حالة حوار

د/عمروعبد السميع : مساء الخير وأهلا بكم في حالة حوارثقافة الانتماء حلقات من هذا البرنامج نستضيف فيها رموزالسياسة والاقتصاد والأدب والفنون والرياضة والإبداعات في كل المجالات لنناقش معهم علاقة الإنسان بالأرض وعلاقة المستقبل بالتاريخ ضيفي اليوم أديب ومبدع كبيرهيكلمكم عن جابريل جارسيا مركيز الحائزعلى جائزة نوبل وهيكلمكم عن عبد الرشيد جعفر صانع الحصير في كفرالشيخ وهيكلمكم عن صلاح جاهين ويحي حقي وفؤاد حداد وآخرين وهيكلمكم عن معركة أولادكم مع التطرف وهيكلمكم عن زمن الرحب والاحتلال والفقر اسمعوا له كويس لان في بعض كلامه ملامح الضمير الشعبي في هذا البلد ويا أيها الشاب الجميل حب بلدك حب وطنك ده الحب بعده مستحيل ,اسمحوا لي أولا ان أرحب بضيفي وضيفكم الأديب الكبير الأستاذ خيرى شلبي وأرحب بأبنائي وبناتي شبات وشباب مصر أهلا وسهلا بكم بقي يا أستاذ خيري احنا عارفين انك دائما لما تتكلم عن جابريل جارسيا مركيز الأديب الكولومبي الذي حاز على جائزة نوبل عن روايه 100 عام من العزلة بتقول ان هناك جوانب شبه كبير وفعلا في جوانب شبه كبير بينكم انتم الاثنين لكن كمان لما كتب مذكراته تحت عنوان ان تعيش لتحكي في الحقيقة ده قذف في ذهني بفكرة معينة أنت عاوز تحكي ايه للشباب دول عايز تحكي لهم ايه عن بلدهم عن مصر ؟
الأديب/ خيري شلبي : هو أنا فعلا وحكيت فعلا وسوف أظل احكي ما بقي لي عمر ان الشباب يكتشف قواه الداخليه الخفية ان هي وظيفة الأدب في رأي وأظن انها رؤية صحيحة هو إيقاظ الطروح لدي الشباب وتبصيرهم بقواهم الخفية لان كل واحد منا فيه طاقة خطيرة جدا بس هو مكتشفهاش مش عارف يكتشفها
د/عمروعبد السميع : ايه اللي يحول بينه وبين اكتشافها ؟
الأديب/ خيري شلبي : المفروض في الدول المتقدمة يخلقوا مناخ لاستكشاف هذه الطاقة عند الأطفال وعند الشباب وعند الرجال ان يبقي المدارس مزودة بعجل مزودة بأنشطة كثيرة جدا رياضية وعلمية وكان زمان على أيامنا في جمعية للخطابة وجمعية للتمثيل وجمعية للصحافة
د/عمروعبد السميع : الأنشطة دي؟
الأديب/ خيري شلبي : كثيرة جدا خلال هذه الأنشطة الناس بيستكشفوا هو ايه يعني في أي نشاط من الكل وبعدين المجتمع نفسه لما يبقي مجتمع صحيح وسليم البدن وصحة كويسة يدي فرص للشباب ان هما يستكشفوا مواهبهم الحقيقية دون ان يفرض عليهم أعمالا بعينها احنا عندنا في مصر كل هذه الأمور ضربت يعني لم يعد في مصر حتي مهد للذكريات لم يعد في حياة البني ادم مننا حين يتذكر طفولته الشباب دلوقتي يجدها مليئة بالبؤس والتعاسة والحجرات الضيقة اللي عمله زي العلب الطفل مش بيلاقي براح يتحرك فيه بل ها ان يكون هناك ملاعب يتحرك فيها ويلعب فيها
د/عمروعبد السميع : أنت مرة زمان قلت ان الفقرينتج طفلا مهلهلا ؟
الأديب/ خيري شلبي : ده صحيح
د/عمروعبد السميع : وان الحرب تنتج طفل عجوز الطفل الموجود دلوقتي أو الشاب اللي موجود دلوقتي مهلهل و لا عجوز ؟
الأديب/ خيري شلبي : لأ الطفل الموجود دلوقتي فعلا طفل عجوزلأنه يحمل الهموم من أول ما يفتح عينية على الحياة يعني أنا فعلا أشفق على أطفال هذه الأيام من كمية البؤس الشديد المكتوبة عليهم وبعدين يا ريت كده بس وهناك جانب القهر والإذلال ان هو يبقي مش كفايه حالة اللي هو فيها لأ ده في نماذج لأنماط من الحياة يراها أمامه كل يوم في الشارع لأطفال مبغددين ولبسين كويس ويأكلوا كويس يتعلموا في مدارس أجنبية ويشوف في التلفزيون أفراح يصرف عليها مئات الملايين في ليلة الدخلة وفساتين زفة ثمن الفستان يقيل عشرة عائلات من عسرتهم ده كله يعمل إرهاق نفسي على أطفال هذه الأيام وعلى شبابها يفقدهم الإحساس بأي انتماء
د/عمروعبد السميع : حضرتك إتولدت في يناير عام 1938 وعشت في اثناء الحرب العالمية الثانية يعني طفولتك كانت المبكرة ؟
الأديب/ خيري شلبي : في أربع حروب في حياتي
د/عمروعبد السميع : قولي بقي الفرق ما بين التجربة بتاعة الجيل بتاعك وده والتجربة بتاعة الجيل اللي عايش دلوقتي
الأديب/ خيري شلبي : تجربة جيلنا رغم ما كان فيها قدر هائل ايضا من البؤس ولكن كان فيها قدراكبر من الأمل والطموح يعني آه كنا بأسين كنا في القرى فرحنا لنتعلم في المدينة ونحن شبه حفاه وكان أبناء المدينة يتريقوا علينا ويخوفونا ويعلموا حركات ويستأهزوا بنا
د/عمروعبد السميع : يقولوا لكم ايه بقي ؟
الأديب/ خيري شلبي : حاجات حركات عابسة كده باعتبارنا فلاحين جايين من القرى يخوفنا بالعجلة يعني يوهمك انه هيخش عليك بها فانت تذعر وتعمل حركات
د/عمروعبد السميع : على اعتبار ان جاي من مجتمع مش فيه الحاجات دي ؟
الأديب/ خيري شلبي : يعني الخ ورغم ذلك كان فيه اتساع للأمل ليه لان فيه قدوات كثيرة جدا قدمنا وفي أنشطة متاحة على انك أنت
د/عمروعبد السميع : مين القدوة اللي كنت شايفها قدامك ؟
الأديب/ خيري شلبي : كان في طه حسين والعقاد ويحي حقي
د/عمروعبد السميع : كنت شايف قدوة أدبية بس ولا شايف قدوات من نوعية أخري؟
الأديب/ خيري شلبي : قدوات في كل المجالات في المدرسة نفسها المعلم كان قدوة
د/عمروعبد السميع : فاكر حد من معلميك ؟
الأديب/ خيري شلبي : جدا
د/عمروعبد السميع : مين ؟
الأديب/ خيري شلبي : يعني أنا اذكر كان عندنا في القرية مدرس الله يرحمه محمد حسن ريشة وكان محمد حسن ريشة هذا مدرس كشكول يدرس اللغة والاشية والصحة والحساب
د/عمروعبد السميع : كل حاجة .
