باسم يوسف منتقدًا السيسي: «ينفع أصبح عليك بجنيه تصبح عليّا برصاصة»

وجه الإعلامي الساخر باسم يوسف، انتقادات لمبادرة الرئيس عبد الفتاح السيسي، التي أطلقها أمس الأربعاء، «صبح على مصر بجنيه كل يوم»، قائلًا: «مافيش حد أبدا ممكن يستخسر أنه يقوم يصبح على بلده بجنيه، و عشرة و مية كمان، بس قبل ما تطلبوا مننا ده تعالوا نتحاسب».
قال باسم، في تدوينة له عبر حسابه الرسمي على موقع التواصل الإجتماعي «فيسبوك»: «التصبيحة بتاعة ال ٦٤ مليار جنيه بتاعة قناة السويس، اللي قلنا إنها فلوس في الأرض، وإننا مش محتاجينهم دلوقتي، وإنها حتسحب الاحتياطي المصرفي بتاع الناس في ظل تباطؤ الاقتصاد العالمي وحنلبس في الحيط.. والنتيجة؟ لبسنا في الحيط عشان خلصنا دولارات البلد على حفر على الناشف بدون أي عائد حقيقي".
أضاف: «نتحاسب على صرف مبالغ مرعبة على بناء سجون هي الأكثر والأكبر في قارة افريقيا، والصرف على منظومة أمنية أقل ما توصف أنهم مش بوليس دول مافيا بتعذب الناس وتحبسهم وترعبهم في بيوتهم، يعني ينفع أصبح عليك بجنيه تصبح عليا برصاصة؟.. ينفع تحبس أهالي الناس وأصحابهم وتقولهم صبحوا؟ ما يصحش كدة».
تابع: «نتحاسب على فلوس مبارك اللي أوروبا باست أيدينا عشان نرجعها لكن لا، إزاي؟ احنا نسحب منك جنيه على الموبايل، ونصيبنا خالص من مليارات المفروض هي حقنا».
أكمل: «نتحاسب على الملايين اللي اتصرفت على أكبر نكتة في العصر الحديث (جهاز الكفتة).. المراكز اللي اتجهزت والمصاريف المرعبة اللي انصرفت على كذبة ماحدش أتحاسب عليها لغاية دلوقتي».
استطرد: «نتحاسب على الفلوس اللي اتصرفت على رفع مرتبات ومعاشات وبدلات ومكافات القضاء والعسكريين والشرطة مرة و اتنين و تلاتة، قولهم هما يصبحوا على مصر، نتحاسب على الضرائب اللي بالمليارات اللي مش بتدفعها اكتر من جهة سيادية واللي أثبتها تقريرالجهاز المركزي للمحاسبات، لكن طبعا الجهاز عميل و اخوان فمش حتاخد على كلامه».
قال أيضًا: «نتحاسب على الكهربا والمياه والضرائب والرسوم اللي مش بيدفعها الجيش على مشروعات استثمارية وبالقانون واخرها ٦٤ منشأة تم إعفاءها من الضرائب وش كده، منها دور حضانة ومطاعم و فنادق.. يعني مش بس هما مش عايزين يصبحوا لا دول بياخدوا مميزات وأفضليات على اي مستثمر في السوق ومش حيقدر ينافسهم.. فأنت ولا صبحت ولا خليت الاستثمار في حاله».
اختتم: «نتحاسب على الفلوس اللي ضاعت من مصر بسبب هروب السياح منها عشان انت طلعت ضربت سياح بطياراتك في الصحراء وعذبت طالب طلياني وقتلته وفلقتنا بالامن والأمان ومش عارف تأمن مطاراتك فانضربت طيارة واتفضحت في العالم كله شوف بقى السياحة كانت حتصبح بكام؟..في خمسين حاجة تانية نتحاسب عليها قبل ما تقولنا صبحوا بس الواحد زهق انه يكرر نفس الكلام، فتعالى نتحاسب على اللي فات ده الاول قبل ماتقولي نصبح او تضطر يا عيني تبيع نفسك».