كيف علق باسم يوسف على دعوة الرئيس السيسي للتبرع لصالح مصر؟

أكد الإعلامي باسم يوسف، أن دعوة الرئيس السيسي بالتبرع يوميًا بجنيه لصندوق "تحيا مصر"، جيدة ولكن يجب أن يكون هناك كشف حساب لبعض الأومور، قائلًا: "مافيش حد أبدًا ممكن يستخسر انه يقوم يصبح على بلده بجنيه و عشرة و مية كمان. بس قبل ما تطلبوا مننا ده تعالوا نتحاسب".
وأضاف يوسف - عبر حسابه الشخصي على موقع التواصل الإجتماعي "فيس بوك"، اليوم الخميس: "نتحاسب على التصبيحة بتاعة ال 64 مليار جنيه بتاعة قناة السويس اللي قلنا انها فلوس في الأرض و أننا مش محتاجينهم دلوقتي وإنها هتسحب الاحتياطي المصرفي بتاع الناس في ظل تباطؤ الاقتصاد العالمي و حنبلس في الحيط، والنتيجة لبسنا في الحيط عشان خلصنا دولارات البلد على حفر على الناشف بدون أي عائد حقيقي".
وتابع: "نتحاسب على صرف مبالغ مرعبة على بناء سجون هي الأكثر و الأكبر في قارة افريقيا و الصرف على منظومة أمنية اقل ما توصف انهم مش بوليس دول مافيا بتعذب الناس و تحبسهم و ترعبهم في بيوتهم، يعني ينفع اصبح عليك بجنيه تصبح عليا برصاصة ؟ ينفع تحبس أهالي الناس و أصحابهم و تقولهم صبحوا؟ ما يصحش كده".
واستطرد: "نتحاسب على فلوس مبارك اللي أوروبا باست أيدينا عشان نرجعها، لكن لا إزاي، إحنا نسحب منك جنيه على الموبايل و نصيبنا خالص من مليارات المفروض هي حقنا".
وواصل: "نتحاسب على الملايين اللي اتصرفت على أكبر نكتة في العصر الحديث "جهاز الكفتة"، والمراكز اللي اتجهزت و المصاريف المرعبة اللي انصرفت على كذبة ماحدش أتحاسب عليها لغاية دلوقتي، نتحاسب على الفلوس اللي اتصرفت على رفع مرتبات و معاشات و بدلات و مكافات القضاء و العسكريين و الشرطة مرة و اتنين و تلاتة، قولهم هما يصبحوا على مصر".
واستطرد: "تحاسب على الضرايب اللي بالمليارات اللي مش بتدفعها اكتر من جهة سيادية و اللي اثبتها تقريرالجهاز المركزي للمحاسبات، لكن طبعا الجهاز عميل و اخوان فمش حتاخد على كلامه، نتحاسب على الكهربا و الميه و الضرايب و الرسوم اللي مش بيدفعها الجيش على مشروعات استثمارية و بالقانون و اخرها 64 منشأة تم إعفاءها من الضرايب وش كده منها دور حضانة و مطاعم و فنادق. يعني مش بس هما مش عايزين يصبحوا لا دول بياخدوا مميزات و أفضليات على اي مستثمر في السوق و مش حيقدر ينافسهم، فأنت و لا صبحت و لا خليت الاستثمار في حاله".
واستكمل: "نتحاسب على الفلوس اللي ضاعت من مصر بسبب هروب السياح منها عشان انت طلعت ضربت سياح بطياراتك في الصحرا و عذبت طالب طلياني و قتلته و فلقتنا بالامن و الأمان و مش عارف تأمن مطاراتك فانضربت طيارة و اتفضحت في العالم كله. شوف بقى السياحة كانت حتصبح بكام؟ ".
واختتم حديثه قائلًا: "فيه خمسين حاجة تانية نتحاسب عليها من اول ال30 مليار بتوع الخليج للمؤتمر الاقتصادي للعاصمة الإدارية قبل ما تقولنا صبحوا بس الواحد زهق انه يكرر نفس الكلام، فتعالى نتحاسب على اللي فات ده الاول قبل ما تشخط فينا و تقولنا نصبح او تضطر يا عيني تبيع نفسك".