الأديب/ خيري شلبي : والرضي كل حاجة هذا المدرس تكفل بنا في يوم ان هو يعمل دفعة تأخذ الشهادة الابتدائية من مدرسة القرية بعد ان كنا نسافر الى مدينة دسوق
د/عمروعبد السميع : ايه اللي كان يجبره على كده عمل ده بوازع من نفسه كده ؟
الأديب/ خيري شلبي : الانتماء يخلق الواجب الشعور بالواجب ويخلق حب للبلد وحب للأهل يعني ايه يخلي راجل زي ده بعد اليوم الدراسي ما ينتهي يمر علينا في البيوت علشان يطمئن احنا بنذاكر ولا بنلعب وبعدين يأخذنا كده زي أولاده ويروح بنا الامتحان نمتحن الشهادة الابتدائية في مدينة دسوق وينزل بنا في فندق
د/عمروعبد السميع : الأستاذ خيري شلبي من قرية اسمها شباس عميرمركز قلين محافظة كفرالشيخ أتفضل يا فندم .
الأديب/ خيري شلبي : كانت دسوق هي المدينة بالنسبة لنا وينزل بنا في فندق ويقعد ويروح معانا اللجان ولما نروح الفندق يراجع على الإجابات اللي احنا اجبنا فيها وهكذا ولذلك الدفعة اللي هو خرجها أول دفعة تأخذ الشهادة الابتدائية من القرية نفسها كلهم كانوا متفوقين دي ناحية الناحية الأخرى ان هو له الفضل الكبير جدا في حبنا للغة العربية ان هو كان يتقن قواعد اللغة العربية اتقانا كاملا الى حد ان يكون فقيها مش هو لوحدة في الواقع 90% من المدرسين حتي مدرس الألعاب الرياضية كان ايضا يتقن اللغة العربية فألان اللغة العربية أهينت خلاص مع الأسف الشديد المهم هذا الرجل أصلا من القرية وهذا امر أخر وأبوة كان صاحب كتاب لتحفيظ القران الكريم
د/عمروعبد السميع : يبقي من هنا إجادته للغة العربية جاءت من حكايه الكتاب دي ؟
الأديب/ خيري شلبي : آه طبعا ده نموذج من القرية وبعدين لما شاف ان أهلينا كلهم فقراء ولن يستطيعوا مواصلة التعليم للجامعات الخ فقرر يلحقنا كلنا بمعهد المعلمين العام 4 أو5 سنين ويتخرج الطالب يبقي مدرس وده كويس قوي فخد ورقنا جميعا وذهب بها الى مدينة دمنهور وقدم
د/عمروعبد السميع : ده كان يدير شئونكم كلها تقريبا ؟
الأديب/ خيري شلبي : تماما كأنه أب أوأكثر من أب يعني في أباء من بعض أبائنا فلاحين مكنوش متحمسين قوي لمواصلة التعليم وهو لم يكن يتورع عن انه يشخط في الأب ويقول له اسكت أنت ايه عرفك أنت متتكلمش ده مش ابنك
د/عمروعبد السميع : كان صاحب رسالة يعني ؟
الأديب/ خيري شلبي : صاحب رسالة وقوي وعنده روح معنوية عاليه جدا
د/عمروعبد السميع : طيب من الأستاذ محمد حسن ريشة أنا عاوز انتقل منك الى اسم أخر في قرية شباس عمير وهو عبد الرشيد جعفر جارك صانع الحصير ماذا تعلمت من عبد الرشيد جعفر ؟
الأديب/ خيري شلبي : ده عبد الرشيد جعفر ده كان راجل صانع الحصير وبيته كان جنب بيتنا مباشرة وأنا طفل في حوالي الرابعة أو الخامسة تقريبا من العمر كان يلفت نظري أي تكوين يعني أي سرادق فانا شوفت ان هو ناصب النول على الأرض النول بتاع الحصير برضه لأنها نسيج ايضا بس بدل الخيوط أعواد الثمر اللي هي البردي بيسميها الفراعنة ويشق عود البردي يعمل منه شرائح رفيعة وفي النول منصوب على الأرض خيوط دوبارة وآلة يشدها تدك يقوب شريحة البردي بين خيوط الدوبارة ببراعة شديدة جدا تكاد لا تري يده ويشد الحامل ده زي النسيج بالظبط فانا كان يقلب لبي هذا المنظر فكنت أروح اقعد أتفرج عليه وهو يشتغل ويجبني حلم اني ابقي صانع حصير زيه
د/عمروعبد السميع : مجربتش الحكايه دي أبدا مجربتهاش أبدا ؟
الأديب/ خيري شلبي : أنا أتعلمت حاجات كثير جدا وأنا طفل عندنا صنعة في اليد أمانا من الفقر هذا دستورعندنا في القرية آه أتعلم بس بعدما تخرج من المدرسة تروح الدكان اللي تتعلم فيه النجارة أو الخياطة
د/عمروعبد السميع : أتعلمت ايه بقي ؟
الأديب/ خيري شلبي : أتعلمت كل ما يخطر على بالك يعني النجارة والخياطة المكواه وبياع في محل بياع سريح في أسكندرية
د/عمروعبد السميع : وحكايه الحصر دي مشتغلتهاش ؟
الأديب/ خيري شلبي : لأ معرفتش اتعلمها
د/عمروعبد السميع : مكنتش بتتكلم مع عبد الرشيد جعفر اثناء وهوبيشتغل ؟
الأديب/ خيري شلبي : كان بيحصل ايه بقي هو الراجل ده كان راجل لطيف جدا وله أخ مدرس وهو زمان كان اللي يتخرج من المدرسة الإلزامية اللي هي أربع سنين كانوا بمقام اللي يتخرج من الثانوية العامة ويمكن أحسن يبقي عالم بكل ما هو مطلوب للحياة انه يجيد الكتابة ويعرف قواعد اللغة العربية ويجيد الحساب ويجيد متابعة الأحول العامة في السياسية الخ وهذا الرجل كان يقرءا الجرنال وهو يشتغل
د/عمروعبد السميع : يا سلام يا سلام
الأديب/ خيري شلبي : آه يرمي الجرنال مفتوح كده وهو بيشتغل وأيده شغالة وعيونه على العنوانين وشوية ويروح فاتح الصفحة فكان دي برضه دربة تلفت نظري وحاولت أقلده فيها أننا يعني مضيعش وقت يعني محتجش ان مفيش وقت
