مرسى يكلف باسم يوسف بتشكيل الحكومة الجديدة

ليل داخلى
المكان مقر سرى
المشهد الأول
اجتماع هام وخطير لبعض قيادات الإخوان للخروج من الأزمة الحالية، وينظر المهندس إالى الحاضرين قائلا: لدى فكرة لازم ننفذها خلال الساعات القادمة.
الحضور: نظرة تعجب وانبهار مرددين خلال الساعات القادمة لا بد أن الموضوع فعلا خطير.
المهندس: علينا استبعاد قنديل وأن يحل محله شخصية محبوبة لدى الشعب المصرى ونعمل على ترويضه كما فعلنا مع غيره.
البلاجى: الله عليك يا فنان بس مين الشخص ده.
الكتان: لازم يكون يحب الإخوان ومطيع لهم ده ضرورى.
الكبير: بهدوء أعتقد الاختيار هيكون صعب خاصة مفيش حد حاليا بيحب الإخوان.
المهندس: إيه رأيكم فى اختيار الدكتور باسم يوسف.
البلاجى: ننن نعم مين دة ماسح بينا الأرض مستحيل لا لا.
الكتان: والله فكرة أكثر من رائعة.
مرسى: معقولة يا باشمهندس.
المهندس: هوده الشخص المناسب.
أبو القمصان: أنا معاك بس يمكن هو يرفض ودا أكيد هيحصل.
المهندس: يا ريت يبقى عملنا اللى علينا والشعب يعرف أنهم بقى على الفاضى وأكيد دى هتكون ضربة فى الصميم
لاقت الفكرة استحسان من الجميع.
المهند س: نفذ يا دكتور
مرسى: حاضر وينظر حوله لرجال الرئاسة أريد باسم يوسف حالا
المشهد التانى
ليل خارجى
اتجاة سيارات الرئاسة إلى الشارع المؤدى إلى منزل باسم يوسف.
وعلى طريقة أمن الدولة يذهب رجال مرتدون ملابس فخمة نظارات شمسية ويصلون إلى الدور الخامس حيث يقطن باسم.
10 رجال أشداء أقوياء أجسام ضخمة حاجة كدة تخض رن جرس متواصل.
باسم يوسف: من الداخل مين أنا جاى يا عم والنعمة جاى يا عم الجرس هيتحرق.
والله أدفعك تمنه ويفتح الباب يجد أمامه الكتل البشرية.
يتراجع إلى الوراء ويقول أنا هدفع تمن الجرس
وبعدين ماما هى اللى قالت وبعدين موضوع الجرس دة مش مهم انتم أحرقوا الجرس بلا صداع.
وينظر إلى أحدهما قائلا: نفسى أعرف مين اللى اخترع الجرس أصلا وماله الباب والتخبيط علية يا راجل دى عالم فاضية
باسم: نعم خير وهو أنتم خرس يهرش فى شعرة والنعمة شكلكم خرس.
أحدهم: الدكتور باسم يوسف.
باسم: لا.. قصدى كنت دكتور لكن دلوقتى الله وأعلم.
شخص آخر: حضرتك مطلوب لمقابلة الرئيس مرسى.
باسم: يضرب على جبينه إيه هو أخد الموضوع بجد يا عم أنا بهرج والنعمة لا مؤاخذة بناكل عيش زى الريس كدة يعنى أهو كله بياكل عيش.
كبيرهم: لو سمحت تعالى معنا من غير شوشرة.
باسم: وشه يصفر ويخضر ويحمر يردد هما قالوا أمن الدولة راحت فين ويضحك ويشير بيديه أمن الدولة أهم.
كبيرهم: أرجوك معاليك مطلوب فورا.
باسم: آه لا النبرة تغيرت عن زمان ويصرخ ثورة بقى:
هنا معاليك ولو سمحت.
وهناك بقى أنت مين ياض وهات ضرب يا معلم وسلم لى على معاليك.
