ناشط إخوانى: القيادة تتحمل مسئولية ما حدث أمام المقطم

قال الناشط الإخوانى، أحمد المغير، فى تدوينة عبر صفحته على موقع "فيس بوك"، اليوم الأحد "القيادة يقع على عاتقها مسؤولية كبيرة ولها تبعات كثيرة، وللسبب ده فالقيادة بالتأكيد تتحمل جزء كبير من مسؤولية ما حدث أول أمس سواء بشكل مباشر أو غير مباشر، وهذا لا ينقص من أحد منهم فضل عمل أو سبق أو بذل لكن ده حال الدنيا" .
وتابع المغير "إذا كنا بنحلم بأمة منتصرة قوية ناهضة فلا بد إننا ناخد بأسباب النصر والقوة والنهضة, أهم أسباب القوة إنك تحلل أخطائك وتنقدها وتفتح النقاش حولها، وتحصر أسبابها وتبدأ تاخد الإجراءات الكفيلة بعدم تكرارها....أما دفن الرأس فى الرمال ومحاولة غلق الموضوع كل مرة تحصل فيه أزمة أو مشكلة والتترس وراء خوف وهمى من إن الآخر يشمت فيك أو يهاجمك فده هو أحد الأسباب الرئيسية اللى أدت للى حصل أول أمس" .
مضيفاً "أنا لما بطرح الموضوع ده علنى حاليا فلإنى مش عاوز الموضوع ده يتقفل زى ما بيحصل كل مرة، وعاوز تحقيق حقيقى وشفافية ونقاش موسع أقدم بيه نموذج للأمة الإسلامية، لكيفية التعامل مع الأزمات وكيفية علاج الأخطاء, إخوانى اللى هاجمونى بضراوى إمبارح لإنى بتكلم على الملأ أقلهم هوا كان إزاى ممكن السنة توصلنى إذا مكنش الرسول صلى الله عليه وسلم والصحابة عالجوا أمور المسلمين بشكل علنى ؟، وهل يا ترى الآيات اللى كانت بتنزل فى الأزمات وآيات العتاب للرسول الكريم أو للمسلمين دى كان بيقرأها المسلمين بس ولا المسلمين والكفار ؟.. إذا كان رأيكم هو الصحيح فى إنى لازم كل مرة أناقش أى موضوع خاص بالإخوان داخليا فقط، فإزاى تفسرولى الكلام اللى فات ؟ هل تظنون إنكم أحكم من المولى عز وجل ورسوله ؟.. هل المسلمين كانوا بيأبهوا لشماتة الكفار لما بتنزل عليهم آية تعالج خلل حصل عندهم ؟".
واستطرد المغير قائلاً "إنتوا خايفين من إيه بالضبط ؟ من بلطجى يستشهد بكلامك أو بلطجى تانى يتريق عليك ؟ طيب والأمة اللى إنت بتقودها دى فين النموذج اللى بتقدمهلها ؟ هتتعلم منك إزاى ؟ فى السر ؟ إخرجوا يا إخوانى من القوقعة اللى فرضها عليكم نظام القهر والظلم على مدار ال60 سنة اللى فاتت....إخرجوا عشان الناس تتعرف عليكم وتتعلم منكم, مساعدة الناس مش بالعمل الخيرى والإغاثى بس بل هى بتقديم نموذج لهم مش بس فى العبادات بل والأهم فى المعاملات, فى الإدارة, فى الإختلاف, فى النقد, فى المعارضة, فى النقاش, فى الألم, فى الفرح, فى الحزن....القوقعة اللى إنت فيها ممكن تكون درع ليك وحماية فى بعض الأحيان لكنها أيضا بتحجبك عن الآخرين وبتخليهم مش شايفينك".
وتابع المغير "أدعوا إخوانى الكرام فى القيادة إلى فتح نقاش عام موسع وحقيقى عما حدث فى المقطم بل وأدعوهم لعرض هذا النقاش للمجتمع, أدعوهم لتقديم نموذج حضارى بيحصل داخلنا كل يوم يعلم المعارضة كيف تكون المعارضة ويعلم القيادة كيف تكون القيادة".