د/عمروعبد السميع : يعني تعمل عملين في نفس الوقت ؟
الأديب/ خيري شلبي : لحد هذه اللحظة عمري ما اعتذرت بمقولة إني مفيش وقت لان الواقع ان هناك وقت ووقت طويل جدا ولكننا نتفنن في إهداره مجانا
د/عمروعبد السميع : ده اللي أتعلمته من عبد الرشيد جعفر ؟
الأديب/ خيري شلبي : ومن غيره فكان مستدرجني هو كان فيه حتة شقاوة كده يعني يحب يستدرجني احنا كلنا ايه النهاردة أو عين الضيوف اللي حولنا النهاردة فانا كنت اقعد أقوله حاجات لما افتكرها دلوقتي اندهش جدا يعني أزاي ده يخطر على بالي فقوله مثلا جلنا ضيوف من بلد جنب بلدنا علتنا مقسمة على بلدتين فيجي لنا الضيوف من بلد اسمها الشقة تبع كفر الشيخ برضه فقول له ان الضيوف جهم والركايب بتاعةهم طلعتنا في الدورالثاني في المقاعد في القرية في الطابق الثاني من البيت نقول عليه المقاعد نسميه المقاعد وربطناهم فوق في المقاعد مع ان ده مستحيل ان البهائم تطلع سلم
د/عمروعبد السميع : تطلع فوق ؟
الأديب/ خيري شلبي : وتروح فوق وأشياء من هذا القبيل
د/عمروعبد السميع : يعني بتسرح به يعني ؟
الأديب/ خيري شلبي : فهوعلى فكرة تشجيعه ليه وإظهاره
د/عمروعبد السميع : هنا الخيال بدء بقي ؟
الأديب/ خيري شلبي : آه إظهار ان هو مصدق لما أقول كان يشجعني لكن الفضل الأكبر يرجع الى مندرتنا
د/عمروعبد السميع : لكن أنا عاوز أقف عند دي شوية يعني الخيال الأدبي بدء بأنك بترسح بعبد الرشيد جعفر وترضي فضوله بحكايات غير حقيقية
الأديب/ خيري شلبي : بحكايات مختلفة ومعرفش كانت تيجي أزاي مندرتنا كانت محفل في الصبح لغايه الضحى قراءه جرائد العصر قراءة أبو زيد الهلالي وعنترة
د/عمروعبد السميع : شوفو يا أولاد الأستاذ خيري بيتكلم على القرية أزاي أستاذ نجيب محفوظ مرة قالوا له أنت ليه مكتبتش حاجة عن القرية فقال لهم اكتب عن القرية وخيري شلبي موجود وتشوف التفاصيل اللي بيحكي لكم دي هي اللي شكلت وعية هي اللي شكلتن تجربته أتفضل كمل
الأديب/ خيري شلبي : بالليل بقي تحتدم مناقشات بين الحضور ليه ابن عم شيخ أزهري وأبوية أصلا شاعر محط سياسي ومحبط
د /عمروعبد السميع : ليه محبط ؟
الأديب/ خيري شلبي : لظروف طويلة يعني يصعب
د/عمروعبد السميع : كان سياسي في ايه بالظبط ؟
الأديب/ خيري شلبي : كان حزب الوفد كان عضو مؤسس وليه ابن عم شيخ أزهري وجوز بنت عمتي شيخ أزهري وكذا واحد ويجتمعوا بالليل في المندرة ويحتدم النقاش حولين كلمة معينة في الحديث الفلاني أو في الايه الفولانية ويبدو انه هتقوم خناقة طرب بعد دقائق وناس تنجري على الدواليب اللي في بيت ابن عمي ده تجيب كتب وتخبط عليها وتقول
د/عمروعبد السميع : علشان يثبتوا لبعض حاجات ؟
الأديب/ خيري شلبي : علشان يثبتوا التنوين هنا جائز ولا مش جائز وكيف تنطق هذه الكلمة أو لا تنطق دي حاجة توريك أتولدت أنا في مهد اللغة العربية ولذلك اعشقها عشقا وأدافع عنها ضد أي ادعاء بان هي غيره قادرة على نقل العلوم لأ ده احنا اللي غير قادرين على استيعابها لأنهم لو فردوا رسائل أخوان الصفت سيجدوا ان كل حاجة في الدنيا لها اسم في اللغة العربية
د/عمروعبد السميع : قول للأولاد بسرعة ايه رسائل أخوان الصفت ؟
الأديب/ خيري شلبي: أخوان الصفت دول كان مجموعة من المفكرين والأدباء في القرن الرابع الهجري تقريبا أو الخامس الهجري منهم أبو حيان التوحيدي مثلا لهم نشاط ثقافي خاص بهم هما لأنه قد يتعارض بعض أفكارهم مع الأفكار السائدة يعني هما من الفرق الإسلامية المجددة الطموحة الفاعلة الايجابية يعني فلهم رسالة في الكيمياء رسالة في الصوت رسالة في الموسيقي رسالة في علم الاحياء يعني خمس مجلدات كبار جدا نفهم اللغة العربية إذا كان ربنا سبحانه وتعالي على ادم الأسماء كلها ودي أعظم نعمة انعم بها على ادم ان علمه الأسماء كلها فتجد ان اللغة العربية فيها الأسماء كلها كل شيء حتي ذرات الهواء كل شيء له اسم وأذن هي نقلت رسالة الصوت مثلا والموسيقي وتعريفهم للصوت ما هو
د/عمروعبد السميع : يعني متجاوبة مع الضرورات العلمية بأكثر من غيرها ؟
الأديب/ خيري شلبي : آه نشأت في مهد للغة العربية كان بقي يجي قراءة السيرة الشعبية دي حكايه طويلة هي الأخرى كيف تعلمت بدأت أقرأ لهم بدل اللي كان بيقرأ وأنا في سن التاسعة تقريبا أو العاشرة كان عندي فضول شديد جدا نشا أزاي لما هي اللي كشفوه فيه يكونوا قاعدين في المندرة العصر مثلا بيننا وبين الشارع العمومي جسر طويل فعوزين يعرفوا ايه الهيصة اللي بره دي فيكون واحد جاي من بره يسالوه هو حصل ايه يا فلان بره فيقول لهم لا ده فلان قال لفلان ايه ميقتنعوش بعد شوية يجي واحد ثاني ايه يا فلان اللي حصل بره فيقول لهم ده عائلة فلان نزله ضرب في عائلة فلان والثالث وهكذا لغايه ما جي أنا فيقولوا بس آه ده اللي هيقول لنا
