المجتمع والأحزاب

نادر دياب: أعزائى المشاهدين مساء الخير وأهلا بكم في حلقة جديدة من برنامجكم المجتمع والأحزاب ، يومًا بعد يوم تزداد التحذيرات من سقوط الدولة لا قدر الله خاصة في ظل الصراعات التي تحكم على المشهد السياسي الحالي في مصرنا الحبيبة بل أن البعض يرى أنه من المستحيل ضمان حياة ديمقراطية سليمة وهناك حالة قلق وتربص تعرقل تحقيق أهداف الثورة وتوفر المناخ لفوضى ناجمة عن هذا الإحباط ، معنا اليوم ومع حضراتكم في البرنامج للتعليق على المشهد السياسي سيادة المستشار محمود العطار نائب رئيس مجلس الدولة ، سيادة المستشار كثيرا من المشاكل والإشكاليات القانونية اللي بنعيشها في مصرنا هذه الأيام يمكن آخرها تعليق البرلمان النهاردة مجلس الشعب لجلساته ل 6 مايو اعتراضا على عدم تقديم الحكومة لاستقالتها وسحب الثقة منها وأيضا موضوع الجمعية التأسيسية كيف ترى حضرتك هذا التصور الأخير ؟
المستشار / محمود العطار: أنا عايز أتكلم حضرتك بمنتهى الصراحة
نادر دياب: اتفضل
المستشار / محمود العطار: والوضوح
نادر دياب: دى قناة الشعب وما بنقولش فيها غير الحق
المستشار / محمود العطار: مش عارف أوصل شعوري ومشاعري إنا ببص مصر أم الدنيا بيحصل فيها الكلام اللي احنا شايفينه فيها دلوقتى الشعب المصري كله منزعج مش شايفين حل للمشاكل اللي احنا فيها احنا دولة في حالة خطر ومحدش مصدق الكلام اللي بنقوله ده من كتر ما اتقال إنما أعتقد إن إن شاء الله قبل رمضان اللي جاى واللي فاضل له شهرين مصر هتكون إذا استمرينا في اللي احنا فيه ده وإذا ما ظهرش من ولادها اللي يخافوا عليها ويراعوها ويقولوا مش هنعمل كده خلى حاجة لوجه الله ، حاجة بقى لوجه الله علشان خاطر ولادنا
نادر دياب: سيادة المستشار عاوزين نشوف ناس بتشتغل للبلد زى ما حضرتك بتقول مش للمنصب لا
المستشار / محمود العطار: مش للمنصب ولا حاجة احنا بنقيس المشهد اللي بيحصل في البرلمان دلوقتى الدكتور الكتاتنى أول ما جاء مجلس الشعب أنا لما شفته ما كنتش تشرفت بلقائه قبل كده إنما لقيت رجل متزن ، محترم ، زى ما بيقولوا بالبلدي كده ماسك نفسه داخل متمكن ، حافظ ، وهو حتى اللحظة دى أنا شايف إنه صمام الأمن للبرلمان فيه اتجاهات يعنى أنا شايف إن الدكتور الكتاتنى هو رجل صمام أمان المجلس حتى الآن وأرجو بذلك وأدعو ربنا إنه يمكنه من أنه يعبر السفينة اللي في وسط المحيط الهادي الأطلنطي اللي هو في أغرق حتة فيه أنه يعبر بنا في أمن وسلام وده هيسجل له في التاريخ أعتقد حضرتك إن الحركة الإسلامية اللي احنا كلنا احنا مسلمين كويسين قوى بنصلى ونصوم ونعرف ربنا زى أي حد يعنى إنما في الآخر بنقول اللي احنا شايفينه إن الحركة الإسلامية لما كانت في السجون وفى المعتقلات كانت لها شعبية وزخم وقوة أكثر منها دلوقتى أنا بتكلم بصراحة عشان دى حركتنا في الآخر وفى الأول بنشوف ونرجع لمنهجيتنا ونرجع لأسسنا نلاقى إن فيه شوية مش أنا مش رأيي أنا ، أنا أدعى وأقسم بالله إن أسرتي كلها وعيلتى اتجهت في الانتخابات البرلمانية للمجموعة الدينية وهم