نشوي مصطفى تدافع عن "البطاطا": "كنت ببيع وجبات في العتبة"

ردت الفنانة نشوي مصطفى على الهجوم الذي لاقته من بعض نشطاء موقع التواصل الاجتماعي «فيس بوك»، بسبب نشرها صورة لشباب يقومون ببيع البطاطا في أحد مناطق القاهرة.

و قالت نشوي "طيب بمناسبة انى شيرت صورة لشباب زى الورد بيبيعوا بطاطا.. وقلت عفارم عليهم انهم مااستسلموش للاحباط وللبطالة ولا قعدوا يولولو ويشتموا في البلد.. ونتيجة للردود اللي بعضها سخيف وبيقولو لى انتى فنانة بتاخدى فلوس اد كده ومش حاسة بالشباب المحبط وعايزانا بعد مانتخرج من كلياتنا المحترمة نبيع بطاطا.. ونتيجة الرسايل الشتيمة الانبوكس.. عايزة اقول لهم اولًا.. ابويا الله يرحمه كان من الطبقة الكادحة الطبقة تحت المتوسطة بشوية كتير.. ابويا ربانى انى اكون راجل.. بمعنى انى لما اتخرجت ومالقتش شغل عملت وجبات جاهزة في البيت وبعتها في العتبة للبياعين اللي بيشتغلوا في محال الملابس.. ليه العتبة بالذات.. لانى في إجازات الصيف بتاعت الجامعة كنت بشتغل بياعة في المحال دى علشان يكون معايا فلوس زيادة عن المصروف اللي باخده من أهلي --- وليه عملت وجبات جاهزة وبعتها ؟؟؟-- لانى كنت عايزة ادرس تمثيل -- دخلت المعهد وابتديت تمثيل بعشر مشاهد في ضمير ابله حكمت وكان اجرى في المسلسل كله 250 جنيه --- كنت ساكنة في شبرا بيتنا اوضتين --- دلوقتى بفضل ربنا وبمجهودى انا ساكنة في فيلا دورين بحمام سباحة في ارقى مكان في التجمع الخامس -- اتعلمت في مدارس حكومة وكنت باخد الكتب ببلاش في الجامعة لانى كنت مقدمة مفردات مرتب والدى انها بسيطة -- دلوقتتى بفضل ربنا وبمجهودى ولادى جامعة أمريكية والمانية -- ماحدش ساعدنى غير ربنا مافيش منتج دعمنى وادانى بطولة وانا استاهلها بجدارة -- أثبت انى بمشهدبن تلاته ممكن اسيب تأثير واحقق نجومية باشوفها في كلام معجبينى في كل مكان جوه مصر وبراها -- انا بشتغل بمجهودى - اتحاربت وصمدت اتساومت ومااستسلمتش لانى مؤمنة بحلمى ومؤمنة بأن ربنا مع اللي بيتعب حارب علشان حلمك وما تشتمش بلدك ولا ظروفك ولا تشتم الممثلين".