د/عمروعبد السميع : الحكي بقي مهارة الحكي بتاعة....؟
الأديب/ خيري شلبي : يقول لنا ايه اللي حصل بره أقوم أنا انتبه فاحكي لهم على اللي حصل من أول ما فلان عمل ايه في فلان
د/عمروعبد السميع : اللي هي بيقول عليه من طق طق الى سلام عليكم
الأديب/ خيري شلبي : فيقول مبسوطين جدا وسعداء إني أنا قولت لهم على ما حدث بدقة فان فانبساطهم له مردود عندي فتعلمت ان ادقق في ما أري وكأنني سأمتحن فيه
د/عمروعبد السميع : أقف هنا عند تأثير سنوات التكوين والانتماء للقرية في بناء الكيان الإبداعي والخيال الإبداعي عند الأستاذ خيري شلبي ونقلك نقله أخري سنة 1969 حضرتك في مكتبة من مكتبات ضرب الجماميز عثرت على وثيقة هامة جدا هذه الوثيقة هي عبارة عن محضر كان عمله النائب العام وقتها محمد نور بشان نقابية كتاب الشعر الجاهلي لعميد الأدب العربي طه حسين واللي قال فيها حفظ القضية لعدم كفايه الأدلة و31 سنة عدو منذ هذا التاريخ ولا 41 منذ هذا التاريخ ولقينا نفسنا الآن في مواجهة مع بعض عناصر الجمود والتطرف والتخلف والرجعية اللي بتقول لنا ان ألف ليلة وليلة حرام وكذا تقيمك لمثل هذه الدعوات ايه ولاستمراريتها ايه
الأديب/ خيري شلبي : شوف مصر فعلا حاليا وأقولها بوضوح شديد جدا مستهدفه متقوليش نظرية المؤامرة وان احنا مصابين بداء المؤامرة لأ إنكار المؤامرة هو المؤامرة في حد ذاته هناك مؤامرة بالفعل شوف النيل يتخطف منك خلاص يعني أنت لا تندهش إذا صحيت في يوم من الأيام ولقيت النيل واقف عند سوهاج مثلا والدلتا دي تموت تماما ده ممكن يحصل فعلا دلوقتي ان مصر مستهدفة وعقلها مستهدف بالدرجة الأولي مطلوب تقديم مصرأصبحنا دلوقتي مهزومين في كل الأشياء المهمة واللعبات المهمة
د/عمروعبد السميع : ايه دورالتطرف أو ثقافة التطرف انها توصلنا الى مثل هذا ؟
الأديب/ خيري شلبي : ثقافة التطرف هي الأساس هي العائق الأكبر للتنمية في مصر وأصبحنا دلوقتي نهبا لكل من هب ودب يريد ان يتحكم في عقلنا ويريد ان يعلمنا الأدب ويمشينا على العجين ميلخبطوش كأننا قرود ومنين جابوا الشرعية دي متعرفش
د/عمروعبد السميع : دلوقتي عاوزأسأل حضرتك عن حاجة في الحقيقة أنت أتكلمت في جريدة الأخباراللبنانية ان عندك صورتين في المكتب صورة للأستاذ يحي حقي اللي تعتبره أبوك الروحي وصورة للأستاذ نجيب محفوظ اللي هوأبو الرواية بشكل أوبأخرودائما أنت كنت تتكلم في أحاديثك عن تلك العلاقات الممتدة و الطويلة والمتشابكة اللي بينك وبين صلاح جاهين واللي بينك وبين فؤاد حداد قول لنا أهمية ان يكون هناك هذه الرموز اللي ترتبط بها في كل المجالات
الأديب خيري شلبي : ده شيء ده فراغ مصر من هذه الرموز احد أسباب هذا الخواء الذي نعيش فيه لان مجرد وجود واحد زي نجيب محفوظ أوصلاح جاهين تاخذ مثلا نجيب محفوظ أو توفيق الحكيم أو يحي حقي أنا ككاتب إحساس ان نجيب محفوظ عايش وانه قد تقع هذه الرواية في أيده فسوف اتئني في كتابتها وأجود فيها بقدرما استطيع لكن حين يختفي الرموز يختفي الطموح تختفي القدرة
د/عمروعبد السميع : تختفي القدرة والرموز شوف عمروعزيز المخرج بيقولي ايه تختفي القدوة وحضرتك بتقلها برضه ؟
الأديب/ خيري شلبي : يعني فعلا مصرمات فيها الرموز مش كده وبس وهناك صفاقة في تشوية الرموز اللي ماتت يعني من ضمن المؤامرة على عقل مصر انه يشكك في طه حسن وفي رفاعة الطهطاوي وفي احمد لطفي السيد وفي كل شخصية من الشخصيات اللي أنت جبتها ذات يوم يطلعوا فيها عيب انه خائن انه عميل لمش عارف ان طه حسين ده كان عميل للصهيونية لمجرد انه كان بيطلع مجلة الكاتب المصري واللي كانت فيها شركاء يهود في الشركة الى أخر هذه دل كارثة من الكوارث يعني فعلا مصر تنتحر الآن مات الرموز مفيش تعليم هنقول انتماء ليه لمين قيل لجحا بلدك موطنك ايه يا جحا قال مؤخرا بخرتي وقال احمد شوقي أمير الشعراء وقد تهون الأرض الا موضعا قد يهون العمرالا ساعة وتهون الأرض الا موضعا والمغني الشعبي سألوه عن موطنة قال بلد المحبوب دي بقت حاجات رومانسية دلوقتي لما نسال الشاب تقوله وطنك فين يقولك لا يجد عنده شيء يعتز به أنت مش موفر له حاجة يحبها لا علمته كويس شوف المدارس ولا الحظائر بتاع الماشية بشوف مدارس وأنا راكب القطارأو ساعات أفوت في البلد أشوف مدارس ده شيء محزن جدا لو أننا دولة واقعة تحت الاحتلال لمدة 30 سنة مكنش يحصل كده ولا كان يجي في يوم من الأيام يتاخد مننا نهر النيل فأنت لا قدمت له تعليم ولا شقة يتزوج فيها وحتي الحب لم يعد ممكنا خلاص طمس الحب
