عن ناس سرحت ويا خيالها و بتقتل فى بنات أفكارها و تصدق فى كلام تخاريف ********** و عن ناس غلبانه تصدقها من كلمه هتقدر تكسبها و الناس التانيه دى ملعونه و ايمانها ضعيف ************* فنجان مقلوب و طبق فاضى و البيه العراف قال مش راضى يحكى المضمون علشان شايف حزن كبير بيسابق صوت الغِربان و بيقتل أحلام الخير و الشر هيبقى الكسبان ********* و فى جنب الفنجان من جوه قال شجره و تحتها مدفون أوراق العمل المسحور و اللون الأسود منشور حوالين سكه سفرها طويل و بيحكى من غير تفاصيل و زبونه مركز فى كلامه أو واقع تحت التأثير فيقوله طلباتك ايه أؤمرنى يا سَيدنا و قول و أنا ألبى على طول و أجيب انا خدامك انا محسوبك فيقوله على فرخه يتيمه على نمله ملهاش اخوات و يفرشله سجاده قديمه و يقوله دا بساط مسحور و هلف الدايره و هتدور و بايدى هتعيش مسرور ******** و هاتمتم بكلام على نار تتحول فجأه لأطلال و رمادها بَركته تشفيك و هتنزل ساعه الفجريه تغسل رجلك جوه النيل و العصريه تعدى عليا هاعملك بالشَبَكه حِجاب يفتح عندك أيها باب ********** طب بالذمه يا ناس مين صدق؟ ان القدره لغير الله و ان المكتوب مش هتشوفه لو سلمت لعقل مُنجم كُتر الجهل فى قلبه عماه مش هيفيدك مخلوق زيك دى الرحمه من عند الله ************** الشاعره/ سهام سامى