد عن الجلوس على الإنترنت في ظل هذه الأحداث السياسية الساخنة، لتمتلئ صفحات ال"فيس بوك" بالنكات والتعليقات الساخرة، "فيتو كافيه" رصدت تعليقات الشباب ...
رامي محمدين: حكمة اليوم ..لو المذاكرة مضيقاك..دور على حد يغش معاك
سمية عارف: عرفتوا ليه تم تأجل يوم نهاية العالم إلى شهر فبراير.. بسبب امتحانات نص السنة
وكل نهاية عالم وانتو بخير
حسام منير: المجد لكل واحد مايعرفش عنده إيه في المنهج لحد دلوقتي.
سعيد محمد: جوه كل واحد فينا "مرسي" صغير بيرجع في كلامه كل ما يقرر المذاكرة.
إنجي وصفي: لما باباك يسألك ما بتزاكرش ليه يا إبني ؟، ترد تقوله عبارة "أحمد شفيق" بص يا حاج دي قاطرة بتتحرك وفي حاجة موقفاها هنا دلوقتي، بمجرد إن الحاجة دي هتتعمل القاطرة هتتحرك علطووول.
عادل نبيل : قمة الهدوء : إنك تقرأ مادة مش فاهمها، وقمة الهبل : إنك تقلب الصفحة، وقمة النفاق: إنك تصدق إنك قاعد تذاكر، وقمة الدهشة: إنك تنجح فيها، اللهم ارزقنا الدهشة !.
إسلام محمد : ياااه إحساس جامد قوي لما تقعد على الفيس وإنت مخلص مزاكرة ، بتحس كده ان ضميرك مستريح ياااه إحساس عمري ما حسيته بصراحة.
رنا فؤاد: ذات مومنت" لما حد من صحابك يقولك أنا ذاكرت وقربت أخلص"، تبقى عايز تقوله "النمرة غلط يا عماد".
هادي محمد: ذات مومنت : لما تتصل بواحد صاحبك تشوفه عامل إيه في المذاكرة، فيرد عليك يقولك إيه ده هو إحنا ورانا امتحان ؟، فتروح تسأل صاحبك الثاني ذاكرت للامتحان؟، فيقولك عيب اساحبي إنت كده بتشتمني، فتقول في نفسك الحمد لله ضميري ارتاح.
كريم حسين: نفسي أخلص تعليم بقى وافتح عيادة وأبقى محامي قد الدنيا، وكل مكاتب الهندسة تتخانق عليا، والناس تقول حضرة الظابط جه، حضرة الضابط راح.