د/عمروعبد السميع : قبل ما تكلمني عن الحب في الحقيقة أنت اخترعت شكل في التعبير الصحفي والأدبي هو شكل البورترية هو ملامح شخصية معينة وقدمت حوالي 250 شخصية تنتمي الى مجالات مختلفة والى أجيال مختلفة في هذا القالب قالب البورتورية أنا عاوز أخرجك من الشكل الفردي الى شكل أخر جماعي كلمني عن بورتورية الحب سنة 2010 شكله ايه
الأديب/ خيري شلبي : لم يعد هناك حب في الحقيقة
د/عمروعبد السميع : أنت شايف كده ؟
الأديب/ خيري شلبي : آه
د/عمروعبد السميع : سوف تسال الولاد دول إذا كان في حب ولا مفيش ؟
الأديب/ خيري شلبي : ممكن يكون بعضهم عايش في حالة يتوهم انها حب انما الحب هو التضحية يعني باختصارشديد جدا مفيش حد دلوقتي قادرعلى التضحية لان طيب يحبها بإخلاص طيب ايه النهاية لا يوجد شقة ولا يوجد فلوس يجهز بها لا يوجد عمل أصلا
د/عمروعبد السميع : أم ال اللي يقفوا على الفارندة بتاعة نهرالنيل وحطين أيدهم على ظهرهم وإحنا مشين كده ؟
الأديب/ خيري شلبي : دول تعساء تعاسه لا حصرلها يعني متفكرش يعني من كثرالسعادة
د/عمروعبد السميع : انتوا بتثقفوا للأستاذ خيري علشان بيقول عليكم تعساء ؟
الأديب/ خيري شلبي : صحيح والله دي ناس من حقها يتعمل لها جناين تقعد فيها يتعمل لها مساحات خضراء تشم فيها هواء يتوافر لها مناخ تقدر تتفاهم مع بعضها للمستقبل إنما دول ناس طفشانه من البيوت الضيقة
د/عمروعبد السميع : تفتكر ايه نوع الحوار اللي بيدور بينهم ؟
الأديب/ خيري شلبي : الحواراللي بيدور بنهم هنعمل ايه هتلاقي عبارة هنعمل ايه بين كل جملة وأخري هنعمل ايه فهيعملوا ايه فعلا في ستة الاف حاجة ستة الاف عقبة في سبيل الحياة أمام أي شاب هيعمل ايه لا ايه
د/عمروعبد السميع : طيب لما الحب هو التضحية قولي التضحية مش موجودة ليه ؟
الأديب/ خيري شلبي : لان هو نفسه مش لاقي حب هو نفسه لم يقع تحت طائلة الحب لان أهله علشان يربوه عاشوا في غيبوبة أنت بتشوف الراجل يا راجل الموظف اللي بياخد 100 جنية في الشهر وعنده 5 , 6 أولاد دي شيء يعني يدعوا الى الكفر أعوذ بالله
د/عمروعبد السميع : مفيش حب يبقي مفيش تضحية ومفيش تضحية يبقي مفيش حب ونتواصل بعد الفاصل
فاصل
د/عمروعبد السميع : عدنا لنواصل التقليب في ملف الانتماء مع الأديب الكبيرالأستاذ خيري شلبي ده وقت حوارك مع الشباب أدي ضيفنا اسألوه وحاوره وناقشوه ؟
بسم الله الرحمن الرحيم محمد صلاح عاشورعضو الأمانة الرمزية لأمانة الشباب الحزب الوطني الديمقراطي : واحد صحبي قالي أسمة احمد جمال نجم قالي بحب واحدة غير خطيبتي وخطيبتي عارفة وخطيبتي راضية وموافقة وأصحابي لأ ومستعد ابوس حته ترابه حتي تبقي راضية تضحكلي مرة تلمسني مره ياه ده يبقي نصر طيب والله ده لو حصل أقوم أزغرد وبكل اللي في جيبي أقوم أنقط سالوني وقالوا لي معاك ايه كام ستة جنية طيب فيها ايه وكفاية بقي أصلي هعيط اقولكم قوموا يالا نصلي العصر وادعوا لي يا ساده ادعوا لي بزيادة أطول حبيبتي وتغير خطيبتي ودي تبقي مين غيرك يا مصر
د/عمرو عبد السميع : الله الله
محمد: الكاتب والأديب الكبير الأستاذ خيري شلبي لماذا لا تبقي الشخصيات والرموز والمؤسسات مؤسسات المجتمع المدني في مصر مشروع قومي يحول سلبيات الشباب يحول اليأس يحول المقولة اللي حضرتك قولت عليها هنعمل ايه لايجابيات الايجابيات دي تظهر صور الانتماء للمصريين ويكون فخامة الرئيس رئيس الجمهورية أول من يعمل في هذا المشروع شكرا
د/عمروعبد السميع : تمام زميلك
بسم الله الرحمن الرحيم أسامه عبد الله عضو اتحاد طلاب كليه الحقوق جامعة القاهرة ورئيس لجنة التعليم في برلمان جامعة القاهرة : ما هي الأليه التي يمكن ان تستخدمها لتنمية الثقة بين المواطن والحكومة وخاصة إننا مقبلين على انتخابات مجلس الشعب ثم في العام القادم انتخابات الرئاسة وحضرتك قلت ان مفيش انتماء علشان مفيش تعليم بيتقدم كويس ومفيش حب فما هو مفهوم الانتماء من وجهة نظر سيادتك
د/عمروعبد السميع : تمام زميلتك
اسمي إيناس السيد على تجارة القاهرة : هل حضرتك شايف ان الأفلام والمسلسلات اللي بتتعرض حاليا تخلي عندنا انتماء لبلدان ولا تخلينا نكرها ؟
د/عمروعبد السميع : زميلك
حمدي عبادي علي صحفي في جريدة الخبر العربية محافظة الإسماعيليه : أنا بقول الانتماء يبدأ من البيت يبدأ من المدرسة تعول الطفل أزاي يحافظ على بيته ويحافظ على مدرسته ولكن الطفل أو التلميذ يفاجأ في المدرسة بمدرس جشع يجبرة على الدروس الخصوصية وبعد كده لما يتخرج يفاجأ بالرشوة والمحسوبية في التعيين أنا أقول حاجة قالتها طفلة اسمها نورهان قصيدة في حب الإسماعيليه بتقول بحبك يا إسماعيليه بحبك يا إسماعيليه لما تصحي الفجرية وتبتسمي لأولادك زي الوردة المندية العامل والفلاح والمركبية اللي كانوا وراء جنودنا لما عبرو الضفة الشرقية جابو النصر اللي كان حلم امتنا العربية بالنضال والصمود وأغاني السمسية بحبك يا إسماعيليه