النهاردة أسرتي كلها بتسألنى يعنى هنعمل إيه في الانتخابات الرئاسية لا هم مغرضين ولا فلول ولا هم متشددين هم محبى مصر زى حضرتك ، التبريرات اللي بتتقال ما مستش شغاف قلوبنا دخلت عقولنا أصل كنا وكنا لا واحنا بنقول لا مش من موقع العدو احنا بنقول لا من جوه البيت ومن جوه الخوف على حركتنا الإسلامية لحسن هيحصل فيها ما لا يمكن تداركه بعد كده عبر التاريخ كله فنرجو إن احنا نخلى بالنا دلوقتى الموضوع بتاع الجمعية التأسيسية دى إشكالية قانونية إيه حكايتها باختصار اللي استفتى عليه الشعب في شهر مارس واللي نزل في الإعلان الدستوري في صورة المادة 60 بتقول كده بالبلدي علشان الناس ما تزهقش من الكلام القانوني المكلكع أن بعد المجلس العسكرى ورئاسته تدعو مجلسي الشعب والشورى في اجتماع مشترك عشان خاطر يحطوا ينتخبوا هم عليهم المجلسين دول ينتخبوا 100 واحد جمعية تأسيسية تحط الدستور ، حضرتك الجمعية حصل انقسامات جوه المجلس وناس قالوا 50 % وناس 40 % إذا ما كانتش الذاكرة خاينانى اللي قالوا 10 أو 20 % من المجلس وبقية ال100 ييجوا من بره كانوا 7 أو 8 واللي قالوا 50 و 50 كانوا 470 أو 480 أغلبية كبيرة جدا فرق بقى فيما يبدو إن رأى الأقلية بيبقى له احترامه وبيبقى له قيمته، الناس انزعجت قوى من الكلام ده ليه انزعجت من الكلام ال100 وإن شاالله ال100 ييجوا كلهم من تيار سياسي معين خافوا من حاجة هقولها لحضراتكم كده
نادر دياب: اتفضل
المستشار / محمود العطار: دلوقتى أنا تيار سياسي هحط الدستور مش الدستور ده حضرتك إفرض مش أنا المجموعة المحترمة اللي فيها الدكتور الكتاتنى والذين معه وهم محترمين
نادر دياب: تتغير الأغلبية
المستشار / محمود العطار: ولقت الأغلبية إن مصلحتها إنها تعصف بالمحكمة الدستورية لإن دى اللي بتراقب القوانين
نادر دياب: موضوع كلمة مصلحتها دى يا سيادة المستشار هي اللي فيها الكلام لإن الجميع يعمل لمصر
المستشار / محمود العطار: احنا عايزين الكل يعمل لمصلحة بلده مفيش مرة مصر من يوم خوفو وخفرع لغاية النهاردة مرت باللي احنا فيها دلوقتى من خطر حدودنا ال4 كلها والداخل والخارج والدنيا كلها عايزة تشمت فينا وعايزين يفشلوا ثورتنا يعنى حاجة خطيرة جدا والداخل مشتعل لا لازمة وبلازمة والتخوين والحاجات دى كلها اللي احنا معترضين عليها دى حاجة وحشة قوى إنما هنتكلم دلوقتى ليه الناس خافت من إن يكون لك 50 % من جوه مجلسي الشعب والشورى من ناسك وبعدين هتجيب كمان شوية من بره من ناسك فبقى لك احتكار تقدر النهاردة مش عاجبك المحكمة الدستورية عشان هي اللي هتراقب القوانين تعصف بها مش عاجبك النهاردة الجيش تقلل من وضعه في الدستور مش عاجبك مش عارف إيه النهاردة مش من سلطة رئيس الجمهورية إن هو يصدر القوانين وينشرها عملت قانون ، القانون قائم على الدستور بيحفظ التوازن هنا شوية زى الجواهرجي كده يحط هنا حاجة وهنا حاجة
نادر دياب: ميزان الذهب
المستشار / محمود العطار: ميزان من ألماظ علشان يدي السلطة دى والسلطة دى السلطة توقف السلطة مش السلطة تطغى السلطة ولا السلطة تغالب السلطة ، السلطة المطلقة مفسدة مطلقة متعلمينها في شكل وروح القوانين
