باسم يوسف ل«السيسي»: «أصبح عليك بجنيه تصبح عليا برصاصة»!!

سخر الإعلامي باسم يوسف من دعوة الرئيس عبد الفتاح السيسي إلى مبادرة "صبح على مصر بجنيه".
وقال يوسف في منشور له عبر صفحته الرسمية على موقع التواصل الاجتماعي "فيس بوك": "مافيش حد أبدا ممكن يستخسر انه يقوم يصبح على بلده بجنيه و عشرة و مية كمان. بس قبل ما تطلبوا مننا ده تعالوا نتحاسب على "التصبيحة" بتاعة ال 64 مليار جنيه بتاعة قناة السويس اللي قلنا انها فلوس في الارض و اننا مش محتاجينهم دلوقتي و انها حتسحب الاحتياطي المصرفي بتاع الناس في ظل تباطؤ الاقتصاد العالمي و حنبلس في الحيط والنتيجة؟ لبسنا في الحيط عشان خلصنا دولارات البلد على حفر ع الناشف بدون اي عائد حقيقي".
وأضاف: "تعالوا نتحاسب على صرف مبالغ مرعبة على بناء سجون هي الأكثر و الأكبر في قارة افريقيا و الصرف على منظومة أمنية اقل ما توصف أنهم مش بوليس دول مافيا بتعذب الناس و تحبسهم وترعبهم في بيوتهم، يعني ينفع اصبح عليك بجنيه تصبح عليا برصاصة ؟ ينفع تحبس أهالي الناس و أصحابهم و تقولهم صبحوا؟ ما يصحش كده".
وتابع: "نتحاسب على فلوس مبارك اللي أوروبا باست أيدينا عشان نرجعها . لكن لا، ازاي؟ احنا نسحب منك جنيه على الموبايل ونصيبنا خالص من مليارات المفروض هي حقنا، ونتحاسب على الملايين اللي اتصرفت على أكبر نكتة في العصر الحديث "جهاز الكفتة" المراكز اللي اتجهزت و المصاريف المرعبة اللي انصرفت على كذبة ماحدش أتحاسب عليها لغاية دلوقتي، ونتحاسب على الفلوس اللي اتصرفت على رفع مرتبات و معاشات و بدلات و مكافات القضاء و العسكريين و الشرطة مرة و اتنين و تلاتة قولهم هما يصبحوا على مصر".
ومضى قائلاً: "نتحاسب على الضرايب اللي بالمليارات اللي مش بتدفعها اكتر من جهة سيادية و اللي اثبتها تقريرالجهاز المركزي للمحاسبات. لكن طبعا الجهاز عميل و اخوان فمش حتاخد على كلامه، ونتحاسب على الكهربا و الميه و الضرايب و الرسوم اللي مش بيدفعها الجيش على مشروعات استثمارية و بالقانون و اخرها 64 منشأة تم إعفاءها من الضرايب وش كده منها دور حضانة و مطاعم و فنادق. يعني مش بس هما مش عايزين يصبحوا لا دول بياخدوا مميزات و أفضليات على اي مستثمر في السوق و مش حيقدر ينافسهم. فأنت و لا صبحت و لا خليت الاستثمار في حاله".
واستدرك يوسف في مطالباته، قائلاً: "ونتحاسب على الفلوس اللي ضاعت من مصر بسبب هروب السياح منها عشان انت طلعت ضربت سياح بطياراتك في الصحرا و عذبت طالب طلياني و قتلته و فلقتنا بالامن والأمان و مش عارف تأمن مطاراتك فانضربت طيارة و اتفضحت في العالم كله. شوف بقى السياحة كانت حتصبح بكام؟ ، فيه خمسين حاجة تانية نتحاسب عليها قبل ما تقولنا صبحوا بس الواحد زهق انه يكرر نفس الكلام، فتعالى نتحاسب على اللي فات ده الاول قبل ماتقولي نصبح او تضطر يا عيني تبيع نفسك".