د/عمروعبد السميع : مين نورهان ؟
حمدي : نورهان حمدي عبادي طفلة في الصف الخامس الابتدائي
د/عمروعبد السميع : بنتك يعني ؟
حمدي : آه
د/عمروعبد السميع : تعيش نورهان زميلتك
بسم الله الرحمن الرحيم محمد رجب جامعة القاهرة كليه التجارة الفرقة الثانية : هل حضرتك شايف ان مفهوم الانتماء يساوي مفهوم المواطنة ولا في اختلاف بينهم ؟
د/عمروعبد السميع : تمام زميلك
بسم الله الرحمن الرحيم عيد عبد الهادي رئيس اتحاد طلاب كليه الحقوق جامعة القاهرة ورئيس اللجنة السياسية في برلمان شباب جامعة القاهرة وزير خارجية الشباب المصري في برلمان طلاب الجامعات المصرية : إذا كنا نتحدث عن الانتماء فعلينا ان نلاحظ أو نعي جيدا ان هناك
د/عمروعبد السميع : علينا ان نلاحظ حاجة نسيب الورقة
عيد: نعي جيدا ان هناك أزمة في الانتماء المصري الأزمة دي تنعكس على محاورعدة منها اللامبالاة عدم المشاركة والهجرة المعنوية والاغتراب هذا يؤهلنا ان احنا لازم نبحث هذه الظاهرة وندور على حلول ايجابية لكي نتواصل لهذا الموضوع أنا عاوز امسك شريحة واحدة بس وهي المشاركة غياب المشاركة هل هناك أنا ألاحظ ان هناك قصور في دور الدولة والأحزاب السياسية ومنظمات المجتمع المدني في جذب الإفراد في المشاركة السياسية الفعالة فكيف نفعل هذا الدورأوكيف يكون لمنظمات المجتمع المدني والأحزاب السياسية والدولة أنا عندي رؤية للانتماء والمواطنة قد تحتمل الصواب وقد تحتمل الخطاء نفسي اسمع تعقيب حضرتك ان المواطنة ليست بالضرورة انتماء وممكن الانتماء المواطنة في اعلي درجاتها المواطنة ليست بالضرورة انتماء ولكن الانتماء باعلي درجاتها شكرا
د/عمروعبد السميع : تمام زميلك
بسم الله الرحمن الرحيم
د/عمروعبد السميع : هو أنا أقول لكم واحد واحد تسيبوا الورقة
** تمام
د/عمروعبد السميع : أنت قيادة كبيرة تلكم على طول من دماغك
بسم الله الرحمن الرحيم باسل عبد السلام خزيم كليه التجارة جامعة القاهرة : كنت عاوزأسأل حضرتك قولت المعامل والنشاطات والجمعيات طيب هما فين دلوقتي احنا دلوقتي مش شايفين أي معامل ولا أي جمعيات ولاأي حاجة تفيدنا أصلا في التعليم الأساسي اللي هوالمفروض الثانوية العامة تاني حاجة حضرتك أتكلمت عن التراث الأدبي اللي كان زمان دلوقتي مفيش أي تنافس أدبي في الريف ولا في الحضر اللي احنا عيشين فيه وأتكلمت حضرتك عن التعليم واللغة العربية أساسا مدرس اللغة العربية بيدي دروس علشان يكسب مش علشان يعلم التلاميذ أي حاجة شكرا
د/عمروعبد السميع : يعني مفيش عندكم واحد زي محمد حسن ريشة اللي كان عند الأستاذ خيري ؟
باسل : خالص مفيش أي حد خالص
د/عمروعبد السميع : يالا زميلتك
شيماء أولي كليه إعلام : عاوزة أسأل حضرتك من وجهة نظرك إزاي قادر تشوف الأفلام دي إزاي تدينا انتماء إزاي الأفلام اللي بتتعرض دلوقتي تدينا انتماء أنا عمري ما هيكون عندي انتماء طالما ما عنديش آمل لان لو عندي آمل هيكون عندي تفكير كويس هيكون عندي ثقافة كويسة هيكون عندي وعي إزاي كل الأفلام اللي بتأثر علينا دي هيكون عندي انتماء للبلد دي وهي تقدم كل شيء
د/عمروعبد السميع : يالا زميلك
بسم الله الرحمن الرحيم محمد محمد عبد السيد كليه الحقوق قسم انجليزي ثانية : أنا كنت عاوز حضرتك قولت دور الرموز ان هما يعرفونا الانتماء ويحسسونا به حضرتك شايف مين دلوقتي يصلح ان هو يكون رمز وهل ده نوع من الدعاية وكده هل هو رمز فعلا يستحق ان هو يكون كده ولا لأ
د/عمروعبد السميع : زميلك
بسم الله الرحمن الرحيم عمر كامل احمد كليه الحقوق جامعة القاهرة : أنا بس كنت عاوز اعرف من حضرتك هل الأزمات الاقتصادية اللي يتعرض لها المصريين بتأثر على انتمائهم للوطن أم لا ؟
د/عمروعبد السميع : أنت شايف ايه يا عمر ؟
عمر: لو حتي مثلا أزمات تؤدي الى تدهور الحالة الاقتصادية للمواطن متهيئلي انها تؤثر على انتماءه للوطن
د/عمروعبد السميع : بيتهيئلك ولا متأكد
عمر: أنا متاكد يعني بنسبة كبيرة
د/عمروعبد السميع : طيب ليه يستخدم متهيئلي ليه دائما عدم اليقين في خطاب الشباب منقول إذا عندك وجهة نظر قولها
عمر: يعني أنا اعتقد بس هي مش في كل المصريين
د/عمروعبد السميع : طيب نعمل ايه علشان نواجه الأزمات دي ؟
عمر: يا ريت بقي يكون في حلول
د/عمروعبد السميع : يا ريت يبقي في حلول يعني أنت منتظر حد تاني يقدم لك الحلول ؟
عمر: لأ اتمني يكون في حلول
د/عمروعبد السميع : لكن أنت معندكش حل تتحرك له ؟
عمر: حو حاليا لأ
د/عمروعبد السميع : أقولك الحل ايه ان تشارك في الحياة السياسية بايجابية وتفرض التغيير تجاه مصالحك زميلتك .
