باسم يوسف ردا على دعوة السيسي: قبل ما تطلبوا مننا جنيه تعالوا نتحاسب

طالب الإعلامي الساخر، باسم يوسف، بضرورة محاسبة الدولة أولًا، قبل مطالبة الشعب بالتبرع، قائلًا: "مفيش حد أبدًا ممكن يستخسر إنه يقوم يصبح على بلده بجنيه وعشرة ومية كمان".
وأضاف، يوسف في منشور له عبر حسابه الرسمي على موقع التواصل الاجتماعي "فيس بوك": "بس قبل ما تطلبوا مننا ده تعالوا نتحاسب".
وتابع: "نتحاسب على "التصبيحة" بتاعة ال 64 مليار جنيه بتاعة قناة السويس اللي قلنا انها فلوس في الارض واننا مش محتاجينهم دلوقتي و انها حتسحب الاحتياطي المصرفي بتاع الناس في ظل تباطؤ الاقتصاد العالمي وحنبلس في الحيط، والنتيجة؟ لبسنا في الحيط عشان خلصنا دولارات البلد على حفر ع الناشف بدون اي عائد حقيقي".
وقال: "نتحاسب على صرف مبالغ مرعبة على بناء سجون هي الأكثر و الأكبر في قارة افريقيا والصرف على منظومة أمنية اقل ما توصف انهم مش بوليس دول مافيا بتعذب الناس و تحبسهم و ترعبهم في بيوتهم، يعني ينفع اصبح عليك بجنيه تصبح عليا برصاصة؟، ينفع تحبس أهالي الناس و أصحابهم و تقولهم صبحوا؟ ما يصحش كده".
وأضاف: "نتحاسب على فلوس مبارك اللي أوروبا باست أيدينا عشان نرجعها، لكن لا، ازاي؟ احنا نسحب منك جنيه على الموبايل ونصيبنا خالص من مليارات المفروض هي حقنا".
وأوضح: "نتحاسب على الملايين اللي اتصرفت على أكبر نكتة في العصر الحديث "جهاز الكفتة"، المراكز اللي اتجهزت والمصاريف المرعبة اللي انصرفت على كذبة ماحدش أتحاسب عليها لغاية دلوقتي".
وعلق قائلًا: "نتحاسب على الفلوس اللي اتصرفت على رفع مرتبات و معاشات وبدلات ومكافات القضاء والعسكريين والشرطة مرة واتنين وتلاتة، قولهم هما يصبحوا على مصر، ونتحاسب على الضرائب اللي بالمليارات اللي مش بتدفعها اكتر من جهة سيادية و اللي اثبتها تقرير الجهاز المركزي للمحاسبات، لكن طبعا الجهاز عميل وإخوان فمش حتاخد على كلامه".
كمال طالب يوسف، بضرورة محاسبة مشاريع الجيش قائلًا: "نتحاسب على الكهرباء والميه والضرائب والرسوم اللي مش بيدفعها الجيش على مشروعات استثمارية وبالقانون واخرها 64 منشأة تم إعفاءها من الضرائب وش كده منها دور حضانة ومطاعم و فنادق، يعني مش بس هما مش عايزين يصبحوا لا دول بياخدوا مميزات وأفضليات على أي مستثمر في السوق و مش حيقدر ينافسهم، فأنت ولا صبحت ولا خليت الاستثمار في حاله".
وأضاف: "نتحاسب على الفلوس اللي ضاعت من مصر بسبب هروب السياح منها عشان إنت طلعت ضربت سياح بطياراتك في الصحراء وعذبت طالب طلياني وقتلته وفلقتنا بالأمن والأمان ومش عارف تأمن مطاراتك فانضربت طيارة واتفضحت في العالم كله، شوف بقى السياحة كانت حتصبح بكام؟".
وأنهى باسم يوسف المنشور قائلًا: "فيه خمسين حاجة تانية نتحاسب عليها من أول ال30 مليار بتوع الخليج للمؤتمر الاقتصادي للعاصمة الإدارية قبل ما تقولنا صبحوا بس الواحد زهق انه يكرر نفس الكلام"، وأضاف: "فتعالى نتحاسب على اللي فات ده الاول قبل ما تشخط فينا وتقولنا نصبح أو تضطر يا عيني تبيع نفسك".