شباب "فيس بوك": الشعب "أفش" على الإخوان.. وقرر يخاصمهم !!

"إنما الأمم الأخلاق ما بقيت فإن هم ذهبت أخلاقهم ذهبوا " شعار رفعه أنصار مرسى فى إطار حملة تدعو للأدب، وعدم استخدام الألفاظ الخارجة فى التعامل مع الرئيس، شباب فيس بوك سخروا من الحملة، وقال نبيل عبد الله: فيه مجموعة ما شافت فى لحظة تجلى عبقرية ونادرة، إن مشكلة البلد الكبرى هى إن ناسها مش "مؤدبين" كفاية، علشان كده أطلقوا حملة راقية ونبيلة اسمها حملة "مهذبون.. معاً لنرتقى".
الحملة اللطيفة الظريفة ال "سو كيوت" دى بتطلب من الناس قدر أكبر من "الهدوء والبرود والنحنحة والسهوكة" على أمل أن الناس تبطل تغضب وتبطل "يبقى عندها دم"، وتتخلى عن متنفس الشتائم وتختار بدلاً منه أن تموت غيظاً وقهراً.. أو أدبًا.
واحدة من فاعليات الحملة اللى انتشرت كانت تعليقًا على صورة وقالوا: "ما تقولش العربية دى لونها زفت.. ممكن تخليها: العربية دى لونها مش لذيذ".
ملحوظة ما ينفعش تتفوت: الحملة منظمة تنظيم جيد والجهة اللى وراها تجيد التسويق، حيث إن عدد أعضاء صفحتها على فيس بوك وصل ل 55 ألف مؤدب.
ونحن من باب إعجابنا بالحملة اللذيذة، قررنا المساعدة عن طريق اقتراح أفكار لحملاتهم القادمة:
- "ما تقولش سياسة مرسى رئيس الجمهورية زى ال "الزفت" وهتودينا فى ستين داهية.. لأ ممكن تخليها: سياسة مرسى مش حلوة وهتعمل للبلد واوا"
- "ماتقولش مشروع النهضة مشروع ماجبش للبلد غير مصايب وكوارث.. لأ ممكن تخليها: مشروع النهضة مش لطيف ومن ساعة ما شفناه وتحس كده أن البلد ما بقتش عسولة".
" لما تلاقى أصحابك بيتقتلوا ويتعذبوا ويتصابوا بعاهات ويتسحلوا علشان لسه متمسكين بالثورة وأهدافها ما تقولش ل مرسى وجماعته: أنتم لازم تتحاكموا زى مبارك وجماعته.. لأ ممكن تقول ل مرسى وجماعته: إيه ده؟ عيب كده.. ما يصحش!".
"ما تقولش مرسى هو مبارك ولا قنديل هو نظيف .. لأ ممكن تخليها: مرسى وقنديل فيهم شبه بسيط من مبارك ونظيف.. ويخلق من الشبه أربعين!".
"ما تقولش الثورة تم سرقتها ومافيش ولا هدف من أهدافها اتحقق ولا هيتحقق على إيدين اللى ماسكين البلد.. لأ ممكن تخليها: الثورة تم اقتباسها وأهداف الثورة اتأخرت ولسه ما وصلتش.. لعل المانع خير وربنا يجيبها بالسلامة .. وكل تأخيرة وفيها خيرة".
"ماتقولش أن الشعب جاب آخره خلاص وحالف لينتقم من مرسى والإخوان.. لأ ممكن تخليها: على فكرة بقى الشعب آفش من الإخوان جامد ومخاصمهم".
وأخيراً "ما تقولش إن دى حملة تافهة ومستفزة ورخيصة وبتحاول تقنعنا إن مشكلتنا إننا مش مؤدبين ولو بطلنا نشتم هنكتشف أن الدنيا ربيع والجو بديع" .. لأ ممكن تخليها.. أو ما تخليهاش.. ما تقولش حاجة خالص .. إكتم فى قلبك واسكت.