أحيه يا أبو سوسو!

كنت أسير هائمًا فى شوارع قريتنا الصغيرة....أحاول أن أعب من هوائها النقى مايملأ رئتاي.. من بعيد لاح أمامى ابن عمى ... زينت قسمات وجهه أبتسامة عريضة.. ما أن رأنى حتى ابتدرنى بقوله: الناس كلها متجمعة غربى البلد وأنت قاعد هنا بتتمشى؟
والناس متجمعة ليه غرب البلد؟
عاملين حفلة للواد مسعود الدوكش
ليه هو أتجوز؟
لا يابن عمى بس مسعود الدكش نجح أنه يروح القاهرة ويرجع فى القطر مرتين ورا بعض من غير ما يتحرق أو يتخنق أو تحصله حادثة والناس كلها راحت تباركله... زى مانت عارف يابن عمى إن آخر واحد عمل الموضوع دا كان على ابن الحاج حسين الله يرحمه اللى راح ومرجعش تانى ومراته دايخة على المعاش والتأمينات بتاعته لغاية دلوقتى ....
إلا قولى يابن عمى هو الدستور الجديد أتكلم عن التأمينات؟
مرة أخرى يسألنى ابن عمى ويجرنى لتقمص دور كبار المفكرين.. ملأت صدرى بالهواء وأخذت وضع العظماء وقلت له: طبعًا يابن عمى الدستور الجديد نص على كفالة معاش لكل مواطن.. يعنى خلاص بمجرد ما يتم تطبيق الدستور الجديد مش حتلاقى واحدة دايخة قدام التأمينات ومحدش حيخاف أنه يطلع معاش لأن كل مواطن حيطلع معاش حيبقى ضامن معاش وتأمينات كريمة ليه ولأسرته... الحياة حتبقى سهلة وجميلة وساعتها الحياة حتبدأ فعلا بعد الستين...
قاطعنى ابن عمي: يعنى مش حنلاقى متسولين ولا أسر ضاعت بعد مايطلع اللى بيعولها على المعاش ولا ...
قاطعته قائلًا: لا لا لا ....الدستور الجديد حيلغى كل دا .... دا أنت مش بعيد لما تطلع على المعاش ويبقى معاك فلوس كتير تطلع رحلة لمارينا وتتفسح ... ولا أقولك بلاش مارينا أنت ممكن تقضى أسبوعين فى جزر الهاواى ....حسنا ابن عمى لابد من الإيضاح ...جزر الهاواى هذه مكان سيذهب إليه كل المصريين لقضاء أوقات ممتعة هناك بعد الدستور الجديد... ولابد أنك يابن عمى ستشترى سيارة جديدة بعد المعاش ولن تقلق على اولادك ال 12 اللى أنت ناوى تخلفهم فالمعاش حيكفى ويزيد ....
ابتسم ابن عمى قائلا: ياااااااااه والله كلامك أثر فيا يابن عمى دا لو دا حصل ياااااااااااااه عشتنا حتبقى فل .... بس تقدر تقولى الحكومة حتجيب الفلوس دى كلها منين إذا كان هما مش قادرين يصرفوا زيادات العلاوات بتاعة 2005 و2006 و2007 لغاية النهاردة وبعد الحكومة ما أخدت الرصيد بتاع صندوق العاملين عشان تعالج عجز الميزانية ....
أصابنى كلامه بصدمة ولفت نظرى لشيء لم يكن فى حسبانى فصرخت فى وجهه ...عجز مين؟ ..فرد: عجز الميزانية... لم أجد ردا سوى ..... أحيه يا أبو سوسو أحيه!!