والد المتهم بطعن أسرته: ساعة شيطان.. والسبب «ملابس شقيقته»

كتب – محمد رشدي ومحمود عثمان
"ابني مش مدمن ولا بلطجي، ده متعلم، وبيحب أهله، وهيموت من الندم على اللي حصل منه".. كلمات ممزوجة بالأسى والحزن، خرجت بمرارة من فم "م. أ"، والد الشاب المتهم بالشروع في قتل عائلته، الذي يرقد وزوجته وابنته بمستشفى قصر العيني جراء إصابتهم بعدة طعنات بالجسم.
وأضاف: "مصطفى شغال شغلانة كويسة، وعمره ما عمل مشاكل مع حد، لكن هي ساعة شيطان، غيرته شديدة شوية على شقيقته، كان دايمًا يقولها إلبسي واسع وبلاش تلبسي البنطلونات الضيقة دي، وكلامه ماكنش بيعجبها، وكانت بتحصل مشاكل كتير بينهم في الفترة الأخيرة بسبب موضوع اللبس".
وأوضح والد المتهم، أن نجله دخل مع شقيقته في مشادة كلامية بعد أن شاهدها ترتدي ملابس ضيقة، قبل خروجها من المنزل يوم الحادث، وخلال لحظات تحولت تلك المشادة إلى مشاجرة، تعدى خلالها المتهم على شقيقته التي تصغره بخمسة أعوام بالضرب أمامه ووالدته، وحاولا التدخل ومنعه من مواصلة التعدي عليها، وقاما بتعنيفه، غير أن المتهم استمر في التعدي على شقيقته، وهرع إلى المطبخ، واستل سكينًا وعاد عازمًا على الانتقام من شقيقته".

وأردف: "حاولت ووالدته إننا نمنعه، وناخد السكينة من إيده، ماكنش في حالته الطبيعية، زي ما يكون مش سامعنا ولا شايفنا، والدته كانت واقفة في وشه، وفجأة وقعت على الأرض، وشفتها مجروحة وبتنزف، رميت نفسي عليه، ومكنتش قادر أتكلم من هول المنظر، ولحد دلوقتي مش عارف اتصابت إزاي، وسوسة الشيطان دفعته لضرب أخته، ويعمل فيها كده".
واستكمل الأب حديثه: "ابني كان في حالة هياج شديد، وزوجتي لما تدخلت طعنها، وإن شاء الله نعدي المحنة اللي إحنا فيها على خير، وأنا قلت في النيابة إنه ماكنش يقصد، وإن مفيش أطيب منه، لكن صمموا يحبسوه بتهمة الشروع في قتلنا، رغم إن مفيش أطيب منه، واتضايقت لما لاقيتهم كاتبين في الجرايد إنه عمل كده عشان مدمن، وكان عايز فلوس يشتري بيها مخدرات، ولما رفضنا عمل فينا كده".
تفاصيل الواقعة ترجع لتلقي قسم شرطة مصر القديمة، إخطارًا من مستشفى قصر العيني بوصول "انتصار. ح"، ربة منزل، مُصابة بطعنات في الصدر والرأس والرقبة وفي حالة خطرة، كما وصل زوجها "محمود. أ"، مصاب بطعنات في البطن والصدر والرقبة، ونجلته "سارة"، 17 عامًا، مصابة بطعنات في اليدين والصدر من الجهة اليمنى.
وتبين أن وراء ارتكاب الواقعة نجلهما "مصطفى"، 22 عامًا، مندوب مبيعات، وتمكنت الأجهزة الأمنية من ضبطه، وتحرر المحضر اللازم، واعترف المتهم أنه ارتكب الواقعة، وكان يتمنى قتلهم جميعًا؛ بسبب سوء سلوك شقيقته، وملابسها المثيرة.