ابن النيل العاشق يِحْلَم الحِلم دا حَقُه وحَقُه يِحلم بالتغيير نام واتْغَطى شاف الحِلم قال الحِلم عاوز تفسير سأله مُفَسِرْ إحكى الحِلم إحكى يجوز حِلمَكْ أساطير قال أنا شُفتْ الحِلم دا ثورة ثورة حقيقى ورُووس بتطير .................. بتقول ثورة.. ثورة لا يمكن فكرك ثورة دِى تِنْفَعْ حِلم؟ الأحلام عمرها ما تْغَيْر والأحلام مالهاش تأثير بس الحِلم دا لو يِتْحقق صاحب الحلم دا عنده ضمير قلت له إحكى فين الحلم قال شُفْتْ الحِلم فى ميدان تحرير وشَعْبْ بيجرى وشَايل الحِلم وشَعْبْ يقول أنا حِلمى مصير ..................... كلنا قلنا نعيش الحِلم وبَدَأْ الحِلم.. بس الظاهر الحِلم كبير حِلْمِنا كان فى شُعاع حُرية وحِلمنا كان حمَلة تطهير حِلمِنا كان ثورة وتضحية عُمر الحلم ما كان تدمير حِلمِنا كان فجرنا بيشَقْشَقْ وإيد فى الإيد نِبتِدى تَعمير ......................... بعد الحِلم ما عَدا عَلينا وقلنا يِعِيش زمن الأحلام هِرِبْ الحِلم من حوالينا أتارى الحِلم كلام فى كلام يبقى ياريتنا ما كنا بنحلم وللا ياريتنا ما شُفْنَا مَنَامْ كنت أتمنى الحلم دا يكمل وكنت أتمنى نعيش فى سلام التغيير له أساس م الأول والتغيير دا لازم له عَلَامْ ..................... أول سَطْرْ فى حِلم الثورة كنت أتعلم قيمة الحكمة وقيمة الصبر مع الأيام يبقى العيب فى الحلم دا نفسه وللا العيب فى مكان الحلم ؟ وللا العيب بقى فى الأحلام ؟ ....................... قلت أرُوُحْ لمكان الحِلم وأشوف دلوقتى وَصَلْنا لِفين شُفتْ مِيدانْ أخضر ومْدَورْ و بَشَرْ واقفة تِسِدْ العين وشُفتْ حاجات محتاجة تِتْصَور كأِنى فى مُولِد لِلسَيِدَة وللا لِحُسينْ قُلْتْ الله يا حَلاوِةْ المولِدْ بَسْ المولِدْ عُمْرُه يومين وِمُولِد الثورة بَقَالُه شُهورْ لا عَاوزْ يِهْدَى ولا يِرتاحْ ولا رَيَّحْنَا ولا قال لنا هياخُدْنَا لِفينْ وكأننا واقفينْ فى البحر ووسط البحر الكُل بيغْرَقْ وبحر الثورة مالُوش شطين يبقى العيب فى مكان الحلم وللا العيب بقى فى المُولِدْ جايزة كبيرة لِلى هَيعرف ييجى يقولى العيب فين ؟ العيب فين ؟ ......................... ياللى صحيح كان حِلمَكُ ثورة يالا معايا وحَذَّرْ فَذَّرْ أحسن واحد هيشوف بُكْرَة إللى فى وسط النار بِيفَكَرْ عُمْركُوا شُفْتوا فى وِسْط المُولِد حَدْ بِيِبْنِى وللا يِعَمرْ وللا المُولد بس يِقَلِدْ وإللى بيضحك .. وإللى يِمَثلْ وإللى يِهَرجْ .. وإللى يِهَزرْ وإللى بيمشى فى وِسْط المُولِدْ يا ما بيشوف و ياما بِيْدَورْ حتى كمان فى وِسْط المُولِدْ بَسْمَعْ خُطْبَة لصلاة جمُعة و يَالا نِصَلى .. اللهُ أكبرْ وإللى ما صَلى صلاة الجمعة فى التحرير مُمكِنْ وَادْ لُهْ فى العَفَاريتْ وَاقِفْ بِيْحَضَرْ ووِسْط المُولِد عُمرى ما هَعْرَفْ مِين شِيخْ جَامِعْ و مِين شِيخ مَنْصَرْ ؟ وربنا شايف إن دا كُلُه كَلام فى كَلام ومفيش فَايدَة .. يِبقى كِفاية آخُدْ كام صُورة و آخُدْ كام مَنْظَر قبل المُولِدْ ما هَيِنْفَضْ وقبل الحِلْمْ ما هَيِتْبَحْتَرْ بقى معقولة دا كان حلمنا ؟ بس فى مُولِدْ وللا فى خُطْبَةْ وأعمل شاطر ولَلا أتْشَطرْ مصر يا ناس حلمها حُرية وحِلمها عَدْلْ حِلم يعيش .. يُوم ورا يُوم الحِلمْ هَيِكْبَرْ عُمْرْ الحلم ما كان فى المولد ولا فى ميدان وَاقِفْ الكُلْ هِنَاك مِتْمَسْمَرْ قال مُشْ مَاشى وقال دى مَطالبى وقال طَلباتى لازم تِتْحَقق وعقلى خلاص صَوانْ مِتْحَجَرْ والطلبات محتاجة لوقت عشان تِتْنفذ وللا لازم دلوقتى وحالاً .. لا يُمْكِنْ هَصْبُر كُل كلامى كُنْ فَيكون .. حَاشا لله رب الكُون وحده إللى يِقرر ربك قَدَرُه هَيمشى علينا وكل دا شيء مَكتوب و مْقَدَرْ ..................... وأنا إحساسى الخير جَاى علشان مصر بس حقيقى من جُوانا لازم نتغير التغيير مش بس فى ثورة وتغيير حُكْمْ وللا قيادة وللا حكومة وللا فى مجلس وبْنِتْطَهَرْ التغيير لازم فى نفوسنا .. لازم فى طِباعنْا لازم فى عاداتنا وفى تفكيرنا لازم فى الجَوهَرْ التغيير فى ثقافة شعب دَاقْ الظلم وأما يِشُوفْ حرية حقيقى وثار وإتحرر فعلاً لازم من جُواه يِبْدَأ يِتْحرك يِبدأ يِفهم يِبدأ يِعرف قيمة الوقت إمتى يِعارضْ ولَلا يِعَبرْ لكن وقت الشُغل شُغْلْ وفى الإنتاجْ لازم إنتاجْ و مَصْرِنا شَافِتْ هَمْ كِبيرْ ومن حقها إنها تِتْعَمرْ وإللى يِفَكَرْ فى التطوير وللا بيحلم بالتغييرْ وإللى الحِلمْ بتاعه كبير .. لازم من جُواه يِتْطَوَرْ ومش معقول كل شوية نِفْضَلْ نِجرى عالتحرير ونقول دِى حُرية رَأى ونقول مطالبنا أو نِتْهَورْ وكل يوم طالعين ببيان وإيه إللى هنبدأ بيه الأول الإنتخابات وللا الدستور وللا رئاسة و بنِتْمَنْظَرْ وأفْضَلْ أقُول دم الشهدا وسَقْفْ رواتب وللا فُلُولْ ثورة مضادة وبُطء مَحاكم يالا بِسُرعة نِعمِلْ مَحْضَرْ كأن الوقت بقى حِجتْنا و بَقى سِكِينَة بِتِدبَحْ فينا و مصر حبيبتى زَى سَفينة بِنِخْرَق فيها ولا بِنفَكَرْ قلت نصيحتى وقلت كلامى وسِبْتْ المُولِد وجريت جَرْى رُحْتْ الجامع .. دَمى إِتْعَكَرْ ............................... مِسِكْتْ المُصْحَف وبدأت أقرا فى سورة يُوسِفْ بِسم الله وآية فى آية لِحَدْ الآية تِسعَة و تِسعينْ ولَقيتْ نَفْسِى بِتِهْدا بِتِهْدا بعد ما كُنْتْ لِوحْدى حَزينْ قُلتْ دِى مصر كَرَمها المَولَى فى القرآن قالها صريحة للعالمين يبقى إزاى هنخاف أونقلق ؟ أونستعجل وللا هنضغط بالملايين ؟ مصر محفوظة بحفظ الله مهما نِعانى الحمدُ الله كَتَبْ المولى عليها الأمنْ لِيُومْ الدِينْ سمَوا مِعايا بسم الله .. رب العرشْ وإدخلوا مصر بإذن الله دايما آمنينْ إدخلوا مصر بإذن الله دايما آمنينْ
