أديب: «الزمالك مش هيشوف الدوري تاني والموسم اللي فات صدفة لن تتكرر»

علّق الإعلامي عمرو أديب، على تتويج النادي الأهلي، للمرة الثامنة والثلاثين، في تاريخه، بطلًا للدوري العام؛ قائلًا بسخرية: «لسه عندي أمل إن الزمالك ياخد الدوري، الزمالك هياخد الدوري، لسه في أمل، قولي إزاي؟! أقولك هتحصل حرب، واتحاد الكرة هيضرب بالصواريخ، وهيلغوا الدوري والأهلي مش هياخده».
وأضاف أديب، خلال تقديمه برنامج «القاهرة اليوم»، عبر قناة «اليوم»، «ألف مبروك للنادي الأهلي، ناس محترمة، إدارة جيدة، من أيام عبد العزيز عبد الشافي وكمان المدرب يول، ناس بتحب النادي بتاعها وبتفهم في الكورة، ناس منظمة ومرتبة، ناس مش يوم أه ويوم لاء، ناس مش رجل ورا ورجل قدام، ناس مستقرة، دول كانوا بيلعبوا واتنين لاعيبة بره الملعب وهما نص الفريق، عبد الله السعيد وحسام غالي، والأهلي بيلعب وبيكسب».
وتابع: «لولا اللي عملته إدارة الزمالك في بداية الموسم مكنش حصلنا اللي حصل، بس أنا تأكدت من حاجة، إن حصول الزمالك على الدوري السنة اللي فاتت كانت صدفة تاريخية لن تتكرر، ولما قولت إن الزمالك هياخد الدوري لمدة 10 سنين قدام كانت هلاوس وكنت غلطان، اللي حصل السنة اللي فاتت كان استثناءً تاريخيًا، ومش هنشوف الدوري ده تاني، مش هناخده تاني».
وتابع: «أرجو إن ربنا يكرمنا في ماتش الأهلي الشهر الجاي، وربنا يكرم ويخلوا الراجل المدرب محمد حلمي يكمل مع النادي ويبني فيه، والله الواحد نفسه اتكسرت من اللي حصل، مبروك للأهلي، وبقول للزمالك إن ده قدر، في ناس ليها حظ وناس ليها ترتر، في ناس ليها المركز الأول وناس ليها المركز التاني، ناس ليها الدرع وناس لها الحلة، وابقوا قابلوني السنة الجاية وخدوا نفس الفيديو ده كتعليق مني على السنين الجاية، مفيش زمالك، هنفضل التاني مهما حصل».
وتوّج الأهلى بطلًا للدوري العام بعد فوزه على الإسماعيلي، بهدفين لهدف، خلال المباراة التي جمعتهما مساء الجمعة، باستاد بتروسبورت، في الجولة ال32 من بطولة الدوري العام.
سجل للأهلي رمضان صبحي ووليد سليمان، فيما سجل للإسماعيلي «بناهيني».
واستفاد الأهلي من تعادل الزمالك أمام المصري، بنتيجة (2_2) في الجولة ذاتها باستاد الإسكندرية، حيث تضاعف فارق النقاط بين الأهلي (74 نقطة) والزمالك (67 نقطة) إلى 7 نقاط قبل جولتين فقط على نهاية المسابقة.