ساخرون: أهل الشر تخصص قّر

معالى المسئول المهم جدا مخاطبا المواطن الفقير الغلبان بصوت هادئ وضحكة صافية مستفزة: وعندنا إنجازات كتير جدا قوى خالص؛ بس مش عايزين نعلن عنها عشان أهل الشر عينيهم وحشة يا حفيظ !! ربنا يكفينا الشر وأهله الوحشين...
المواطن الفقير الغلبان: يا سعادة معالى الباشا كل اللى بتقولوا جنابك على عينّا وعلى راسنا من فوق كمان؛ بس إحنا ولا مؤاخذه فلسّنا تماما وبقينا ع الحديدة وعلى فيض الكريم؛ دا حتى الحديدة بعناها وبنكمل غدانا وعشانا نوم، يعنى باقول لجنابك يا ريت ترحموا من في الأرض عشان يرحمكم من في السماء...
المسئول المهم جدا غاضبا من قلة فهم المواطن: أرض إيه ؟ وسماء مين يا جدع انت ؟!! بقول لك أهل الشر راصدين كل حاجة وبيتآمروا على مصلحة البلد، تقوم تقول لى أسعار، ولحمة وخضار وكلام فارغ ؟!! يا أخى إن شا الله ما تاكلشى ولا تشرب المهم نكون كده إيد واحدة، ضد أهل الشر والناس المسوّسة، على الله تكون فهمت بقى؟!
المواطن الغلبان: وهو إحنا يا بيه لما ما ناكلشى ولا نشرب هانبقى كده إزاى ؟! دا إحنا نقع من طولنا مسخسخين من كتر الجوع والعطش وأى عيل صغير يقدر يضربنا على قفانا ويطلع يجرى وهو بيطلع لنا لسانه؛ وإحنا مش هانقدر نقوم من مكانا نجرى وراه حتى !! وبعدين معاليك تقدر تقول لنا بتعملوا إيه عشان تصرفوا عننا أهل الشر؟
المسئول المهم: أبدا.. كل يوم الصبح بنتلم إحنا وبقية أعضاء الحكومة الموقرة ونقعد نغنى لهم:
أهل الشر... يا أهل الشر..
ابعدوا عنا وبطلوا قر
كل ما نعملوا حاجة حاسدينها
ومش ناويين تجيبوها البر
أهل الشر... يا أهل الشر
وربنا يهديهم وينصرفوا عننا بقى عشان نقدر نأكلكم بدل العيش البلدى فينو صوابع...
المواطن الغلبان "مذبهلا": بتغنوا لهم عشان ينصرفوا ؟! وهاتأكلونا فينو !! يا حلاوة يا ولاد.. طيب اسمع بقى منى القصيده دي:
فينو.. فينو.. مكليفينوا
بالدقيق الأمريكاني
دم أهلي مغمسينوا
العراقى واليماني
والمعونة المصونة
شرط ليها معجباني
اقتصادك يوم حصادك
رز يبقى أو سوداني
أما قمحك ما القى طرحك
ولاّ ألوشك من مكاني
والحكاية شعب نايم
كله فاهم مش بهايم
ماشى دهره ويا قهره
من الزمان الأولاني
شعب همه يملا بطنه
لما يشبع من المدمس
يستمخ في قعدة حلوة
ويّا مزة أو يأنفس
وهيّ ماشية أحلى أشيا
لو تدوملى يا زماني
شعب خيره يروح لغيره
وحد تانى يلوف بطيره
ما عدشى يزعل
مَ كلّه فاني
هلي هلى عاشها
وعاش بكشها
تملى يلعن
في آبو خاشها
يفور وينزل
بلا معاني
كل بلوظة
وعبى بوظة
دماغه راحت
مع الكازوزة
من الكازوزة
الأمريكاني