لا زالت جماعة الإخوان المسلمين ترفض وبشدة وبشدتين كمان الإفصاح عن مصادر تمويلها .. والسبب إيش ما تعرف .. تصوروا من كتر غيظي قعدت أشرب في معسل .. وأخلص وأشرب تاني وتالت ورابع على رأي المطربة " الخنفة " اللي اسمها لطيفة ... شربت 11 حجر و آخر ما زهقت تصوروا عملت أيه ؟ شربت تاني لحد ما بقتش عارف آخد نفسي ولا نفس الحجر ... برغم إني بشرب ب " فحم فواكه " بس مش عارف ليه حاسس إنه بقي مغشوش ! فيه ناس بتقول إن الفحم بقى مغشوش زى " الجماعة " إياها ... قولتلهم يا بقر ده فحم متكلف ... قالولي طب ما الجماعة متكلفة و" متكلفتة " حولين نفسها وما فيش اتخن عين ممكن تشوف الجماعة من جوة ... قولتلهم برضو إلا الفحم بتاعي أنا عارفه عمره بالعمر ما يكون مغشوش ... مرسي ممكن يكون مغشوش ماشي ... العريان يكون مكشوف دي عادي ... الكتاتني يكون " كتانه " تايواني ماشي ... البلتاجي يكون " متبلتج " حبتين أقول جايز ... حجازى يكون " متصفوت على نفسه وع السرير بتاعه أصدق ... لكن حد يقولي الفحم بتاعك مغشوش أحط صوابعي ومناخيري ووداني الشمال في حبة عينيه ... إلا الفحم بتاعي لأنه متكلف ومتمول صح ... فقال واحد صاحبي : ما هي الجماعة متكلفة ومتمولة والناس قال عاوزة تعرف همة جايبين فلوسهم منين ؟ قولتله يا فالح بقى مش عارف فلوس " الجماعة " جايبينها منين ؟ قالى منين يا دكر ... قولتله من تجارتهم في المعسل والفحم ... حتى عشان كدة تلاقيهم مفنجلين لأى واحد يكتب عليهم كلمة ولا يهتف ضدهم ولا يفكر بس يبصلهم بعين راضية ... يعني فلوسهم حلال ثم حلال ثم حلال ... فقالي صاحبي لا يا فالح فلوسهم جاية من " قطر " وكل الدنيا عارفة كدة ... قولتله ما هو كلامك مظبوط بس مش بالشكل ده ... قالي أمال إزاى ؟!.. قولتله هي مين ست الكل والنص والربع في قطر؟ ... قال الشيخة " موزة " قولتله عرفت بقى يا فالح إن كلامك كدب ... قالي إزاى ... قولتله ما هو الفحم بتاعهم فواكه " موز " واللي زرعاه الشيخة موزة الله يكرمها ويطول في موزها وصوابعها ... دا حتى الجماعة بتفكر تنزل معسل جديد اسمه " معسل موزة " وشعاره " اشرب معسل موزة ... ملكة الشيشة والجوزة " ! قالي صاحبي بقولك أيه يبقى معسلك بتاعك من هناك قولتله لا دا أنا معسلي أفخم أنواع المعسل واسمه " معسل البرنس " اللي يشربه لا يزيد ولا يخس ! قالى صاحبى م الآخر كدة يعنى معسلك ولا معسلهم ؟ قولتله معسلي طبعاً لأنه خليط من معسلهم أصل أنا بجيب شوية معسل من معسل البرنس وأحط عليهم شوية من معسل موزة ... يبقى معسل " مرسي " اللي له عوزة ... قالي ويطلع أيه ده كمان" معسل مرسي " قولتله ده معسل الرئاسة ... ملك الفرفشة والغلاسة ! قالي طب ممكن نفس ... قولتله لما آخد نفسي الأول أبقى خدلك نفس ... وبعدها هحكيلك إن شاء الله عن معسل مرسي اللي تشربه وأنت صاحي وأنت نايم وأنت "مكوع " ع الكرسي ! وللحجر بقية ... قصدي للحديث بقية نكمل حكاية معسل الجماعة ... بس وانتوا جايين تسمعوها يبقى كل واحد فيكم يجيب ولاعة ... في صحتكم !!
