ديالوج

تحذير واجب:
محظور على كبار السن ومرضى القلب والضغط والسكر والبلهارسيا
قراءة هذا الحوار حيث إن به مواد قابلة للاشتعال
الدستور: سيادة الرئيس أنت عارف أنا باحبك قد إيه؟
الرئيس: ومين قالك أنى باكرهك!
الدستور: بلغنى أن حضرتك زعلان مني.. عشان عايز صلاحيات أكتر وتبقى ماسك كل حاجة فى إيدك!
الرئيس: يعنى ياسى دستور.. ينفع ابقى رئيس بدون رياسة!
الدستور: حا شا لله.. لكن اللى اتلسع من اللى فات ينفخ فى اللى جاي!
الرئيس: معقول تبقى طرية ومبلوعة مع اللى قبل مني.. وتيجى عندى وتبقى ناشفة.
الدستور: ياعم الرئيس سيادتك بتكلمنى وكأن شورتى من دماغي.. حضرتك تقول الكلام ده للجمعية.
الرئيس: جميعة إيه ياحسرة.. احنا عارفين نجمعها.. ولا مين حقبضها الأول؟
الدستور: بإذن الله هتجتمع وأنا ناوى فى أول جلسة أجيب لهم.. كباب وكفتة.. عشان يبقى عيش وملح
الرئيس: لا وحياة والدك.. خليهم زى ما هما اعمل معروف!
الدستور: خايف يعملوا «روبطية» أو كومبينة!
الرئيس: إذا كانوا لسة ماقالوش بسم الله.. والبعض منهم عايزة رئيس منزوع الدسم
الدستور: حضرتك كدة بتغلط فيا.. وبتتمنى لو تلاقينى دستور نص كم
الرئيس: طيب ما تيجى نعمل اتفاق جنتلمان مع بعضنا!
الدستور: اتفاق إيه!
الرئيس: نبقى حلوين وكويسين وستر وغطا على بعض
الدستور: فهمتك ياريس ياخلبوص..
الرئيس: خلى بالك أنا ممكن اعدلك فى أى وقت يامعدل!
الدستور: كان زمان وجبر واللى فات ننساه
الرئيس: أنت بتحمرلى عنيك ياسى دستور وناسى إنك شوية ورق وبنود.. واقدر أجمع شلة ترزية تبعى يكتبوك على مزاج مزاجي
الدستور: تانى تقول الكلام ده.. وبعدين سيادتك مرشح يعنى ممكن تبقي.. أو عدم المؤاخذة ترجع لصفوف الجماهير
الرئيس: وإذا كان الكرسى محجوز لي؟!
الدستور: ساعتها يبقى لكل حدث حديث.. مش بيقولوها كدة ولا أنا غلطان!
الرئيس: العفو هو اللى زيك يغلط.. احنا بنتعلم منك الصح!
الدستور: شكلك بتقلوظ لى العمة
الرئيس: معناه انك بتعترف بقوتي؟!
الدستور: لا ياحبيبي.. أنا فرحان بنفسى لأنك من هنا ورايح هتمشى على العجين من غير ما تلخبطه!
الرئيس: بأمارة إيه!
الدستور: كفاية إنى أقول نظامنا برلماني.. وحضرتك تبقى بتاع تشريفة.