ويضع يده على قفاه وهات يا احترام وبعدين أنا مش فاضى عندى البرنامج دلوقتى الجمهور مستنى.
كبيرهم: اسمع إحنا صبرنا على معاليك كتير لو سمحت.
باسم أنا اللى رعبنى حكاية معاليك دى أكيد بعدها احترام يليق بمعاليك.
كبيرهم: بعد مط شفايفه لقدام خلاص أنا آسف هاتوه.
ويهجم الرجال وباسم يصرخ لا عيب يا باشا ما يصحش الناس هتفهم الموضوع غلط طيب الريس نفسه هيفهم الموضوع غلط يا محترم البجامة ها تتخلع خلاص خلاص أنا جاى بس أغير هدومى ممكن.
كبيرهم: قلت هاتوه.
باسم: يصرخ على فكرة أنا خلاص لغيت البرنامج لا أنا هاسيب البلد كلها.
ناس تراه فى المصعد وهو يبتسم أبدا ما حدش يفهم الموضوع غلط الريس مرسى عايزنى فى موضوع يتعلق بالبجامة أنا بجيبها منين وكدة يعنى وعايز يشوف القماشة بنفسه وتحديدا وأنا لابسها.
يخرج من المصعد ورجال الرئاسة لم يجعلوا أحد يراه.
باسم: يركب العربية وينظر إلى النيل والله مصر حلوة قوى بالليل والنيل كمان ولا الأهرامات حلوين هما دول اللى عايزين يأجروهم والله أحسن الشعب مش عارف قيمة الحاجة دى.
كبيرهم: دكتور باسم قدمنا دقائق وتبقى عند الريس.
باسم: شوف حضرتك الغل والحقد والكراهية بيقولوا البلد فيها مظاهرات والبلد مخنوقة وزحمة فين فين فعلا الناس بتهول دا إحنا مفيش دقائق وصلنا بيت الريس يا سبحان الله.
يا إخوانا ما يكونش إحنا فى بلد تانية حد يفهمنى مفيش ولا حتى كلب فى الشارع إيه هما الإخوان رشوا سم فى الشوارع ولا إيه.
هو الشعب كله راح وأنا الوحيد اللى قاعد.
ملامح كبيرهم تتغير ويشير له من فضلك اسكت وجهز نفسك.
باسم: لا كله إلا الشرف لا أنا أروح فيكم فى داهية.
كبيرهم: يا دكتور لو سمحت ثوانى وتبقى قدام الرئيس.
باسم: يلطم يا ليلتك السودة يا باسم ممكن أتصل بالجمهور بتاعى.
- فجأة يجد نفسه أمام الريس.
الريس مرحبا أهلا يا دكتور إيه الحلاوة دى دا أنت أحلى من التليفزيون بكتير.
باسم ممسك ببنطلون بجامته: يا نهار أسود ويصرخ لا يا ريس لا أرجوك شرفى.
مرسى: يصفق هايل أنت فعلا كوميدى رهيب «تعالى» جنبى.
باسم: سيادة الريس أنت عايز منى إيه بالضبط.
الريس: عايزك تشكل الحكومة وتبقى رئيس الحكومة.
باسم: يلطم ده مقلب صح وأنا اللى فاكر نفسى أحسن واحد يعمل مقالب.. اسم الله عليك ها هاهاه تفوقت على وعلى عائلتى كلها.
الريس: مكشرا أنا لا أمزح الآن أكلفك بتشكيل الحكومة أمامك 72 ساعة وتعلن عن تشكيل حكومتك.
مرسى: وصلوا رئيس الحكومة الجديد إلى بيته وتعيّن حراسة على بيته مبروك عليك الحكومة دكتور.
باسم: حكومة مين ومين ممكن يا ريس يغمى عليا.
الحلقة القادمة باسم يشكل الحكومة ويبدأ الصراع.