نادر دياب: اللي احنا شايفينه ده يا سيادة المستشار صراع في مجلس الشعب والحكومة
المستشار / محمود العطار: معلش الثورة عاملة طفرة وعاملة حماس جامد وعاملة نقوم احنا يقوم الكبار بقى يقولوا لهم لا والله امسكوا البلد شوية علشان خاطر كذا إفرض جاؤوا في الدستور اللي جاى وقالوا القانون يصدر ولا عايزين تصديق رئيس الجمهورية ولا هو رئيس الجمهورية برضه محبس وفرملة وعلى الميزان مش عشان خاطر حسابه عشان خاطر البلد اللي انتخبته وهو فقرها وهو شرفها و احنا انتخبناه عايزينه يبقى قوى ، عايزينه يقوم ييجى ينزح سلطاته لحساب كذا دى حصلت على فكرة في فرنسا مع الجنرال ديجول لما جاء لقي الجمهورية الثالثة والرابعة البرلمان متغول على السلطة التنفيذية قال لا أسقطهم وقام الجمهورية الخامسة توازن سلطات قال أنا ما احكمش
نادر دياب: هذا هو الميزان ورمانة الميزان
المستشار / محمود العطار: ورمانة الميزان يبقى أنا النهاردة لما راحوا مجلس الدولة أنا نائب رئيس مجلس الدولة إنما أنا بتكلم بصفتي الشخصية لا أملك إلا هذا مصري ، وطني ، مصري ماشى في الشارع يعنى برضه المجلس قال لك 50 % إيه تاخد 50 % من جوه وبعدين تاخد شوية من الناحية الثانية وبعدين كده يا أخي ما تخلى الأمة كلها تبقى فرحانة بدستورها مش مغلوبة مفيش غالب ومغلوب فيه فرحانين كلنا
نادر دياب: احنا الدين بتاعنا يا سيادة المستشار بيقول يسر ولا تعسر
المستشار / محمود العطار: الدين يسر والله الدين ما دخل في الهند والسند والصين إلا باليسر بتاعنا مش دخل بالمغالبة وإن أنا لحقت عملت فيك وفكرة المؤامرة وفكرة الاستحواذ والتدبر ، بعض الناس لاحظت حتى لو اختلفت التبريرات وقعدنا نشوف لها تبريرات ونقول أصل كان فيه ، أصل المجلس العسكرى وأصل المش عارف إيه اللي قلب المواطن وحكمته وعقله بيفهم والمواطن حس إن فيه بعض المحاولات بقول هكذا رجعنا نقرأ ، رجعنا نقرأ لواحد لا خلاف على وطنيته ولا على دينه رجعنا نقرأ للإمام الشهيد حسن البنا لقينا وهو طبعا حاجة كبيرة قوى يعنى هذا الإمام الشهيد حسن البنا رفض هذا قال الإصلاح التدريجي وإلا إن طالبت بالحق جملة سيفقد منك جملة زعلوا منه شباب الإخوان وانشقوا عليه قال لهم إن وأنا أفهم وأنا أعي وأنا بحاول أعمل الإصلاح التدريجي دعوتنا دعوة دينية ، دعوة كريمة ، دعوة محترما قالوا لا تعرف عمل فيهم إيه حضرتك انشقوا عنه الجماعة وعمل اسم كده يخوف لما تسمعه جماعة أنصار سيدنا محمد حاجة تخوف ، حاجة كده لما عملوا كده رفض قالهم لا انشقوا عنه وكان فيهم واحد اسمه محمد أبو زيد خد المطبعة وخد المجلة وخد مش عارف إيه وهو فضل على موقفه قالوا له يا فضيلة الإمام مش القرآن بيقول والحديث النبوي بيقول من رأى منكم منكرا فليغيره بيده قالهم لا أنا أدعو إلى سبيل ربك بالموعظة الحسنة وجادلهم بالتي هي أحسن فرفض هذا الفكر المتطرف اللي احنا طبيعة الشعب المصري ترفضه وطبيعة الشعب المصري السمحة
نادر دياب: احنا وسطية الإسلام
