بعد صورة «البطاطا»|نشوى: أنا من الطبقة الكادحة واشتغلت بياعة في العتبة

نشرت الفنانة نشوي مصطفى، صورة عبر صفحتها على موقع التواصل الاجتماعي «فيسبوك»، منذ يومين، لبعض الشباب الذين يقومون ببيع البطاطا، في إحدى شوارع القاهرة، لكنها لاقت هجومًا حادًا من مستخدمي تلك المواقع.
وردت نشوى عليهم، قائلة: «طيب بمناسبة إنى شيرت صورة لشباب زى الورد بيبيعوا بطاطا، وقلت عفارم عليهم إنهم ما استسلموش للإحباط وللبطالة ولا قعدوا يولولو ويشتموا في البلد، ونتيجة للردود اللي بعضها سخيف وبيقولولى إنتى فنانة بتاخدى فلوس قد كده ومش حاسة بالشباب المحبط وعايزانا بعد ما نتخرج من كلياتنا المحترمة نبيع بطاطا، ونتيجة الرسايل الشتيمة الإنبوكس، عايزة أقول لهم أبويا الله يرحمه كان من الطبقة الكادحة الطبقة تحت المتوسطة بشوية كتير».
واستكملت: «أبويا ربانى إنى أكون راجل، بمعنى إنى لما اتخرجت ومالقتش شغل عملت وجبات جاهزة في البيت وبعتها في العتبة للبياعين اللي بيشتغلوا في محال الملابس، ليه العتبة بالذات لأنى في إجازات الصيف بتاعت الجامعة كنت بشتغل بياعة في المحال دى علشان يكون معايا فلوس زيادة عن المصروف اللي باخده من أهلي، وليه عملت وجبات جاهزة وبعتها؟؟؟، لأنى كنت عايزة أدرس تمثيل، ودخلت المعهد وابتديت تمثيل بعشر مشاهد في ضمير أبلة حكمت وكان أجرى في المسلسل كله ٢٥٠ جنيه».
وتابعت: «كنت ساكنة في شبرا بيتنا أوضتين، دلوقتى بفضل ربنا وبمجهودى أنا ساكنة في فيلا دورين بحمام سباحة في أرقى مكان في التجمع الخامس، اتعلمت في مدارس حكومة وكنت باخد الكتب ببلاش في الجامعة لأنى كنت مقدمة مفردات مرتب والدى إنها بسيطة، دلوقتتى بفضل ربنا وبمجهودى ولادى جامعة أمريكية وألمانية، وماحدش ساعدنى غير ربنا».
وأضافت: «مافيش منتج دعمنى وادانى بطولة وأنا استاهلها بجدارة، أثبت إنى بمشهدبن تلاتة ممكن أسيب تأثير وأحقق نجومية باشوفها في كلام معجبينى في كل مكان جوة مصر وبراها، أنا بشتغل بمجهودي، اتحاربت وصمدت اتساومت وما استسلمتش لأنى مؤمنة بحلمى ومؤمنة بإن ربنا مع اللي بيتعب».
ووجهت رسالة لهؤلاء الشباب قائلة: «حارب علشان حلمك وماتشتمش بلدك ولا ظروفك ولاتشتم الممثلين».