بسم الله الرحمن الرحيم شيماء المنشاوي : دي كان عندي سؤالين لحضرتك السؤال الأول في ظل التداعيات والظروف القاتمة اللي حضرتك ذكرتها عن البلد ومستقبلنا اللي جاي أنا كنت عاوزه بس أسأل أزاي نشبع حالة الانتماء لدي شبابنا اليومين دول تمام حضرتك عارف أكيد ان الحاجة للانتماء فاني في قمة التنظيم الهرمي لحاجات الإنسان دي حاجة الحاجة الثانية ايه المعايير اللي تعرض عليها انتماءنا أو تقييم بها انتماءنا ولو كانت نتيجة التقييم ده في غير صالحنا تفتكر نعمل ايه حضرتك وشكرا
د/عمروعبد السميع : تمام أتفضل يا أستاذ خيري
الأديب/ خيري شلبي : بالنسبة لسؤال محمد صلاح عاشور عن جمعيات المجتمع المدني هو في الواقع لا تزال تفتقد لهذه الجمعيات ده صحيح يعني فيه آه بعضها بس ملهاش حضور حقيقي في المجتمع أنا ياريت تشوف جمعيات تتولي أعمال مهمة تتولي مساعده الطلبة الفقراء مثلا على مواصلة تعليمهم أوالمحتاجين لبعثات توديهم بعثات أو تدبرلهم شئون البعثات وهكذا ده هيجي لو مع الأسف لو عندنا صحافة رشيدة وفضائيات رشيدة
د/عمروعبد السميع : أم ال اللي عندنا ده ايه يا أستاذ خيري ؟
الأديب/ خيري شلبي : اللي عندنا بصراحة يعني معمعة أو معركة أنت مش عارف فيها مين العدو ومين الصديق وبعدين ده هيخش بنا في إجابة لأحد الاخوه الفضائيات شجعت على الغوغائية برامج التوك شو المتعددة عمل حجتين خطيرتين جدا ضخمت وشجعت الغوغائية فبقينا احنا نشوف لأول مرة أساليب غيرحضارية في التعبير عن الرأي
د/عمروعبد السميع : التعبير عن الرأي؟
الأديب/ خيري شلبي : زاد ان هي بالتركيز الشديد على الفقر وعلى المشاكل شوف برنامج واحد منهم تشعر ان بكرة مش هتلاقي تأكل ويجعلك كابوس والوسائل اللي يبعتوها في البلد مواسير ضربة مش عارف فين والمجاري فين والمسئولين مش عارف ايه
د/عمروعبد السميع : يعني بقي في نوع من تزييف الوعي عند الناس ؟
الأديب/ خيري شلبي : العمليه دي كلها خلفت كابوس خلفت كابوس فعلا ومن ناحية ثانية رسخت في الشباب الإحساس بالاجدوي ودي اخطر حاجة
د/عمروعبد السميع : ده الياس بقي ؟
الأديب/ خيري شلبي : آه انه لا آمل أنا نفسي وأنا راجل كبير في السن يعني من المفروض متهزش من الكلام ده أنا نفسي يصيبني هذا الكابوس أحيانا واشعر انه لا آمل لان كل حتة في مصر في سبعة الا لاف لغم جاهز للانفجار احنا عاوزين شغل في السياسة طي بايه نعمل ايه الحلول اللي ممكن تقدمها كان المفروض يبقي عندنا فضائيات رشيدة كله الا برامج التوك شو اللي عملت ورم في المجتمع المصري ورم سرطاني كل قناة تجيب اثنين يقعدوا على الناصية أو على كرسيين ويقعدوا يحاكموا في مخلوقات الله ومتعرفش أزاي الوزراء كلهم يصابوا بهذا التواضع أمامهم وكأنهم فعلا تلاميذ مذنبين ده منظر مش حلو وبعدين تجيب طرفين على الهواء يقعدوا يروحوا لبعض في التليفون الحقيقة فين لا تظهر الحقيقة
د/عمروعبد السميع : ايه تقييمك يا أستاذ خيري لنوع المذيعين والمذيعات بتوع هذه البرامج ؟
الأديب/ خيري شلبي : أنا ليه ملاحظات كثيرة جدا
د /عمرو عبد السميع : أرجوك تقول بعضها
الأديب/ خيري شلبي : لأ لا احد في موقعة الأصلي وبعدين بتوع الرياضة دول اللي فجأة مسكوا الإعلام في مصر بدون خبرة إنسانية أصلا مش حتي خبرة مهنية لأ مفيش حتي خبرة انسانية ومسكين اخطرحاجة مؤثرة في المجتمع وخسورنا دولة الجزائر وخلونا معاه في مشاكل ولو تركنا لهم الحبل على الغارب شوية كمان كنا هنخسر لبنان ونخسرالسودان وهنخسرأفريقيا بالمرة ليه يعني لابد من إيقاف لهذا التدفق الفضائي وترشيدة يعني مش كل واحد معاه قرشين يروح فاتح قناة
د/عمروعبد السميع : ما احنا بنتكلم في الترشيد تتقاطع مع حرية التعبير؟
الأديب/ خيري شلبي : ده غير كده كمان ده في كوارث بتحصل في الفضائيات دلوقتي لما يجيب لك برنامج توك شو وقناة أصلا ذات نشاط ديني متطرف الفضائيات دلوقتي بتلعب دور في منتهي الخبث ولذلك تمسح مخ الشباب تمسح عقولهم تماما وتريد تحويلهم الى كائنات عابدة لا تغادر المسجد وتؤدي الفرائض والنوافل والخ يبقي ملوش شغلة غير التعبد وتفرغة من أي محتوي اجتماعي أو ثقافي أوسياسي بحيث انه يجي علينا لحظة تبقي ايه منتظرة اللي يؤكلها ويشغلها عبيد يعني دي كارثة الفضائيات كارثة ملحة ويجب علينا ان نواجهة بكل قوة قبل ان تستفحل خطرها لان أنت متعرفش كل لون فضائيات أنت معندكش فكرة كويسة عنه وفي كل يوم تفاجئ بمفاجئه في فضائيات مكناش نسمع عنها فيها مشكلة مع مش عارف مع الفرنسيين أو مع الألمان ده فوضي إعلامية منقطة النظيرمشفتهاش مصرولا شافتها أي دولة في العالم بالنسبة لظاهرة اللاجدوي فعلا المسئول عنها الصحافة والفضائيات الفضائيات بالدرجة الأولي وبعض الصحف الخاصة والحزبية مش كلها طبعا بالنسبة لغياب القدوة وسؤال أخر مين اللي يصلح رمزالان فده سؤال من محمد ومن شيماء آه في ناس الكراسي لم تعد شاغرة تماما يعني هناك كراسي غادها أصحابها العظماء منذ وقت طويل ويشغلها الان ناس ربما كانوا على نفس الطريق بعنب المؤدي في المجتمع آه في شخصيات كبيرة جدا في علماء كبار جدا في أدباء عظماء جدا وفي فنانين عظماء جدا ولكن المجتمع نفسه ملوش نفس بالبلدي كده أو ملوش مزاج يشوف لان التلفزيون يصب فيه ضلالات ويشغله بقضايا فرعية ملهاش نهاية ويفرغة من المحتوي المسلسلات آه