المستشار / محمود العطار: واحنا الإسلام الكريم السمح اللي الناس تحبنا عشانه مش الإسلام المتشدد اللي كده وإذا كان فيه الحدود وكذا وفيه تطبيق النظرية الإسلامية ده احنا لو ما طالبناش بها نبقى وحشين بس مهد الجو الأول ومهد الأرض ولما ييجى واحد حرامي ما تقطعش إيده وإلا كان عمر بن الخطاب يقول لك وقف حد لقطع الإيد لا ما وقفش حد ولا يجرؤ عمر بن الخطاب ولا أي حد إنه يوقف أي إنسان إنما هو فهم الطبيعة السمحة المرنة للشريعة الإسلامية إيه بقى دخل ده أربطه شوية إني والله أدعو مجلس الشعب الموقر المحترم اللي هو في قلبنا كلنا واللي احنا أقسم بالله انتخبناه إنه يروح التدريب وإنه ما يخوفش الناس وإنه يسيب الناس تحط دستورها وإن مجلس الدولة يبقى واخد وضعه في الدستور محدش وهيحمينا ربنا ويحمينا الشعب عشان عارفين أحكامنا وإنما برضه فيه محكمة دستورية ، وفيه حق رئيس جمهورية وفيه نظام رئاسي وفيه نظام برلماني احنا عايزين النظام اللي محطوط ليس من منطلق الغالب والمغلوب والتحسب لا عايز أقول من منطلق الرحمة والمحبة لكل الناس
نادر دياب: سيادة المستشار البعض بيطالب بعودة اللجنة العليا للانتخابات لتلقى الطلبات من جديد علشان الشيخ حازم والبعض الآخر بيقول عشان اللواء سليمان قانونا ما هو الموقف في حالة زى دى ؟
المستشار / محمود العطار: هقول لحضرتك باختصار
نادر دياب: اتفضل
المستشار / محمود العطار: الشيخ حازم ده راجل داعية إسلامي كبير ومحترم واحنا بنحبه والشعب كله حبه فيه وجه سمح وفيه بساطة كده وبتاع إنما أثير حوله موضوع وهو إن جنسية الفاضلة المحترمة الكريمة الوالدة ، الداخلية قالت ما قالتش إن هي مش أمريكية هي قالت فتحت السجلات بتاعتى ما لقيتش فيها ما يفيد إن هي أمريكية مفيش تعارض أبدا بين اللي قاله مجلس الدولة في الحكم وبين اللي عملته اللجنة العليا للانتخابات هي اللجنة بعتت بقى للدول في الخارجية قاموا قالوا عندها باسبور أمريكي ومن يحمل الباسبور الأمريكي هو أمريكي فيه فرق بقى الجرين كارت إقامة شهر فيه حاجة اسمها بقى إقامة 5 سنين بس ما تغادرش أكثر من 90 يوم دى إقامة إنما ما دام مع حضرتك جنسية أمريكية معناها إنك حلفت يمين الولاء للولايات المتحدة الأمريكية خصومة الشيخ المحترم حازم أبو إسماعيل ليست مع الداخلية وليست مع اللجنة خصومته مع أمريكا يروح أمريكا ويرفع عليها دعوى بكرة ويقول لهم وهم هناك قضاء عادل نزيه لا يوجد هناك إنه بيقف ضد رؤساء الجمهورية بيروحوا يحطوا المعتقلين في كوبا في جوانتانامو ، ياخد حكم منهم بييجى على مصر إنما أسأل يعنى هل حضرتك أو أنا أو أي حد موافق على إن ينزل ناس في الشارع يقولوا وبعدين يمسكوا في المستشار رئيس اللجنة راجل محترم أصل ده وبتاع مجلس الدولة أصل ده تشعر بإنك مش قادر تواجه نفسك وزهقان
نادر دياب: كيف نحاصر هذه الشكوك يا سيادة المستشار ونخرج من عنق الزجاجة بطريقة قانونية سليمة في المرحلة القادمة لا، الوقت عامل حساس جدا
