أقسم تانى .. لأن الثورة لسه ف مصر

أقسم تانى و لسه سأقسم
أن الثورة دى ما خلصتش
قلنا خروج الشعب دا مٌلزِم
يبقى تجاهله أكبر غشّ
أقسم أنى يا مصر ف ثورة
أقسم أنى شفت كتير
أقسم لو حسينا بمناورة
مش هانروح إلا التحرير
...أقسم أنى مش هاتنازل
حق ولادى لسه ما جاش
أقسم مش هانسامح فاعل
دم الشهدا مش ببلاش
أقسم ب ترابك يا بلادى
أقسم بسم شهيدك حىّ
حق الشعب دا حق سيادى
حق ف أرض و حلم و ضىّ
أقسم أنى هافضل اثور
أقسم مش هاتراحع ثانية
علشان بلدى تشوف النور
هاحميها من الناس التانيه
أقسم إنى فداكى الروح
أقسم بيكى
أرضك و ميدانك مفتوح
حقنا فيكى
أقسم إنى مش هارتاح
إلا ب راحتك
أقسم لسه انا صوتى سلاح
تشهد ساحتك
لسه يا مصر الثورة ف مصر
عايزة مساندة مننا فينا
لسه كتير على لحظة نصر
نص مطالب ما تكفّينا
عشنا عشانك و اتحملنا الظلم كتير
و لسه ب نحلم
لسه شعارنا فيكى "تغيير" ...
مطلوب نفهم
...
نفهم مين بيوّجه مين
و مين مسؤول
و لما نحب نكلم مين
و مين هايقول ؟؟
مش هانوافق نبقى ضحّية
ل فلول ماسك فيها نظام
إحنا و الأيام الجاية
حرب ب حرب و مش هاننام
دا اللى يبيع ف كلام و هتاف
يبقى جبان
لما ب صوته هايهتف خاف
يبقى ازاى ف الجد يبان؟؟
حقنا حقك مش هايضيع
علشان إحنا ولاد الحلم
مش هانخاف ب سلاح تجويع
ربنا ما بيرضاش بالظلم
أقسم بالخالق ف عالعرش
أنا لأمانة حبك شايل
أقسم حلمك ما اتكسرش
أقسم عالخاين و القاتل
أقسم لسه يا ثورة مصر
ف كل مكان
ثورة ثورة حتى النصر
و مصر .. ميدان