حصريا: نصيحة مورينيو الهاتفية لفيرجسون قبل لقاء البرسا!

أشارت جريدة التليجراف الإنجليزية بالأمس إلى حوار متوقع قريباً بين السير فيرجسون ومورينيو حسب تصريحات السير الإعلامية؛ حيث يرى أن الحديث مع مورينيو يساعده دائماً... ولم لا هذه المرة؟... فقد قابل البلوجرانا 7 مرات خلال عام واحد منها 5 في الأشهر الخمسة الأخيرة فقط مع فريقه الملكي الأبيض. السير فيرجسون يرى أن الحديث سيفيده خاصة أن آخر لقاء له ضد كبار إسبانيا كان في نهائي بطولة 2009 وأمام برشلونة أيضاً، ولكن مانشستر فريق مختلف في عناصر تشكيلته وطريقة لعبه. ذلك هو الخبر ولك الأهم منه نص الحوار الذي قد يدور بينهما خلال الأيام القليلة القادمة.
ترى عزيزي القارئ ماذا يكون الحديث بينهما؟ لقد أطلقنا للخيال العنان ولك التعليق من بعد، وإن كنت من مشجعي البلوجرانا فلا تأخذ الأمر بحساسية شديدة، فالأمر كله مجرد فضول حول حديث للكبار.
السير: هالو... مورينيو... هارد لك يا مان... أوه نو بعد الشر... هارد لك يا ملكي يا أبيض إنت.
مورينيو: هالو... فيرجي... روحك مرحة يا سير...مبروك ليكم النهائي يا كينج..
السير: حبيبي يا مورينيو... من أيام بورتو... واحشني إنت والبالطو المزيت بتاعك قبل ربنا ما يفتحها عليك.. بعد الحكم ما ظبتنا ليكم يوميها..
مورينيو: الحكم... إنت جبت الخلاصة... كان واد عترة ومجدع.. مش زي شتارك ودبلكير... حكام سيس... قبيضة... تصدق واللي خلقك سمعت إنهم بيخافوا من القرع والواد النمس بيب ما صدق وجابها زيرو... بس أخوك مارضاش يعملها ماكنتش هلاقي حاجة أشدها.
السير: طب كويس إنك قلت... أنا هاخلي الفريق كله عالزيرو... والمساعد بتاعي حالقها من سنة.. وزيرو من ساعتها.
مورينيو: اسمع مني اللي هاقوله ده.. حاول تلعب ب 11 لاعب.. ده هيفيدك كثير قوي.. صدقني يا كبير..
السير: مممم... قول يا رب... وربنا يستر من روني وسكولز.. عيال ولاد سبعة.. ومتهورين.. إيه تاني؟
مورينيو: كويس إنك جبت سيرة روني.. الواد ده جوعه كويس قبل الماتش.. ينزل ياكل لك النجيلة... كريستيانو كان جايب لي معاه أكل معلبات ونفسه مسدودة وقرفان مننا.
السير: خلّف الندل وماعزمنيش في السبوع ولا عرفني بأمها... أنا ماربيتش غير بيكهام.. إيه تاني؟
مورينيو: الحق هات لك دي في دي صغير حلو كده شيله في جيبك هيسليك بدل ماتزهق من لاعيبة برشلونة.. يقعدوا يقسموا وينقلوا الكورة بينهم كأنهم خايفين يطلعوا من الملعب مايلاقيهاش بيب معاهم ويعاقبهم.
السير: وماله مايضرش.. كمل..
مورينيو: بص يافيرجي يا حبيبي.. وماتفهمنيش غلط... أنا لعبت ماتش الكأس اللي راموس الله يسامحه كسره وشمت فينا الأعادي بطريقة 5-5-0 مش علشان الحسد ولا حاجة... ولا علشان الخمسة اللي لسه معلمة علينا.. بس علشان 5 بتخلي فيه روح في الفريق وإنت عارف المعنويات مهمة وجابت نتيجة إنت شفتها بعينك.. مضمونة ومجربة يابرنس وخطة بتاعة كئوس صحيح.
السير: بس إنت لعبت بيها برضه في ماتش الدوري واتعادلت.. مش كده ولا أنا متهيألي؟
مورينيو: تمام يا فيرجي ما إنت مذاكر أهو.. كانت تمويه لأن الخطة خطة كأس مش دوري يا كبير..
السير: بس إنت ماجبتش سيرة ميسي أعمل معاه إيه؟
مورينيو: بسيطة.. عليك وعلى البلاي ستيشين... كل حركاته فيه... اعمل محاضرات بيه للمدافعين..
السير: استمر..
مورينيو: تشتري رزم ورق صغير وقلمين لزوم طردك من الملعب أو خدها من قاصرها واحجز في فندق جنب ويمبلي وقضيها رسايل لو مش بتحب الورق والأقلام... كلت منهم لما شبعت يا فيرجي ياخويا..
السير: باقول لك إيه يا مورينيو.. روح الله يكرمك يا شيخ.. وما يرميك في ضيقة.. يلا باي..
ثم مكالمة بين فيرجسون وكريستيانو رونالدو..
السير: هالو ...أهلا يا كريس يا حبيبي.. ابن أصل والله لسه باشكر فيك مع حبيبي مورينيو.. خير يا حبيبي..
كريس: أنا لما عرفت بالمكالمة قلت الحقك... بص من الآخر.. هما حاجتين.. الحكام.. وشاكيرا..
السير: شاكيرا مين يا كريس؟ طب وخطة 5-5-0
كريس: شاكيرا كانت خداع استراتيجي يا ريس... حاول تمنعها.. ده إنت كبير لندن.. وعرفني وسيب الباقي علي.. والخطة... أنا كنت الصفر يا باشا... اسكت.. أشوف فيه يوم..
السير: شكراً يا أصيل على المكالمة... وبطل معلبات وكل النجيلة وحلل فلوسك يا حبيبي..
كريس: العفو يا كبير... إنت تأمر... وحياة أبوك ظبط موضوع شاكيرا ده علشان طالعة من عيني.. مممم قصدي هي كلمة السر في فوزكم بالكأس.. سلام يا كينج..
السير: سلام يا كريس يا حبيبي... إنت تأمر... سلم على بنتك يا كريس وابعت لي السبوع ما تبقاش بخيل وندل... جااااااااااي.. قصدي باي..
السير واضعاً سماعة التليفون العتيق في غرفة المعيشة وبينه وبين نفسه يقول: "ده مورينيو ده طلع نمس كبير وخبى علي موضوع شاكيرا.. طيب يا مورينيو.. ولا جاب سيرة تشافي وإنيستا ولا بيدرو.. طيب يا مورينيو وأنا اللي فاكرك صاحبي وحبيبي وكفاءة".
أتركك عزيزي القارئ مع خيالك أنت وتخيل ما قد يكون عليه الحوار.. نحن في انتظار تعليقاتكم..
*