صافيناز تكشف الجانب الإنساني في شخصيتها: «ياريت نعمل حفلات مجانية للغلابة»

اشتهرت الراقصة الروسية صافيناز بحركاتها خلال استعراضاتها بعدما ظهرت في كليبات أغانٍ مصورة ما فتح لها باب المشاركة في السينما، فقدمت رقصة على أنغام أغنية «على رمش عيونها» لوديع الصافي في فيلم «القشاش» عام 2013، ثم تهافتت عليها الأدوار السينمائية، وبسرعة شاركت في بطولة فيلم «عيال حريفة» عام 2014، كل ذلك لم يكن في حسبان الروسية التي هوت رقص الباليه وتركته من أجل امتهان الرقص الشرقي، وبعدما تنقلت بين بلدان عربية وجدت مستقرها في مصر.
«صافيناز» حلّت ضيفة بحلقة أمس الثلاثاء في برنامج «ساعة مع المستشار»، المذاع على قناة «إل تي سي»، وكشفت خلاله عن الجانب الإنساني من حياتها، وعن أسباب حبها وعشقها للعيش في مصر، وتطرقت إلى موضوعات أخرها نرصدها في السطور التالية.
- «هشجع مصر في المونديال»
ذكرت صافينار أنها سافرت إلى بلاد كثيرة وعملت بها راقصة، ولكنها استقرت في النهاية بمصر، موضحة سبب ذلك بقولها: «عشان الحب اللي حصل ما بيني وبين مصر، محصلش في أي حتة تانية، هما بيحبوني وأنا بحبهم»، موضحة أنها ستشجع المنتخب المصري في منافساته في كأس العالم المزمع عقدها هذا العام في روسيا، وتمنت فوز مصر على بلادها بالمونديال: «أنا روسية الجنسية، بس يوم ما جيت مصر حسيت إني مصرية، ومن ساعتها وأنا مع المصريين وبشجعهم».
- «كنت مبسوطة في مقابر الغفير»
تحدثت الراقصة الروسية عن أول زيارة لها إلى مقابر الغفير في القاهرة، قائلة: «لما روحت تعبت من جوايا، عشان دي أول مرة أشوف حاجة زي كدا، هم فرحوا بيا أوي، بالصدفة كنت بتفرج على برنامج بيتكلم عن الموضوع ده، فكلمت المذيعة وقولت لها إني عاوزة أنزل معاها، أنا من زمان وأنا عاوزة أشوف الناس عايشين في مصر إزاي، مش كل حاجة أفراح 5 نجوم، أكيد فيه عالم تاني وأنا كنت عاوزة أخشه»، وتابعت: «كنت مبسوطة إني هساعد الناس دي بأي حاجة، بس بصراحه هما خوفوني كتير، وكنت متفقة مع أصدقاء ليا إننا نروح، بس هما اختفوا مرة واحدة كدا».
ودعت الفنانين والمطربين بالتبرع من أجل الفقراء، قائلة: «الحقيقة مش بشوف فنانين كتير بيتبرعوا عشان خاطر الفقراء دول، سعد الصغير بشوفة بيعمل الحاجات دي من زمان.. يا ريت نتجمع مع بعضنا ونعمل حفلة للناس الغلابة»، وأكدت صافيناز أن حب المصريين لها أكثر شيء أسعدها، لاقتة إلى معاناتها من مشاكل كثيرة في مصر لكونها راقصة أجنبية، معربة عن أملها في حل هذه المشاكل.
- «مقدرش أبعد عن مصر أكثر من 10 أيام»
أكدت صافيناز حبها وعشقها لمصر، قائلة: «لفيت في أماكن كتير ولسه اللي جاي كتير، واللي جاى هنعمل برنامج لترويج الساحة في مصر.. لو خيروني بين أن عيش في مصر وأي بلد تاني هختار مصر، مش بعرف أبعد عن مصر كتير مبقدرش أبعد عن مصر أكثر من 10 أيام».
- «كنت هضرب نفسي بالجزمة للسبب ده»
تابعت: «روح الدعابة والفكاهة عند المصريين مش بلاقيها في البلاد التانية خالص، ما حدش عنده خفة الدم المصرية، أنا لفيت أماكن كتير برا قبل كدا ما شوفتش مدن زي حلاوة شرم الشيخ، في مرة كنت عايزة أضرب نفسي بالجزمة لما سبت مصر وروحت إسبانيا عشان أقضي الصيف هناك».
- «ما كنش فيه أمان في 25 يناير»
كشفت صافيناز رأيها في أوضاع البلاد المصرية حاليا، مشيرة إلى أنها حضرت إلى القاهرة بحثًا عن عمل لها بالتزامن مع ثورة 25 يناير، وأضافت: «الأوضاع في مصر دلوقتي اتغيرت كتير عن أيام الثورة، كنا خايفين جدًا عشان ما كنش فيه أمان، أيامها كان فيه نمر كتير مش بترضا تنزل عدم الأمان، وجه عليا فترة كنت بنزل لوحدي وما فيش حد معايا، بس كان قلبي جامد ساعتها».