ناس تنباس وناس تنداس وناس تنضرب بالمداس

هبدأ بالمتباسين ودول بقى اتملكوا مصر بعقد بيع وشراء من النظام ليهم مفيش حاجه فى البلد ما تبعتش ليهم بأرخص الاسعار البلد كان نازل عليها اوكازيون مخصوص تلف مصر شرق وغرب شمال وجنوب تلاقيها بتاعتهم قصور شواطىء مصانع شركات اراضى وشعارهم فى الحياه متقولش ايه اديتدنا مصر قول فاضل ايه ما قلبناش فيه مصر و دول واخدين كل حاجه بجد وحق وحقيقى وعلى فكره دول بيأكدولنا ان مصر بلد غنيه جدا وفيها خير كتير لكن يا قلبى عليها كله مسروق و منهوب نضرب شوية امثله بسيطه من ابسط الامثله رئيس مصلحة الضرايب مرتبه الشهرى مليون ونصف فى الشهر ايوه فى الشهر وغالى على النظام لما اتسأل ما انكرش قال معرفش عموما انا بقول للغالى كداب يا خيشه كداب اوى انا كنت فاكراك فهلوى دا انت شاهد وشايف كل حاجه ولا فاكرين الموظف اللى الشرطه فتشت بيته لقيت مليون جنيه بحالهم فى البيت والراجل فى التحقيقات قال ده مصروف البيت يا مفترى مصروف بيت واحد مليون ولقوا طربة حشيش كامله تحت السرير و قال فى التحقيق استخدام شخصى بيحشش بالطربه مش بالقرش زى العامه جبارين الكبار فى مصر وماشيين على مثل ان سرقت اسرق جمل ولما تحشش اوعى ترضى بأقل من طربه والنظام سايب الشعب يحشش ينحرف يعمل ما بداله ويروق الجى ويكبر الدى وينساهم علشان العمليه التخريبيه تتم بنجاح قبل ما نقلب المتباسين احب اقول عنهم ان رئيس وزارئهم عنده شقه فى الفور سيزون ب 30 مليون وكام قصر وقال عن الشقة والقصور انه باع فيلا واشتراهم مش عارفة انا فين الفيلا اللى بتتفك بده كله تكونش فى جزيرة سردينيا يلا بقى هنقول ايه اللى يلاقى دلع وفلل وميدلعش يبقى عيب عليه وكلين دايما بيعديه العيب وبياخد اللى بعده كفاية كده بقى احسن لو قلتلكوا كيمو عنده كام قصر من ابو 40 مليون هتسبب فى ان يجيلكوا ذبحة صدرية و غيرهم كتير محتاجالى من من شهر لاتنين علشان احكلكوا عنهم نفر نفر على رأى الست ام بدوى و نيجى بقى للى اتاخد منهم كل حاجة المتداسين و المضروبين بالمداس دول احنا الشعب المواطن اللى من الشعب ده عينى عليه يصحى الصبح مضروب بالمداس ينزل شغله يداس ده اذا يعنى كان لاقى شغل ده بقى يبقى حظه اسود لو متجوز وعنده عيال بيتمنى مره يأكلهم كيلو لحمه ولا يجيبلهم لبس فى العيد الحاجات ديه مبقاش يشوفها الا فى الاحلام ما هو ادينى عقولكم الراجل الرغاى مسئول الحكومة بيقول ال 450 جنيه يفتحوا بيت مع ان دول كبيرهم على ارض الواقع يقفلوا اجدع بيت مش يفتحوه وزير الماليه الانتيكه بيقول الاسره بالمبلغ ده ممكن تعيش وتأكل كل يوم بصاره ونصف تفاحة كان نفسى أسأله فين التفاح المدعم ده علشان اوصف عنوانه للشعب وكان بودى أسأل سيادته هو عايش على البصاره و لا بياكل استاكوزا و جمبرى ولما سافر امريكا على حساب الشعب هو و المدام وكانت بتاخد بدل سفر مرافق واتصرف عليه 2 مليون جنيه كان حلال ليه وحرام علينا احنا نأكل بصارة وهو ياكل جاتوه ياكل كل اللى يحبوه واحنا بصاره هى ديه العدالة الاجتماعيه و لا بلاش نتكلم عن المواطن المداس ده بقى يحيا وسط القبور او عشه صفيح ده بقى مش هقول بيلبس ايه ويياكل ايه ويصرف كام لانه زى ما قلت موجود فقط لكنه لا عايش و يعرف العيشه شكلها ايه تخيلوا انتوا اى نوعيه من الحياه يحياها ..........يااه كنت هنسى الطبقة المتوسطه من الشعب اللى عايشة لكنا مضروبه بستين مداس المفترض انهم الطبقة الوسطى المتعلمه التى تعمل اتزان فى اى مجتمع ويخرج منها المثقفين والعلماء ديه اتقلب بيها الحال وتدهورت اوى وبتاخد بالمداس فى الشغل ومتقدرش تضحى بيه لان العيال فى مدارس كويسه هيتصرف عليهم منين وبتضرب بالمداس لو نطقت وقالت كفايه ارحمينا يا حكومه شوفنا الاطباء اللى بيشتكوا من تدنى الاجور وغيرهم كتير عندهم نفس الشكوى والمحامين اللى القضاه بيدوهم بالمداس ويعاملوهم على انهم اقل الطبقة ديه بتعانى فى كل حاجه مكنتش فقيره لكنها اصبحت تعيش على الكفاف وغيبت بالبحث عن لقمة العيش وبدلا من ان تحافظ على توازن المجتمع النظام دمرها فاخدت المجتمع ووقعت لتحت و اتقسمنا فى مصر لناس بتتباس وناس بتداس وناس بتضرب بالمداس