القرموطي مهاجما إدراة ماسبيرو: «إنتوا فشلة..وحولتوا التليفزيون لخرابة»

شن الإعلامي جابر القرموطي، هجومًا حادًا على المسؤولين عن إدارة التليفزيون المصري، بسبب استعانتهم بالدكتور معتز عبد الفتاح لإجراء حوار مع المهندس إبراهيم محلب، رئيس مجلس الوزراء، علمًا بأن "عبد الفتاح" ليس من ضمن العاملين في ماسبيرو، وقال إنه "إذا استمر الوضع القائم الآن في تليفزيون الدولة فسيتحول إلى خرابة".
وأضاف خلال برنامج "مانشيت"، المُذاع عبر فضائية "ONTV"، اليوم الأربعاء، مخاطبًا عصام الأمير، رئيس اتحاد الإذاعة والتليفزيون: "يا عم عصام الأمير، هقولك كلمة لوجه الله، وبلاش تزعل من القناة، إزعل مني أنا، إنتوا والله فشلة، والله العظيم فشلة، واللي قبلكم فشلة، واللي قبليهم فشلة، إنت بقالك 4 سنين مش عارف تخلق برنامج، ولا عارف تعمل قيمة لمذيع، ده برنامج (صباح الخير يا مصر) فيه 900 مذيع، ومع ذلك مفيش أي بصمة، طيب فيها لو بقوا 3 بس ولهم بصمة؟ إنتوا كده بتقضوا على الناس والله، كفاية عك بقى".
وأضاف: "معني إنكم تستعينوا بحد من بره التليفزيون عشان يعمل حوار لحسابكم يبقى كل اللي عندكم فشلة، يبقي مفيش في كفاءات، يعني ال 43 ألف شخص العاملين في التليفزيون المصري مفيش فيهم واحد عليه الطلب، يعني إنتوا سايبين كل واحد بيهبل اللي هو عايزة ويقول أي حاجة، لكن أما يبقى في شخصية مهمة هتعملوا معاه حوار تجيبوا حد من بره"، متابعًا: "الكفاءات الموجودة في ماسبيرو مفيش زيها، القنوات الخاصة قائمة على كفاءات ماسبيرو، وإنت مش عارف تستغلها، مش عارف قيمة المكان اللي إنت فيه، مش عارف يعني إيه ماسبيرو".