المستشار / محمود العطار: عامل حساس يعنى مش عارف عايز أقول للناس أرجوكم اللي بيحصل ده هيضيع مصر بس كلمتين لو طبقوا مصر كلها هتعوم الالتزام بالقانون لو التزمت بالقانون أتباع الشيخ حازم أبو إسماعيل هنحطهم فوق راسنا بس مش في الميدان نعمل حزب ونشوف يخدم مصر ازاى النهاردة بيقال حاجة غريبة قوى حضرتك بيقولوا إن فيه تمويل حملات انتخابية أقسم بالله ليست تخص الشيخ حازم أبو إسماعيل إنما سمعنا إن فيه تمويل بييجى من بره بأموال مزورة دولارات ومصري متقنة التزوير وإنها ملأت السوق المصري وإن اللي بياخد 100 جنيه علشان يدلى بصوته لإبراهيم وللا لحسين واخد ما يخل بالاقتصاد المصري وإن هتكتشف واحد 100 وللا 200 دولار تطلع تصرفهم بره تلاقى نفسك مقبوض عليك ده من ناحية ، من ناحية ثانية إن ميزانية مصر هناك من الديابة ذئاب في الخارج اللي عايزين يسقطوا حالنا فالالتزام بالقانون النهاردة عشان تيجى حضرتك بعد اللي بيحصل ده تفتح الباب أفتح ازاى لكله وبيقول لك انت فتحت الباب لشفيق كان لازم تفتحه للكل ، القانون اللي صدر ما يمسش غير شفيق أقوم أفتحه ليه لإبراهيم وحسين ، إبراهيم وحسين وعلى ومحمود
نادر دياب: باقي المتضررين برضه قدموا
المستشار / محمود العطار: قدموا واللي خد حقه حد واللي ما خدش حقه ما خدش أزعل لما يقول لك أصل المجلس العسكرى والمحكمة وأزعل
نادر دياب: إشكالية المادة 28 وتحصين قرارات اللجنة
المستشار / محمود العطار: يا فندم المادة 28 فيه وجهتين نظر فيها أنا على المستوى الشخصي أرى إن المادة 28 كان مفروض يبقى فيها يعنى احنا ما بنحبش احنا اللجنة اللي تكون قراراتها نهائية ، فاصلة ، حاسمة ، ما يجوزش الطعن عليها إنما قصاد هذا فيه وجهة نظر ثانية بتقول أن هناك دواعي استقرار انت بتتكلم على منصب رئيس الجمهورية ما ينفعش تتخانق فيه وتروح المحاكم وتقعد مصر من غير رئيس جمهورية 3 أو 4 سنين احنا ماشيين في مجلس الدولة والاتجاهات العالمية إنه حينما تتعارض الدواعي الشرعية والمشروعية والقانون مع دواعي الاستقرار أنا أغلب دواعي الاستقرار ما دام المخالفة ماهياش جسيمة أقول أنا النهاردة أمامي منطق بيقول إن أنا عايز أحافظ على الوضع العام وآخد مثل من اللي حصل في أمريكا من بوش وآل جور لما حصل الاختلاف والمحكمة حكمت لبوش فآل جور ما خدش ناسه ونزل في وسط أمريكا التزم وقال احنا الاثنين مش جايين نضحك على الشعب احنا جايين وأعد نفسي للمرحلة الجاية وأنا وانت كنا جايين خدامين للشعب الأمريكي لا أنا جاى أعمل ولا كذا مش عارف أقول لحضرتك إيه
نادر دياب: قبل ما نختتم هذا اللقاء السريع مع سيادتك يا سيادة المستشار إشكالية الدستور أولا ، الرئيس أولا الناس متخوفة إن الدستور جرى تعطيله فكيف يمكن لرئيس جديد أن يحكم من خلاله وطرح آخر كان بيقول إن بس نحط اختصاصات الرئيس وينتخب الرئيس وبعد هذا يستكمل الدستور أين الصحيح في هذا ؟
