مواطن ل«التحرير»: «ذهبت لتجديد بطاقتي قالوا إنت ميت من 8 سنين»

وائل "مازحت أصدقائي أنني أعلم من لم يحضروا العزاء واحد واحد وإن عفريتي هو من يعيش معهم وقولت الله يرحمني"
الفيوم – أسماء أبو السعود

عانى مواطن غير قادر على تجديد بطاقته منذ عام 2011 إذ لم يكن يعلم السبب حتى فوجئ منذ أيام قليلة بأنّه مقيد "وفاة" في السجل المدني منذ 8 أعوام.
وقال وائل رجب أنور محمود (34 عامًا) ل"التحرير" إنه يعمل موظفًا بقطاع كهرباء شمال الصعيد وتحديدًا بمحافظة الفيوم، لافتا إلى أنه يعاني من أجل استخراج بطاقته منذ عام 2011.
ورى وائل مشكلته ل"التحرير" قائلًا إن بداية القصة خلال أيام التصويت على الدستور والانتخابات حين كنت أدخل على اللجنة العليا لأعرف عنوان لجنتي ورقمي لكن كان دائما تظهر نتيجة "خطأ" ولم أعرف السبب وقلت وقتها (مش مشكلة).
وتابع: "لحد لما جيت أجدد البطاقة بتاعتي اللي بحاول أجددها من 2011 وبفشل ومش عارف السبب إيه، وفي شهر أكتوبر اللي فات اشتريت استمارة وعملت كل الإجراءات وختمتها من جهة عملي، ورحت أطلع البطاقة كل يوم أسأل عليها يقولوا مجتش من المنيا، لحد لما سألت واحد صاحبي بيشتغل في السجل المدني في طامية واتفاجئت إنه بيكلمني بعد كام يوم بيقولي البقاء لله الاستمارة بتاعتك جات ومكتوب عليها (البيان المطلوب مربوط وفاة بتاريخ 8 يناير 2009 ولا يمكن استخراج بطاقة له، يعني إنت ميت بقالك 18 سنة)".
وابتسم وائل وهو يكمل حديثه: "أول حاجة عملتها إني دخلت على صفحتي الشخصية على فيسبوك وكتبت (يا جدعان أنا بعمل بطاقة من شهر ١٠ /٢٠١٦ ومكنتش عارف ليه مجتش لحد دلوقتي النهارده واحد صاحبي كان في السجل ولقى الاستمارة راجعة من المنيا علشان البيانات اللي أنا مسجلها غلط، وإن أنا متوفى من ٢٠٠٩ الله يرحمني بقى، واللي مجاش العزا أنا عارفهم واحد واحد، واللي عايش معاكم ده العفريت بتاعي أنا عايز البوست ده يلف مصر كلها يمكن أبقى حديث البلد وننسى المنتخب شوية بس وحياة أبوكم محدش يبلغ الشغل هيتقبض عليا، وهتبقى أيام هباب وتعالى بقى إحنا لينا فلوس عندك وأدخل في س و ج، أقسم بالله مسخرة، ادعولي بقى ربنا يرحمني، الميت الحي)".
وعبر المواطن عن استغرابه قائلًا "مش عارف إزاي أنا ميت عند الحكومة وبالرغم من كده أنا بروح شغلي يوميًا وبقبض مرتبي كل شهر من غير أي مشاكل".
وطالب إدارة السجل المدني بتعديل الخطأ، وتصحيح بياناته واستخراج بطاقته مرة أخرى.