ابين زين

يسعد صباح حضرتك يا مجلس اللوردات.. سمعنا من يوم ما جيت.. كلام كتير وحاجات.. ولا شفنا غيرت شيء وكأننا أموات.. والأغلبية بتشبه اللى عدى وفات.. سمعا وطاعة وافقنا.. وهيصة واحتجاجات .. وكل شيء زى ما هو.. فى البلد كما كان.. لسه الوزارة ولسه خرستو والدكان.. وكل حبه تقولولنا البلد فى أمان.. وريسك ابتسامته عرضها فدان.. عملتوا إيه فى السولار والغاز وفى البنزين.. وفى الرغيف الحكومى طقة الملايين..وفي الأراضي اللي منهوبة بقي لها سنين..والمليارات التي هربت واحنا مش داريين ..ومجزرة بورسعيد ومين بيقتل مين.. وحتى سحب الثقة اللى إنت قلت عليه.. وإن الحكومة عجوزة وخايفة.. مش عارف من إيه..؟ وكل شيء زى ما هو يا مجلس اللوردات.. وكأن كل الحكاية رواية م الروايات .. والبخت بيقول فى إنه والسبب مجهول.. وأن إنت مجلس كلام وما فيش قرار مسئول .. واهى دورة خدها بقى بالعرض أو بالطول.. وأن كنت قادر تغير.. قوللى رايح فين.. وأنا والودع فى انتظار ردك يا نور العين.. وبكره حأرجع أشوف بختك وأبين زين..