المستشار / محمود العطار: الصحيح في هذا أنا النهاردة واحد مرشح نفسه لرئاسة الجمهورية وهيحلف على قسم على إنه هيحترم الدستور أنهى دستور اللي هو هيتحط إن شاء الله يمكن تقول لي أنا رئيس جمهورية جاى أترشح وماشى عاوز أبقى راجل قوى وعندي قدرة بتقول لي لا ده أنا هخليك نظام نيابي تقعد طول النهار والليل قاعد تتخانق مع رئيس الوزراء يقول لك لا أنا مش جاى أضحك عليك أنا جاى أخدمك فمش قابل غير النظام الرئاسي أبقى حلفت امبارح على حاجة وآجى النهاردة أطبق عكسها لا ما ينفعش كده فالمفروض الدستور أولا طب الدستور أولا تصدق بالله حضرتك فيه ناس بتزعل لما يقول لك إن الدستور يتحط في شهر أيوة الدستور يتحط في شهر إذا خلصت النوايات ، الدستور 71 فخر دساتير الدنيا واللي حطه ليس الرئيس السابق ولا أذم عيب لا اللي حاطط دستور 71 الرئيس الأسبق محمد أنور السادات قبل ما ييجى الرئيس السابق ب9 سنين فخر جاب واحد منهم يكفى الدكتور وحيد رأفت اللي قام بمفاوضات مش عارف إيه عشان يرجع لنا طابا
نادر دياب: بلدنا مليانة بخبراء الدساتير وحطينا دساتير لكثير من دول العالم
المستشار / محمود العطار: فيه ودول عربية خدته مننا فيه 20 ، 25 ، 30 تعديل احنا أعلم أنا حطيتهم أنا قعدت سهرت الليل والنهار ، والنهار والليل حتى إني حطيت ال30 مادة اللي هم المفروض يتعدلوا وأعلم علم شخصي إن نقابة الأشراف ذرية سيدنا رسول الله سئمت واستاءت مما يحدث فهي الآن بقيادة نقيبها المحترم تضع الآن مشروع دستور يرضى عنه الشعب المصري ، يحافظ على حقوق الإخوة المسيحيين ، يحافظ على حقوق الشجر والطير ، يحافظ على حقوق المصري في الخارج بس ما تروحش تضرب السفارة وتقول هي دى حرية
نادر دياب: كلمة سريعة في نص دقيقة للثوار زيادة عن اللزوم
المستشار / محمود العطار: الحماس الزائد
نادر دياب: في كل وقت مليونات لا طائل من وقتها
المستشار / محمود العطار: مش عايز أتكلم عليها عشان محدش
نادر دياب: سريعا جدا
المستشار / محمود العطار: والله يا فندم غلط شديد إلى أقصى حدود الغلط تمثل إخلال بالأمن المصري ، تمثل بعضها من الوقفات الاحتجاجية أنا بنظر له باعتبار إن هي عملية غير قابلة إني أنا أتكلم عليها عشان محدش يزعل بتفسخ مصر كلها غلط وأعتقد إن ده يا رب ما يخلى مصر يحصل فيها اللي بيحصل دلوقتى واحنا مش عارف أقول إيه أكثر من كده الكلام مش ساعفنى لإنى شايف إن الموضوع خطير جدا
نادر دياب: كلام حضرتك نابع من القلب وسيصل إلى قلب السادة المشاهدين
المستشار / محمود العطار: أنا أدعو السادة الأشراف اللي قاعدين ليل ونهار ، ونهار وليل يقول لك حق المصري في المأوى أصحي بالليل أقول لا خليه حقه في السكن ، لا حقه في الأكل للشيئ الطيب ، حقه في الصحة ، حقه في الدواء السليم ، حقه إنه لما يكون بره ويحصل له مشكلة ، فيه 25 أو 30 بند لو تموا هيصلح الدستور والدنيا كلها تقدر تعوم
نادر دياب: إن شاء الله المرحلة الانتقالية معروف إنها من أشد وأخطر المراحل على أي دولة بتقوم بثورة زى الثورة العظيمة اللي قمنا بها في الخامس والعشرين من يناير ، في نهاية هذا اللقاء نشكر السيد المستشار محمود العطار نائب رئيس مجلس الدولة
المستشار / محمود العطار: حفظ الله مصر
نادر دياب: حفظ الله مصر دائما شكرا لكم أعزائى المشاهدين وإلى اللقاء .