د/عمروعبد السميع : المسلسلات والأفلام ابنتاي سالوك عنها ؟
الأديب/ خيري شلبي : المسلسلات والأفلام دي كارثة كبري لان معظم المسلسلات تقدم شخصيات لا وجود لها في المجتمع المصري يعني ما احنا عايشين الواقع المصري خلاص المجتمع المصري انتهت مشاكله ولم عد أمامنا غير أننا نجيب رجل أعمال مثلا أو رجل مال نقلد به فيلم الأب الروحي وعقدة الأب الروحي إصابة ممثلين
د/عمروعبد السميع : فيلم الأب الروحي بتاع مارلن برانكو
الأديب/ خيري شلبي : آه وأصبحوا يحلموا انهم يقدموا عمل مليء بالإثارة والعنف والإرهاب وكذا وكذا لكي نشبع رغبة في التمثيل مش معقول أنت كده بتخلق قدوات شريرة يعني احنا برضه من عيوبنا أننا بنكرس لمجرم وللجريمة من حيث يريد كشفهم يعني تجد دائما شخصية الشريرهي النجم اللامع فالناس تحبه من حيث يريد لهم ان يكرهوه لان هو يتمعن ويمثل الدور بمزاج وكل ما كان شرير قوي كل ما كان غرم الممثل يعني فيه لأنه بيطلع إمكانياتة التمثيلية ايوة ده صحيح لكنة في النهايه يتخلق حب لهذا الشخص
د/عمروعبد السميع : أستاذ خيري أنا عاوز اعرف تأثير هذا اللون من المسلسلات والأفلام زي ابنتاي ما سألوا بالظبط على حالة الانتماء للبلد ؟
الأديب/ خيري شلبي : آه لأ هما المسلسلات الحالية منذ حوالي عشر سنوات أواقل قليلا مسلسلات خارج نطاق الواقع المصري
د/عمروعبد السميع : خارج نطاق الخدمة ؟
الأديب/ خيري شلبي : وخارج نطاق الخدمة يعني خارج نطاق الإنسانية حتي عمري ما شوفت وأنا اعتبر صعلوك من صعاليك الواقع المصري في حوارية قاعه مشفتش ده الواقع المصري مليئ بالمشكلات الدرامية اللي يطلع منها أعمال فنية عظيمة جدا لكن المحترفين محترفي كتابة السيناريو لا يهمهم انهم يلقطوا فكرة من فيلم أجنبي أو مسلسل أجنبي ويعيدوا صياغتها تاني فيركد في شخصيات حاولوا يمصروها مينفعش وحاجات فيها افتئات على الواقع وعلى التاريخ وعلى الحقيقة وفعلا
د/عمروعبد السميع : يعني نوع من الافتعال التعسفي يعني ؟
الأديب/ خيري شلبي : أنا ازعم ان العنف اللي في المسلسلات هو اللي وراء ظاهرة العنف اللي تضخمت الان في المجتمع المصري وده برضه من ضمن اللي موت الانتماء يعني أنت عاوز ايه أكثرمن ان الراجل مش بس يقتل بناته ويتلذذ ويمسك البنت من شعرها ويغطسها في جردل الميه ويشلها ويغطسها كأنه بيعمل عمل يستمتع بعمل هذا العنف مكنش موجود أبدا ويكرره ده في ثلاث أو أربع أولادة واحد من أولاده ويقتل زوجته والأم تقتل ابنها لصالح عشيقها وتقدم لعشيقها ابنتها متى كان هذا يحدث في مصر لولا ان الأمور ساحت على بعضها وان احنا نقدم الشر باستمتاع فني فنرسخه في أفئدة في وجدان المشاهدين هذه كارثة يجب الانتباه لها ويجب ترشيد المسلسلات هو ايه لازم أنتج كل رمضان 20, 30او 40 مسلسل ده حتي يعتبر جنون ان أجيب منين 40 فكرة قيمة علشان اعمل 40 مسلسل وكل مسلسل
د/عمروعبد السميع : ما هي بقت الدراما تخدم على الإعلانات مش العكس
الأديب/ خيري شلبي : الإعلانات دلوقتي بقت هي دلوقتي سيدة البلاد في كل حاجة ولذلك العمل التلفزيوني يكاد يفقد شرفة لأنك أنت شم ضامن المادة اللي يقدمها لك التلفزيون دي خالصة لوجه الله والحقيقة أم هي تخدم على سلعة يبعها لك بعد كده فأصبح في شك في العمل التلفزيوني وقلة شرفة لكنه يصل ينعدم الشرف تماما في السيناريوهات اللي يتعرض على الشاشة لان دي فعلا مفيهاش إحساس بالمسئولية وبعدين تجيب لي أعمال سبق تقديمها كذا مرة في السينما وتيجي تعيدها في التلفزيون تاني دون ان يكون هناك قيمة فزة تستدعي ذلك
د/عمروعبد السميع : ولا مبرر حتي ؟
الأديب/ خيري شلبي : يعني ليه الا ان يكون الفراغ هو اللي بيحركهم والمسلسل
د/عمروعبد السميع : أو المراهنة على قيمة تجارية مضمونة ؟
الأديب/ خيري شلبي : هو المراهنة دلوقتي معدتش في القيمة لم يعد لها وجود إنما الرهان الان على الإثارة من اجل جذب المعلنين سواء في المسلسلات أو في البرامج يعني برامج التوك شو ده اللي هي بيخدعوك وينكوا عليك في النهايه لكي يقعدوك علشان يذيعوا عليك إعلانات حتي الإعلانات نفسها سقيمة وغير جاذبه ومكررة أنا نفسي بس أشوف الناس اللي هما بيعملوا الإعلانات دول ناس غيرخبراء على الإطلاق ومعندهمش درايه بالحالة النفسية للمشاهد لان مفيش المشاهد اللي يتحمل إعلان يتكرر في المسلسل الواحد 20 أو 30 مرة بنفس الصيغة ده جلد ده يعني فعلا الإنسان اللي يقعد قدام التلفزيون علشان تشوف حلأ واحدة من مسلسل تجلد وتقهر على ان نشاهد كم هائل من الإعلانات
د/عمروعبد السميع : بالإضافة ان هذه الإعلانات بتتحدي قدرتك الشرائية وتهين وضع الأب داخل الأسرة لأنه غير قادر على تلبية طموحهم واحتياجاتهم عم خيري يعني ايه كلمة وطن
الأديب/ خيري شلبي : كلمة وطن كلمة أصبحت ملتبسة حتي المواطنة نفسها معدتش موجودة احنا أصبحنا دلوقتي بيسمونا السكان معدتش في المواطن فلان الفلاني لان ربما لان عددنا زاد بشكل محناش عرفين نحكمة فبقي المواطن بقينا زي العدد في الليمون فبالتالي المواطن هيبقي مواطن ليه ما فيه منه عشرة الاف كل واحد في منه 70 ألف بني ادم
د/عمروعبد السميع : كلمة وطن أصبحت كلمة ملتبسة والنقاش مستمر وحالة الحوار قائمة وعلى لقاء ان شاء الله