فيديو| شردي عن وفاة إسلام شريف: «دول مش دكاترة.. دول شوية حلاقين صحة»

هاجم الإعلامي محمد مصطفى شردي، المدرس الذي تعدى بالضرب علي التلميذ إسلام شريف في مدرسة السيدة زينب، قائلًا: "أنا على فكرة مؤيد لموضوع معاقبة التلاميذ، لكن مش من مؤيدي قتل التلاميذ، ما هو حضرتك مش مراتك (تشبشبلك) في البيت وإنت تنزل تضرب في العيال، يعني إنت عشان الواد معملش الواجب تقتله؟ رزّعته علقة لحد ما جاله نزيف في المخ؟ يرضي مين ده بس؟".
وأضاف شردي، خلال برنامج"90 دقيقة"، المُذاع عبر فضائية المحور، اليوم الأحد، قائلًا: "المجتمع أصبح يتفشى فيه الغل والإجرام، حرام ضرب الأطفال في المدارس بهذه الطريقة الوحشية التي شهدناها خلال السنوات الأخيرة، دي إفرازات غير سوية إطلاقًا ويجب التخلص منها، وكمان بيقولوا إن اللي قتله شيخ، هو مش بيقتل الناس غير الشيوخ؟ الشيوخ اللي بيقولوا إنهم بتوع ربنا".
وانفعل شردي، على المقصرين في مستشفى الطلبة نظرًا لوفاة التلميذ، خاصة على طبيبة المدرسة التي اخطأت في تشخيص الحالة، قائلًا: "إنتم مهملين، إنتم عندكم تسيب وإهمال، الدكتورة اللي كشفت على الطفل دي معندهاش حتى معلومات عامة عن الطب، دي أي بلد ب(ديل) هتحول الطفل مباشرة للمستشفى المختصة عشان يعملوله أشعة، قاعدين تعياروا الأهالي وتقولوا عندنا مستشفيات! هي دي المستشفيات؟! دول حلاقين صحة مش دكاترة".
وأشار أن "أي دولة محترمة وصلها تقرير زي اللي وصل عن الطفل ده النهاردة لازم تقيل وزير الصحة، هؤلاء الأطباء يستحقوا السجن جميعًا، ويجب تحويلهم جميعًا للنيابة، لو كنتوا حولتوا الواد يعمل أشعة كنتوا هتخسروا عليه من جيب أهلكم؟ والله الطفل إسلام هيطلع لله عز وجل، ويقوله قتلوني لأني معملتش الواجب، ودمه في رقبتكم إنتم".