"حوار الرئيس".. "هاشتاج" للسخرية من حوار مرسى قبل وبعد الحوار.. خالد منتصر: "بيدور على أنيس عبيد.. "إبراهيم": بعد قليل بقيت 5 ساعات.. "أكرم": لما دى الساعة 8 بتاعتكم أمال 4 سنين هتبقى إزاى

عبر نشطاء "تويتر" عن سخريتهم من تأخر إذاعة حوار الرئيس مرسى على قناة المحور، والذى استمر ل5 ساعات، واستمرت هذه الحالة حتى بعد إذاعة الحوار نتيجة لما وصفوه بالكلام غير المفهوم وغير المقنع أيضا، خاصة فى التبريرات التى كان يقدمها لحكومته التى وصفها المذيع عمرو الليثى بالفشل، حتى أن النشطاء قالوا إنه يجب أن يشرب المشاهد قهوة وترامادول ليحاول فهم حوار الرئيس، فيما دشن عدد من النشطاء "هاشتاج" بعنوان "خطاب الرئيس".
قبل الحوار، سخر الإعلامى الدكتور خالد منتصر من تأخره قائلًا: "حوار مرسى اتأخر لأنهم بيدوروا على أنيس عبيد مش لاقيينه؟".
وقالت الناشطة دينا يوسف: "كده الحوار مش هيبقى فيه غير.. بسم الله الرحمن الرحيم.. أهلى وعشيرتى سعدت بحوارى معكم الليلة.. التتر.. مونتاج".
وكتب رواد على "تويتر": " كل الأغانى الوطنية خلصت وهنبتدى نذيع الأغانى الوطنية السودانية. ويعنى متذيعوش خطاب الرئيس وقناة التيت فى نفس الوقت أين البرلمان؟ وأول مرة أعرف أن بعد قليل بقت بعد 5 ساعات نهضة. وخطاب الرئيس: الأرض أرضٌ.. والسماءُ سماءُ.. والماءُ ماءٌ.. والهواءُ هواءُ. وخطاب الرئيس اشمعنى ممنوع من العرض.. الرقابة منعته أصله فيلم إباحى.. مش ضرورى تخطب النهاردة طب اقرأ فاتحة".
وقال آخرون: "واضح أن المحور اتنحست ومش عارفين يذيعوا خطاب الرئيس. والواحد المفروض يأكل ساندوتش مخ قبل ما يسمع. وياجدعان قوموا ناموا خطاب يشل كالعادة النوم أفيد. وطب اطلع يا مرسى ومش هنتريق عليك. وتقريبًا الحوار أتأخر علشان بيحاولوا ترجمته للعربية. والخطاب كان هيتذاع فى معاده.. بس الواد بتاع المونتاج شاف التسجيل جاله شلل رباعى ومش لاقيين حد مكانه. ويكونش قصدهم 8 بتوقيت قطر. وحوار الرئيس شلل شعب خطاب الرئيس رخم على الشعب إيه ياعم فى إيه دى لو كانت ولادة متعسرة كانت زمانها ولدت.
فيما أضاف آخرون: "آهو شوفتوا مش اتريقنا على مرسى عشان كان بيبص عالساعة آهو خلى مصر كلها تبص فى الساعة. وأى كان سبب تأخر خطاب الرئيس مرسى فهو استهتار بحجم وقيمة الشعب المصرى. ومرسى لسه مستنى الكرافتة الموف الغامق الهاند ميد تنشف زمان المرشد لسه بيسمعله اللى هيقوله! يا مرشد إنت تمده على رجليه وتطلع خيرت مكانه وقول ظروف غباوة وريح نفسك. ويا عم ده لو كان بتوقيت الهند كان زمانه طلع.
وقال الناشط السعودى خالد الناصر: "تضامنا مع الشعب المصرى.. سهران انتظر"
وقال آخرون: "بناشد قناة المحور تبطل أغانى وطنية وتشغل.. شوقنا أكتر شوقنا.. هما قالوا إنه الساعة 8 بس ماقلوش سنة كام. وخطاب الرئيس إحنا لا نتردد وأبدا لا أتردد. (ساعة إلا ربع هرى) والسلام عليكم ورحمة الله وبركاته. ولما هى دى الساعة 8 باليل بتاعه مرسى. أمال ال4 سنين بتوعه عاملين ازاى. وخطاب الرئيس يا دى النيلة هو ده الحوار اللى حنعيط منه ونقول أدوله فرصة خربتوا البلد مبارك استايل الحوار التانى عيط يا شعب الريس مرسى العياط.
فى حين رأى آخرون أن: "هوا الراجل ده بيتكلم عن التوكتوك والقانون.. هوا التكتوك بقى قانونى. والراجل ده بيتكلم كلام زى الفل بس محتاج كوبيتين قهوة وحبيتين ترامادول و16 صندوق بيرة. ويا مستر مورسى أنا لسه عامل عمرة ومش عايز أضيعها بجد أنا هروح اتفرج على غرام وحنين أحسن. وأنت إيه بقى أم خطتك عشان تحقق عائد وإنتاج. إنك تبيع البلد بالصكوك. وأحنا قومنا بالثورة وأنت عارف.. معلش سورى أحنا اللى هو مين؟ أنت مصدق نفسك".