فيديو| شاب أمام قسم شرطة: «بتتشطروا على الشباب ومتقدروش تقفوا في وش بلطجي»

تداول رواد مواقع التواصل الاجتماعي، مقطع فيديو يحمل عنوان «أرجل شاب في مصر»، يُظهر شاب يوجه رسالة لأفراد الشرطة، أمام أحد الأقسام، في ظل وجود عدد من الضباط والأمناء.
ويقول الشاب في الفيديو، «بسم الله ما شاء الله على الداخلية، نفس الدرس اللي حصل أيام مبارك الداخلية مش ناوية تتعلمه، والظاهر إنها مش ناوية تتعلم، وماتفتكرش يا باشا إن العيب في الشعب، عمر الغلط والعيب ما كان أبدًا في الشعب، إنتوا لما بتتعاملوا مع الشعب بتفتحوا الطبنجات، وبتنزلوا 80 واحد على الناس الغلابة اللي في الشارع، لكن عمركوا ما تجرأتم تقفوا في وش بلطجي».
وأضاف: «عايزين نقولكوا، إن لما واحد طلع قال أنا هاكسر وزير الداخلية، والداخلية بتاعته، محدش منكم قدّر يتكلم، ولما شوية شباب محترم مؤهلات عليا.. بتاخدوهم من قفاهم وترموهم في السجون، وبعد كده تقولوا الشعب ليه ثائر ضد الداخلية، الشعب ليه بيقول الداخلية بلطجية، العملية مش هتتغير لو إنتوا مغيرتوش نفسكوا، لو إنتوا مقررتوش إنكوا تبقوا أسياد نفسكوا وتبقوا في خدمة الشعب بس، مش في خدمة النظام».
استكمل: «هايفضل كل نظام يتاجر بيكوا، والدور الجاي عليكوا، والدور الجاي مش من الشباب ولا من الشعب، لأ من النظام نفسه، من مليشياته اللي هاتفرمكم أول ناس لو فكرتوا تقولوا لأ، لأنه هو عارف دلوقتي يخلي الداخلية كلها بالبلاوي اللي عملتها قبل كده، والتار اللي بقى بينها وبين الشعب، ماتقدرش تقول لأ».
وتابع: «النظام مش هيحميكم، الدور الجاي جاي عليكوا إنتوا، ومن الناس اللي إنتوا بتخدموهم، واللي إنتوا بتنفذوا أوامرهم، انتوا أول ناس هاتتباعوا، إلا في حالة واحدة، إنك ترجعوا لصف الشعب تاني، وتبقوا حماة الشعب، العمر قصير، شوفوا هتقابلوا ربنا إزاي».