ليه دبي؟ و ليه كندا؟ و ليه الهجرة؟

من يومين قابلت واحد صاحبي الصبح فى مشوار حكومي وكان معاه والدته... الولد دا عايش فى ألمانيا... وماكنتش شفته من حوالي ٤ سنين... من ساعة ما شفته وأنا التليفون فى ودني مكالمات جايبة مشاكل فى الشغل... ما بين شكاوي وناس ليها حاجات مش عارف ألبيها أو حاجات ليا مش عارف آخدها... وضغط رهيب... بجانب ضغط الجهة الحكومية اللى كنا فيها ومشكلة الورق التي لا تنتهي فى بلدنا... الولد كان بينظر لي بنظرة "شفقة"... وأنا عرقان فى البدلة و متبهدل بحاول أحل مشاكل بالتليفون و مش عارف أركز معاه... صعبت على أمه برضه..
طلبت واحد قهوة من كتر التليفونات مالحقتش أشربها وبردت.. ومع كل جملة الأم بتقولها بيكون فيه مكالمة برد عليها.. لحد ما الست قالت لابنها "مش قلتلك لازم تمشي كان عندي حق".. وبعدين ما بين مكالمتين بصيتلي وقالتلي "أنا كان زمان مستحيل أقول كده لابنى بس مبسوطة إنه عايش بره ونفسي أخوه يمشي كمان وانت برضه أحسنلك تمشي".
بعدها جالي مكالمة شكوى من عميلة في محل باعملو تسويق.. فوسط الكلام قالتلي "الله يكون في عونكو إحنا بلد مافيهاش كوادر ولا ضمير، أنا هامشي وولادي هيمشوا وانت لازم تمشي" دي ست أول مرة أكلمها.
دخلت المصلحة الحكومية تاني الولد صاحبي خدني بالحضن وقالي "أنا بقالي أربع سنين بره مصر ولسه ماوصلتش لحاجة ومش مستقر" أنا حسيت من كلامه إنه بيصبرني.. فقولتله "بس عندك تعليم كويس ونظام في كل حاجة والأساسيات سهلة والحياة بسيطة وبتصحي الصبح عارف يومك ماشي إزاي" فالولد سكت..
كل أسبوع فيه شخص بيمشي من اللى أعرفهم يا بيروح دبي يا كندا يا أستراليا يا السعودية أو أي بلد.. وماحدش بيرجع غير أجازات.. وإحنا اللى هنا بنشوف بعض في المناسبات، فرح، عزاء، كتب كتاب.. غير كده كل واحد في حياته وماحدش حاسس بالتاني..
ليه الناس بتمشي؟ هل غلط إننا قاعدين؟ هل هنندم؟ هل هما هيندموا؟
أسئلة باسألها لنفسي كل يوم.. بالذات إني بشتغل حوالي ١٢ ساعة أو أكتر في اليوم وبييجي آخر الشهر بابقى مش فاهم أنا إزاي مزنوق، طب هشتغل أكتر من كده إيه؟ مابشفش أصحابي وعائلتي التليفون والهم حارمني منهم.. وأنا حتي مش لاحق أتمرن أو أمارس أي هواية.. طب وبعدين.. والحياة بتغلي جدا كل يوم كيلو الرز بقى ب٩ جنيهات (كان ب ٣ جنيه من سنة).. الكيلو وات الكهربا زاد حوالي ٤٠٪‏.. الفراخ غليت أكتر من ٥٠٪‏.. وأي شغلانة صعب تغلي على الزبون علشان مش هيستحمل.. نعمل إيه؟ نروح دبي؟ هل الحياة في دبي زي السوشيال ميديا؟ نفضل هنا؟ هل هنتحسن ولا هنتعب أكتر؟
هل الحياة مستاهلة إننا نموت نفسنا كده؟ هل نبعد عن أهلنا وصحابنا ونروح بلد حياتها أسهل ولا احنا شايفين كده علشان كل واحد بيشوف غيره أحسن؟ طيب نشتغل في إيه؟ هل نصدر بما أن الدولار هو الأزمة؟ طيب هنصدر إيه؟ ولا نهاجر وخلاص؟
أسئلة مالهاش إحابة غير بالتجربة.