البيه العراف

عن ناس سرحت ويا خيالها
وبتقتل في بنات أفكارها
وتصدق في كلام تخاريف
وعن ناس غلبانة تصدقها
من كلمة هتقدر تكسبها
والناس التانية دى ملعونة
وإيمانها ضعيف
فنجان مقلوب وطبق فاضي
والبيه العراف قال مش راضي
يحكي المضمون
علشان شايف حزن كبير
بيسابق صوت الغِربان
وبيقتل أحلام الخير
والشر هيبقى الكسبان
وفي جنب الفنجان من جوا
قال شجرة وتحتها مدفون
أوراق العمل المسحور
واللون الأسود منشور
نحو سكة سفرها طويل
وبيحكي من غير تفاصيل
وزبونه مِركز في كلامه
أو واقع تحت التأثير
فيقول له طلباتك أيه
أؤمرني يا سَيدنا وقول
وأنا ألبي على طول وأجيب
أنا خدامك
أنا محسوبك
فيقول له على فرخة يتيمة
على نملة مالهاش أخوات
يفرش له سجادة قديمة
ويقول له دا بساط مسحور
وهلف الدايرة وهتدور
وبأيدي هتعيش مسرور
وهنعمل لك دقة زار
علشان كام عفريت جبار
لابسينك من غير إنذار
وهو لعلك أحلى بخور
وهاتمتم بكلام على نار
تتحول فجأة لأطلال
ورمادها بَركته تشفيك
وهتنزل ساعة الفجرية
تغسل رجلك جوا النيل
والعصرية تعدي عليَّ
هعمل لك بالشَبَكة حِجاب
يفتح عندك أيها باب
طب بالذمة يا ناس
مين صدق؟
إن القدرة لغير الله
وإن المكتوب مش هتشوفه
لو سلمت لعقل مُنجم
كُتر الجهل في قلبه عماه
مش هيفيدك مخلوق زيك
دي الرحمة من عند الله