صورة| مواطن «متسول» بين الحياة والموت.. والإسعاف ترفض مساعدته

تداول رواد الشبكات الاجتماعية، اليوم السبت، صورة لمواطن «متسول»، يُدعى وليد، من المطرية، مُلقى على الأرض بين الحياة والموت، بجوار كوبري الحلمية، بمنطقة الزيتون، بالقاهرة، فيما رفضت عربة الإسعاف اصطحابه إلى المستشفى.
ونشر الصورة، شاب يُدعى أحمد رأفت، كتب عليها: «كنت الصبح الساعة 9 راجع من مصر الجديدة شارع (بن الحكم)، لحد ما وصلت لنادي 6 أكتوبر الحلمية، وأنا جنب سور النادي وشركة الكهرباء، أنا وصاحبي، وشوفت الراجل اللي نايم علي الأرض ده، لقيت شفايفه تعرضت للتشقق من قلة المياه، جبنا عصير قصب وسندوتشات فول وطعمية له، قولتله قوم أشرب العصير، قالي مينفعش أشربه عشان عندي سكر وباخد إنسولين».
وتابع: «كان يقول لنا: بالله عليكم متسبونيش، أنا بموت، ياريت تتصل بالإسعاف»، مستكملًا: «اتصلنا بالإسعاف، ردوا وخدوا بياناتي، قالولي هو واحد عادي وله ايه؟ قولتلهم لا متسول، بس مش مجنون، ومثقف جدًا، ملهوش أهل بيكلمنا كلام علمي، واعي للدنيا، بس هو من الناس الغلابة بتوع الرصيف».
وأوضح: «ساعة واتنين الإسعاف مجاش، والراجل بيجيب دم من فمه، كلمنا الإسعاف تاني، كلمنا الإسعاف تالت، قالولنا في عربية اتحركت ليكم، جت الإسعاف، قالي يا أستاذ ده متسول، مينفعش أعمله حاجة، قلت له بس إنسان، نسيبه يموت؟ حكّم ضميرك، اتصل برئيسه قاله، رئيسه قاله سيبه مبنخدش الحالات دي».
وأضاف: «قولت للمتسول: الأكل جنبك كل وانقذ نفسك، إحنا في غابة، وملكش غير ربنا، فبكى، وشيلته أنا وصاحبي وحطناه في الظل وقلت له: قول حسبي الله ونعم الوكيل».