قصة طبيب تعلم خياطة الجروح في «الكوارع» قبل المرضى

نشر طبيب يدعى محمد خيري فايد على حسابه الشخصي عبر موقع التواصل الاجتماعي فيسبوك، اليوم الإثنين، صور لأول تجارب خياطة جروح مرضى له خاصّة أنه لا زال يتعلّم كيفية عمل ذلك.
وقال الطبيب: "وأنا امتياز رحت مستشفى ف منطقه مليانه بلطجيه .. كانت حالات الخياطه اكتر من قياس الضغط .. بس المشكله ان البلطجي لما تيجي تخيطه بيوترك: - اخلص اضوكتور عشان آخد حقي .. ولو انت رعشت او توترت حتنضرب انت.. كان لازم اشوف طريقه اتعلم بيها اخيط بسرعه وبكفاءه وتحت ضغط".
وأضاف: "لقيت احسن حل اني اجيب «كوارع» وآخدها خياطه رايح جي .. فرحت اشتري كوارع: لو سمحت انا عايز كوارع.. احلى كوارع وتعمل عليها شوربه وحقطعهالك تقطيعه عنب.. لو سمحت متقطعاش .. اصل مش حاكلها نضفها بس مش حتاكلها.. امال حتعمل بيها ايه عدم اللا مؤخذه .. طبعا مرضيتش اقوله ع موضوع الخياطه ليفكرني اهبل .. ممم .. عايزها ف ابحاث كده معلش .. ابحاث .. هأو .. عشنا وشفنا الكوارع بقت ليها ريحه اللازمه ف الابحاث .. نضف يبني الكارع ده من غير تقطيع واديه للاستاذ بتاع الأبحاث".
وتابع: "المهم رجعت البيت واتدربت ع كل انواع ال stitching و ال sutures لحد م بقيت اخيط بسرعه جدا وانا بسمع اغاني كمان. .رجعت بقا المستشفى وبقيت اخيط كل الحالات وصاحبت البلطجيه .. بقيت اخيطهم بسرعه عشان يرجعو يكملوا الخناقه .. وفيه منهم بلطجيه هفآت كانوا يتخيطوا ويرجعوا يكملوا الخناقه فينضربوا تاني وييجوا يتخيطوا ف حته تاني وهكذا .. بس كان عاجبني اصرارهم الصراحه . كان ناقص احط يافطه ع باب المستشفى الخناقه عليك .. والخياطه علينا ".