أبين زين

حأقول لك إيه ولا إيه.. الرمل فيه أسرار.. ونفسى أقول لك ياريس إن فيه أشرار.. واللى جرى فى سينا مترتب من الفجار.. وقتل أولادنا ده موقف وله أخطار.. وأنا ودعى بيحذرك م الغدر ليل ونهار.. فتح عينيك البلد فى محنة واستنكار.. وبلاش تمسك بسلطة ما عدش فيه أعذار.. خليك ياريس مصحصح فيه وراك أدوار.. أمن الوطن والمواطن ليس فيه استهتار.. وباقول لجيشنا وقادته وجميع الثوار.. الثورة مش ميكروفون.. ولا اعتراض ومرار.. الثورة قوة إرادة وتضحية وإصرار.. دا مصر هى الوحيدة فى جميع الأقطار .. اللى فى كتاب ربنا جه اسمها المختار.. وأنا بأحذر وأقول إن الوطن له تار.. واللى اعتدى جاى له يوم ويواجه الأحرار.. ويا مصر انت الوحيدة حتفضلى فى عمار.. وشد حيلك ياريس لسه فيه إعصار.. والحكم إيه وللا إيه شرد الحزام واختار.. إحنا النهاردة فى مواجهة.. فى الجنة أو فى النار.. وأنا قلت رأيى وخلاص استرها يا ستار.. الثورة ثورة وبكرة نكمل المشوار.. بس الودع فيه حاجات بتشق كالمنشار.. وأنا قلت رأيى وخلاص وبأقول باستمرار.. راح حأرجع أشوف بختك بلاش تحتار.. وألف رحمة على الشهداء وأرواحهم.. وبكرة راجعه لكم إن طالت الأعمار..