رسائل من وحى الإسبوع العاشر ومباراة الإسماعيلى ..

- خالد الغندور : عصبيتك لوصف الدكتور علاء صادق لبعض الإعلاميين بالقذر ، يذكرنى بالمثل الشهير اللى على راسه .....!!
- تليفونات بنى سويف : أديتم مباراة أكثر من رائعة ، وإكتسبتم إحترام الجميع ، على الأقل كان التعادل هو الأقرب منطقية فى النتيجة ، ولكن الحظ له رأى آخر !!
- إتحاد الكرة : أظن كدا القلم التانى بعد قلم قصدى قرار وزارة الداخلية والقلم التانى الفوز غصب عن أنوفكم .
- لجنة العقوبات : أو الإنضباط أو أى مسمى سؤال إجبارى : هل ستعاقبون اللاعب أحمد سمير أم ستغضون الطرف وتشدوا اللحاف على الأخلاق والآدمية ؟؟ منتظرين لنرى هل ستشربون شاى بالياسمين ولا الجنزبيل بتاع حمادة !!
- لجنة الحكام : هو الأهلى بس اللى مكتوب عليه يتظلم من الحكام ولا هو توارد خواطر !! مباراة بتروجيت هدف من تسلل فاضح ، مبارة الإسماعيلى تسلل لا يحتسبه إلا أعمى !! وفى المقابل مساعد يحتسب هدف لم يتعدى خط المرمى وبعيد عنه بياردتين لأنه للزمالك ضد المحلة ، ثم يحتسب حكم دولى ضربة جزاء وهمية لشيكا هى فى الأساس فاول عليه !! إذن ما المطلوب من الأهلى وجماهيره !! هذا تحذير وإنذار لكل الضمائر الخربة .
- الإسماعيلى : أرجوا أن يكون اللعب بدون جمهور قد أراح أعصابكم وإداراتكم !! لكن مبروك عليكم الهزيمة بدون جمهور !!
- ضياء السكران : فعلا إسم على مسمى !! ربنا يتوب عليك من اللى انت فيه !! ويتوب علينا منك ومن اللى زيك .
- جهاد جريشة: من كثرة سماعى لصوت الصافرة إختلط عليا الأمر وحسبت أننا فى محطة أتوبيسات وليس فى إستاد للعب الكرة !! ولهذا أقترح أن الطاقم التحكيمى يكون باللون الرمادى أفضل عليك !!
- عبدالله السعيد : هدف تكليل من الله لمجهودك ، ورد على كل كدابى الزفة ، ولكن ننتظر منك أكثر من ذلك بكثير فقدراتك الفنية أعلى من مردودك على أرض الملعب .
- شادى محمد :حرام عليك لازم تفكرهم بالبطولات اللى انت اخدتها !! انت ظالم بجد .. وكمان بتلاعبهم وانت لابس اللون الاحمر !! بس بصراحة انت محترم ودا الفرق بين لاعب من الاهلى وبين لاعب آخر زى بتاعهم اللى بصق على لاعب التليفونات .
- جوزيه : إمتدحنا فيك الجرأة ، لكن يبدو أنك تركتها فى ملعب المباراة السابقة !! كيف يلعب خط دفاع مكون من 3 أفراد على مهاجم واحد !! إنت بتشل قدرات الفريق الهجومية بدلا من تحريرها وتدعيمها !! كما لا أفهم وجود 5 لاعبين فى الملعب وهم بعيدين عن اللعب المستمر ويفتقدوا حساسية المبارايات (بركات ومتعب ووليد وشوقى واحمد السيد )، كما أن طريقة الليبرو لم تغنى عن الخطر المستمر على مرمى الأهلى ، خير وسيلة للدفاع الهجوم .
- حسام عاشور : بصراحة كنت ثغرة واضحة فى وسط الملعب ، أداء قد يعيدك لدكة البدلاء مجدداً .
- أحمد ناجى : مش عارف إنت ما بتعالجش مشكلة الكرات العرضية العالية اللى عند إكرامى ليه ؟ إوعى تكون مش شايفها ، ولا المصيبة لا تكون بتعالجها نظرى !!