سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
بالصور.. رواد «فيس بوك» يتداولون قصص العنف من الآباء ضد الفتيات.. «كوكي»: «بابا جابلي نزيف في المخ».. «هاميس»: «قص شعر وضرب بالحزام».. «نهاد»:«أعرف واحدة أبوها سحلها علشان متضايق»
أثارت مجموعة من القصص التي رواها رواد موقع التواصل الاجتماعى "فيس بوك" غضب متداوليها، بسبب تصرفات بعض الآباء ضد أبنائهم. وروت العديد من الفتيات قصصهن حول العنف المنزلى من قبل الآباء، والذي جاء في أغلب الأحيان على خلفية أفعال بسيطة لا تستحق كل ذلك الكم من التعذيب الذي تعرضن له، ومن بين تلك القصص. "نضافة الشقة أو التعذيب" قالت إنجي:"أنا أعرف واحدة كان أهلها بيضربوها ويسيبوها من غير أكل وكانوا بيعذبوها لو منضفتش الشقة كل يوم من أولها لآخرها.. تنضيف ومسيح وكنيس وتعمل الأكل وكل حاجة تعملها وكانوا ميرضوش يجيبولها لبس خالص.. وجوزوها واحد ميعرفهوش خالص ولا سألوا عنه وأهه دلوقتي بيعايرها انها مكملتش تعليم، وبيضربها وبيدلق عليها طاسة فيها زيت مغلى، وبيضربها وعايزة تطلق منه وعندها عيلين". "جواز بالغصب" وروت سالي:"أعرف واحدة قريبة مننا باباها متجوز على مامتها.. هو ضابط واللي أجوزها رقاصة وبتاجر في المخدرات بس على خفيف، وهو أصلا عنده 3 بنات أخد الوسطانية وطبعا علشان عارف أنهم مش هيعرفوا يكسروا كلامه للأسف غصب عليها تتجوز اخو مراته، وده باباه بيشتغل طبال في كباريه وليهم شغل غير مشروع ". وأضافت:"البنت في الأول رفضت وإزاي يابابا ترميني الرمية دي حرام عليك بس طبعا هو ما تعبش فيها، ووالدتها هي اللي ربتها وهو اخدها غصب على الجاهز فمش فارقة معاه، وطبعا حاولت ترفض ضربها وكسر موبايلها وقطعلها أي هدوم ممكن تخرج بيها عشان ماتحاولش تهرب وهددها بالقتل لو هربت وفعلا كتب كتابها غصب عنها". وتابعت:" البنت لقت انها كده كده ميتة وحياتها ادمرت فقررت تهرب وراحت لوالدتها وهما حاليا بيحاولوا يوصلوا لها.. البنت بتقولى انها بتكره باباها جدا، وعمرها ماشافت أب بيكره وقاسي على ولاده كده.. ودي مجرد عينة وقصة من حكاوي كتير قوي لأهالي كتير". حبس ثلاث سنوات وأضافت مريم:"اعرف واحدة اتحبست 3 سنين كانت بتصحي من النوم تسألهم هي الساعة كام أو إحنا الصبح ولا بالليل لأن بلكونتها متمسمرة ومحطوطلها عزل حتى ماتشوفش نور الشمس، وكان مانع عنها كل وسائل الاتصال للأسف.. وزود على ده الأساليب التقليدية مثلا ضرب بتوكة الحزام وحبس وكل اللى انت عاوزه". "اضربت في الشارع" وقالت آلاء: "بما اننا فتحنا الموضوع فا أنا مرة اضربت قدام الشارع كله من بابا واتجريت على الأرض علشان صاحبتي كانت واقفة مع جارنا، متخيل يعني ده مش أنا حتى.. من ساعتها وأنا بقيت راسي في الأرض من الناس، وضهري اتكسر". حلق الشعر وروي طارق:"في واحد ساكن في الشقة اللى تحتنا دخل على بنته الساعة 2 بالليل شافها وهي بتقفل الموبايل سألها بتكلمي مين قالت ليه؟.. واحدة صاحبتي هو طبعا أب مصري إزاي يثق فيها واتصل على آخر رقم لقاه مقفول مسك بنته حلق شعرها ونزل فيها ضرب بالحزام وقلعها هدومها وربطها في الكنبة وهي بالمنظر دا رغم أن بنته كبيرة وفي تانية ثانوي.. تاني يوم صاحبتها اللى كانت بتكلمها بالليل رايحة ليها علشان الدرس فأبوها سألها قالت اه كانت بتكلمني بالليل بس الموبايل فصل شحن.. فيه حالات كتير جدا أبشع من كده للأسف". "سحلها علشان مضايق" وقالت نهاد:" فيه الاكتر من كده بكتير والله اعرف واحدة قريبة مني.. ابوها الله يكحمه مطرح ما راح ، سحلها على السلم، لمجرد أنه جاي مخنوق من الشغل ولقاها واقفة في الشباك". قص شعر وضرب بالحزام وأضافت هاميس:"بيحصل الكلام ده معايا لأسباب أتفه بكتير.. عادي ومش بيبقي قص شعر بس ده ضرب بالحزام، وسلك الكهربا، ونعت بأقذر الألفاظ التي لا تقال إلا لل.. ولأتفه من التعليم أو التعامل مع زمايلي الشباب.. دا ممكن لأني بس كسرت كوباية.. الأغرب من كده أنه مستغرب جدا إزاي انا بكرهه ومش طايقة اقعد معاه أو أكلمه.. وبيسميني جاحدة". نزيف في المخ وقالت كوكي:"بابا جبلي نزيف في المخ وكنت بموت بمعني الكلمة لمجرد أنه كان في مشكلات في الشغل وطلعهم عليا". وأضافت سلمي:"بابا مرة ضربني قلمين جامدين جدا عشان كان بيشك اني باخد فلوس الدروس وبخرج مع صحابي بدل ما أروح الدروس وأنا أصلا مش عندي صحاب خالص وهو عارف كده.. ومرة ضربني بالحزام جامد عشان ابن عمي بعتلى ادد وأنا قبلته".
