شلاليت

شالوا الوزير.. جابوا الوزير
وكل حبه الناس ياعالم تستجير
نفسى فى رغيف أبيض نضيف
وبدون وقوف فى الطوابير
أنا مصرى معروف من زمان
وبقى لى فى العالم مكان
ومنايا أعيش طالع لى ريش
ومانيش سخيف ولا ألعوبان
فبلاش بقى تغيير كتير
علشان ياناس نعرف نسير
دا مصر مش ناقصه انفلات
من الصغير والكبير
وبدون تعب فيه تعبانيين
عايشين فى كبت ومن سنين
وكل واحد أساله أيه السبب؟
يقول لى قول لي.. أروح لمين؟
الثورة قامت أيوه.. آه
لكن ليه الشعب تاه؟
وفى كل يوم تطبيل يقوم
ما أعرفش طبعا مين وراه
راح أقول لكم رأيى الأخير
أنا مش حاعيش بينكم أسير
واللى حيحكم فيه نظام
بين الأمير.. بين الخفير